SİYASƏT


Siyavuş Novruzov: Lider ölkə olan Azərbaycan regionda yeni geosiyasi nizam yaradır

Bakı, 7 oktyabr, AZƏRTAC

Cənubi Qafqazda sülh və etimad quruculuğu, Azərbaycan ilə Ermənistan arasında münasibətlərin normallaşdırılması məsələsi beynəlxalq ictimaiyyətin diqqətindədir. Praqada “Avropa siyasi birliyi” Zirvə Toplantısı çərçivəsində postmüharibə dövrünün reallıqlarının və sülh gündəliyinin müzakirə olunması da bu reallığı təsdiqləyir.

Bunu Milli Məclisin Regional məsələlər komitəsinin sədri Siyavuş Novruzov AZƏRTAC-a açıqlamasında söyləyib.

S.Novruzov bildirib ki, Prezident İlham Əliyevin Praqada keçirdiyi görüşlər bir neçə mühüm məqamı əks etdirir. Azərbaycanın dövlət başçısının Avropa İttifaqı Şurasının Prezidenti Şarl Mişel ilə görüşü zamanı səsləndirilən fikirlər Azərbaycanın etibarlı və perspektivli tərəfdaş kimi tanındığını, ölkəmizlə əməkdaşlığın Avropanın strateji prioritetlərindən biri olduğunu növbəti dəfə təsdiqləyir. Prezident İlham Əliyev daha bir ali tribunadan – mühüm platformadan istifadə edərək Azərbaycan həqiqətlərini, regional təhlükəsizlik məsələlərini beynəlxalq ictimaiyyətin diqqətinə çatdırdı. “Avropa siyasi birliyi” Zirvə Toplantısı çərçivəsində “Avropa qitəsində sülh və təhlükəsizlik” mövzusunda keçirilən dəyirmi masada çıxış edən dövlətimizin başçısı ikitərəfli və çoxtərəfli münasibətlər, yeni geosiyasi reallıqlar, sülh, təhlükəsizlik və əməkdaşlıqla əlaqədar Azərbaycanın aydın və prinsipial yanaşmasını, qətiyyətli mövqeyini ortaya qoydu.

“Prezident İlham Əliyevin Fransa Prezidenti, Avropa İttifaqı Şurasının Prezidenti və Ermənistanın baş naziri ilə görüşü isə sülh prosesinin irəliyə aparılması baxımından mühüm əhəmiyyətə malikdir. Yeri gəlmişkən, dövlətimizin başçısı Azərbaycan televiziya kanallarına müsahibəsində vurğuladı ki, biz sülhə yavaş-yavaş yaxınlaşırıq. “Brüsseldə bir neçə dəfə üçtərəfli görüş keçirilib və hər dəfə biz sülhə daha da yaxınlaşırıq. Bu dördtərəfli görüş Şarl Mişel və Emmanuel Makron tərəfindən təşkil edilib və bu görüş zamanı da önəmli məsələlər müzakirə olunub. Hesab edirəm ki, bu görüşün də sülh müqaviləsinə çatmaq üçün önəmi olacaq”,- deyən Azərbaycan Prezidentinin sözlərinə görə, sülh prosesinə artıq təkan verildi. Ümumiyyətlə, Azərbaycanın təşəbbüsləri dəstəklənir, sülh sazişi ilə əlaqədar təklifləri birmənalı şəkildə qəbul edilir. Dövlət başçısının da bildirdiyi kimi, Ermənistan tərəfindən xoş məram olarsa, sülh müqaviləsi ilin sonunadək imzalana bilər”, - deyə S.Novruzov qeyd edib.

Komitə sədri qeyd edib ki, dördtərəfli görüşün sonunda qəbul edilən bəyanata görə, Ermənistan və Azərbaycan BMT Nizamnaməsinə və 1991-ci il Alma-Ata Bəyannaməsinə sadiqliyini bir daha nümayiş etdirərək bir-birinin ərazi bütövlüyü və suverenliyini tanıyır.

“Göründüyü kimi, ölkəmizin strateji fəaliyyəti nəticə verib, Ermənistan Azərbaycanın ərazi bütövlüyünü tanıyır. Beləliklə, bəhs olunan görüşlər, irəliyə doğru atılan addımlar Azərbaycan dövlətinin tarixi Qələbəsinin siyasi-diplomatik müstəvidə möhkəmləndirildiyini göstərir. Ölkəmiz strateji hədəflərinə doğru addımlayır və regionda Azərbaycanın liderliyi ilə yeni geosiyasi nizam yaranır”, - deyə S.Novruzov fikirlərini yekunlaşdırıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.