SİYASƏT
Siyasi şərhçi: Şuşa xalqımızın maddi-mənəvi dəyərlərini özündə əks etdirən əziz məkanıdır
Bakı, 29 yanvar, AZƏRTAC
Prezident İlham Əliyevin 2022-ci il yanvarın 5-də imzaladığı Sərəncama əsasən, cari il ölkəmizdə “Şuşa İli” elan olundu. Bunun da bir neçə səbəbi vardır. Birincisi, bu il Şuşanın 270 illiyi qeyd olunur. Məlumdur ki, Şuşanın təməli Qarabağ xanı Pənahəli xan tərəfindən 270 il bundan əvvəl qoyulub. Bu, saxta tarixçilərə daha bir mesajdır ki, Şuşa Azərbaycan şəhəridir və onun təməlini də azərbaycanlı qoyub. Həmçinin Şuşada azərbaycanlılar yaşayıb, lakin ermənilər xarici qüvvələrin dəstəyi ilə şəhəri işğal etmişdilər. İşğalçılar Şuşanı 30 ilə yaxın müddətdə əllərində saxlasalar da, şəhərin inkişafı üçün heç bir cəhd göstərməyiblər. Bunun əksinə olaraq, erməni vandalları Şuşada dağıntılar törədərək, şəhərin tarixi, mədəniyyət abidələrinə ciddi ziyan vurublar. Bir ildən çox müddətdir ki, Azərbaycan Şuşanı işğaldan azad edib. Bu zaman kəsiyində Şuşada ermənilər tərəfindən dağıdılmış, ziyan görmüş tarixi-mədəniyyət abidələri bərpa olunub. Xurşidbanu Natəvanın, Üzeyir Hacıbəylinin büstləri əvvəlki yerlərinə qaytarılıb, Bülbülün ev muzeyi bərpa olunub. Həmçinin Molla Pənah Vaqifin büstü və muzey-məqbərə kompleksi ilkin görkəminə qaytarılıb. Şuşada əvvəllər mütəmadi təşkil olunan Vaqif Poeziya Günləri 30 ildən sonra ilk dəfə ötən il yenidən keçirildi. Eyni zamanda, ölkəmizin mədəniyyət paytaxtı Şuşada “Xarıbülbül” musiqi festivalı böyük sevinclə, qürurla təşkil olundu. Ümumiyyətlə, Şuşa dahi Azərbaycan ziyalılarının doğulub boya-başa çatdıqları məkan kimi də tanınır. Buna görə də Şuşada çoxsaylı məqbərələrə, büstlərə, ev-muzeylərinə rast gəlmək mümkündür.
Bu fikirləri AZƏRTAC-a açıqlamasında siyasi şərhçi Murad Sadəddinov söyləyib.
Siyasi şərhçi bildirib ki, Şuşa Azərbaycan üçün, sadəcə, bir şəhər deyil, xalqımızın maddi-mənəvi dəyərlərini özündə əks etdirən rəmz, əziz məkanıdır. Biz bunu 44 günlük Vətən müharibəsi zamanı da gördük. Belə ki, Azərbaycan Ordusu beynəlxalq təzyiqlərə rəğmən Şuşanı azad etməyənədək dayanmadı. Bütün bunları ümummilli lider Heydər Əliyevin deyimi ilə ifadə etsək, “Şuşasız Qarabağın olmadığını” göstərdi. Həmçinin müharibənin gedişində Ali Baş Komandan, Prezident İlham Əliyev də vurğuladı ki, Şuşasız bizim işimiz yarımçıq qalar. Ona görə də Azərbaycan Ordusunun başlıca məqsədi Şuşanı azad etmək idi. Bu səbəbdən hərbçilərimiz böyük şücaət, qəhrəmanlıq göstərərək Şuşanı qanları, canları bahasına azad etdilər. Bu gün dünyanın hərbi məktəblərində, ordu sistemlərində, analitik mərkəzlərində Şuşanın azad olunması əməliyyatı araşdırılır, öyrənilir və bu istiqamətdə təcrübələr keçirilir.
M.Sadəddinov əlavə edib ki, Şuşanın azad olunması Azərbaycan tarixinin uzunmüddətli dövrü üçün böyük töhfədir. Məhz Şuşanın azad olunduğu tarix Azərbaycanda Zəfər Günü kimi qeyd olunur. Hətta deyərdim ki, bu tarixi an yüz illər ərzində xalıqımız tərəfindən hər zaman ən xüsusi bayram kimi qeyd olunacaq. Şuşa, həmçinin Qarabağ elə bir məkandır ki, o əraziləri görməyən gənclər həmin yerlərin azad olunması üçün canlarını fəda etdilər. Artıq bundan sonra Şuşanı, azad olunan digər ərazilərimizi qorumaq hamımızın borcudur. Çünki bu torpaqlar uğrunda minlərlə şəhid vermiş bir xalq müqəddəs amal uğrunda mübarizəni hər zaman davam etdirməlidir. Azərbaycan dövləti də Şuşanın, ümumiyyətlə, Qarabağın təhlükəsizliyinin təmin olunması üçün ciddi addımlar atır. Belə ki, 2021-ci il iyulun 15-də Qarabağın mərkəzi Şuşada Azərbaycan Respublikasının Prezidenti İlham Əliyev və Türkiyə Respublikasının Prezidenti Rəcəb Tayyib Ərdoğan tərəfindən tarixi Şuşa Bəyannaməsi imzalandı. Bu Bəyannamə regionun, xüsusilə də Qarabağın təhlükəsizliyi baxımından vacib addım idi. Həmçinin Azərbaycan və Türkiyə dövlətlərinin əməkdaşlığının yeni formatını yaratdı.