ELM VƏ TƏHSİL


Son illər Azərbaycan qlobal məsələlərin müzakirə olunduğu məkan kimi tanınır

Bakı, 24 may, AZƏRTAC

Dünyada mövcud olan müxtəliflik insanların fasiləsiz olaraq kütləvi şəkildə yerdəyişməsi nəticəsində son illər daha da artıb. Hesablamalar göstərir ki, təxminən 70 milyon insan müxtəlif səbəblərdən öz ölkəsini tərk etməyə məcbur olub. İnsanların bu cür yerdəyişməsinə cavab olaraq, bir sıra dünya dövlətləri siyasətin birbaşa müdaxiləsi olmadan belə sürətli dəyişikliyin icmaların qütbləşməsinə və ideoloji ekstremizmə, eləcə də siyasi parçalanma, ksenofobiya, irqçilik və sosial ayrı-seçkiyə, son nəticədə isə həm sosial, həm də siyasi zorakılığa təkan verəcəyindən narahat olaraq yaranan müxtəlifliyi idarə etmək üçün hərəkətə gəlib.

Azərbaycan sivilizasiyaların, mədəniyyətlərin və dinlərin kəsişməsində, eləcə də coğrafi baxımdan Avropa və Asiya arasında yerləşir. Bu coğrafi yerləşmə Azərbaycanın mədəni müxtəlifliyində öz rolunu oynayıb.

Bu fikri AZƏRTAC-a müsahibəsində Azərbaycan Memarlıq və İnşaat Universitetinin ictimai fənlər kafedrasının müdiri Könül Əliyeva söyləyib. May ayının əvvəlində Bakıda keçirilmiş Ümumdünya Mədəniyyətlərarası Dialoq Forumu ilə bağlı fikirlərini bölüşən Könül Əliyeva qeyd edib ki, əsrlərboyu bütün mədəniyyətlər, dinlər və etnik qrupların nümayəndələri Azərbaycanda sülh və təhlükəsizlik şəraitində bir ailə kimi yaşayıblar. Dünyada isə son vaxtlar təcridolunma, ayrı-seçkilik, ksenofobiya, islamofobiya, antisemitizm kimi təhlükəli amillər baş qaldırıb ki, bunlar artıq bəşəriyyət tarixində sivilizasiyaların və xalqların fəlakətinə səbəb olub.

Beşinci Ümumdünya Mədəniyyətlərarası Dialoq Forumunun “Ayrı-seçkilik, qeyri-bərabərlik və zorakı münaqişəyə qarşı fəaliyyət naminə dialoq quraq” şüarının əhəmiyyətini vurğulayan müsahibimiz, həmçinin 2008-ci ildən Prezident İlham Əliyevin təşəbbüsü ilə həyata keçirilən “Bakı Prosesi”nin uğurlarını qeyd edib. Bildirib ki, “Bakı Prosesi” 10 il ərzində müxtəlif qitələrdə yaşayan fərqli etnik, mədəni, dini və linqvistik mənsubiyyəti olan ayrı-ayrı insanlar və qruplar arasında qarşılıqlı anlayış çərçivəsində səmimiyyət və hörmətə əsaslanan fikir mübadiləsi üçün müsbət platforma yaradıb. Keçən müddət ərzində Forumun coğrafiyası çox genişlənib, nəticədə tədbirə qoşulan qurumların sayı xeyli artıb. Builki Forum çərçivəsində insanlar arasında həmrəylik yaratmaqda və müxtəlif icmalarda zorakılığa və ayrı-seçkiliyə qarşı mübarizədə mədəniyyətlərarası dialoqun mühüm rolu öyrənilib.

Azərbaycan Prezidenti İlham Əliyev Forumdakı nitqində diqqətə çatdırıb ki, 2011-ci ildə bizim mədəniyyətlərarası dialoqa həsr edilmiş Ümumdünya Forumunu təşkil etmək təşəbbüsümüz tariximiz, coğrafiyamız və düşüncəmizdən qaynaqlanırdı və dünyanı təhlükəsiz etmək üçün biz sivilizasiyalar, mədəniyyətlər, müxtəlif etnik qrup və dinlərin nümayəndələri arasında dialoqun təşviqi sahəsində çox fəal olmalıyıq. Bizim tariximiz mədəni müxtəliflik tarixidir və bu gün həmin tarixi irs əsasında Azərbaycan dünyaya mədəniyyətlərarası dialoqun ölkələri yaxınlaşdırmağın, müxtəlif mədəniyyət və sivilizasiya nümayəndələri arasında yeni körpülərin qurulmasının yeganə yol olduğunu nümayiş etdirir.

Könül Əliyeva vurğulayıb ki, son illər Azərbaycan artıq qlobal məsələlərin müzakirə olunduğu, qitə və dünya miqyaslı tədbirlərə ev sahibliyi edən humanitar məkan kimi tanınır. Bu gün mədəniyyətlərarası və sivilizasiyalararası dialoq, multikulturalizmə aid məsələlər “Bakı Prosesi”nə daxildir. Bu dialoqların yüksək səviyyədə təşkil edilməsində mühüm rol oynayan Azərbaycanın beynəlxalq aləmdəki nüfuzu getdikcə artıb. Hazırda Azərbaycan həm regionun siyasi, iqtisadi və humanitar mərkəzinə çevrilib, həm də beynəlxalq münasibətlər sistemində öz layiqli yerini tutub, güclü dövlət və etibarlı tərəfdaş imici qazanıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.