CƏMİYYƏT
Son iki ayda iki hemodializ mərkəzi istifadəyə verilib, yaxın günlərdə isə daha ikisi açılacaq
Bakı, 9 mart, AZƏRTAC
Hazırda ölkəmizdə yaş həddi 6-dan 84-ədək olan 3406 hemodializ xəstəsi var. Həmin xəstələrin 1384-ü Bakıda, 2013-ü bölgələrdədir. Böyrək xəstələrinə 616 hemodializ aparat, 86 dializ həkimi və 489 orta tibb işçisi xidmət edir. Keçən il 1225 yeni xəstə qəbul edilib. Xəstələrdən 189-da hepatit B, 349-da isə hepatit C virusu aşkar edilib.
AZƏRTAC xəbər verir ki, bu barədə Azərbaycan Tibb Universitetinin Tədris Terapevtik Klinikasında keçirilən Ümumdünya Böyrək Gününə həsr olunan konfransda M. Cavadzadə adına Respublika Uroloji Xəstəxanasının hemodializ şöbəsinin müdiri, tibb üzrə fəlsəfə doktoru Fariz Babayev məlumat verib.
O, konfrans iştirakçılarına yeni yaranan "Nefrologiyanın inkişafına yardım" İctimai Birliyi haqqında məlumat verərək onun bu sahədə ilk qeyri-hökumət təşkilatı olduğunu qeyd edib. Şöbə müdirinin verdiyi məlumata görə, bu ilin yanvarınadək respublikamızda 41 hemodializ mərkəzi fəaliyyət göstərir və onlardan 35-i regionlarda fəaliyyət göstərir. Yanvardan bəri daha iki mərkəz açılıb, yaxın iki həftə ərzində isə daha iki hemodializ mərkəzinin də açılışı gözlənilir. Onun sözlərinə görə, keçən il 246 xəstə Bakıda, 392 xəstə regionlarda olmaqla 638 xəstə həyatını itirib. Ötən il ərzində 758 xəstəyə böyrək köçürülüb.
Tədbiri giriş sözü ilə açan Tibb Universitetinin elmi işlər üzrə prorektoru Rauf Bəylərov açaraq konfransın “Sağlam böyrək - sağlam qadın” devizi altında keçirildiyini söyləyib.
Səhiyyə Nazirliyinin baş nefroloqu Mətləb Ağayevun rəhbərliyi ilə keçən konfransda xronik qlomerulonefriti olan uşaqlarda nefrin və podosin genlərində polimorfizmlərin heterogenliyi, diabet nefropatiyasının mikroalbuminuriya dövründə böyrəklərin funksional vəziyyəti, hemodializ zamanı seçimli ultrafiltrasiyanın tətbiqinin əhəmiyyəti, lipopolisaxarid endotoksinin təsirindən böyrəklərdə baş verən patomorfoloji dəyişikliklərin xüsusiyyətləri və hiperurikemiya müşahidə edilən böyrək xəstəliklərinin müalıcəsində Adenurikin tətbiqi təcrübəsi mövzusunda məruzələr dinlənilib.