CƏMİYYƏT


Sosial xidmət müəssisəsinin sakinlərinin iştirakı ilə hazırlanan nağıl-tamaşanın təqdimatı olub

Bakı, 6 iyul, AZƏRTAC

Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyi və Azərbaycan Dövlət Mədəniyyət və İncəsənət Universitetinin birgə təşkilatçılığı ilə DOST İnklüziv İnkişaf və Yaradıcılıq Mərkəzində “Meşədə əhvalat” adlı iki hissəli nağıl-tamaşanın təqdimatı keçirilib.

Agentliyin İctimaiyyətlə əlaqələr və kommunikasiya şöbəsindən AZƏRTAC-a verilən məlumata görə, təqdimat mərasimində əmək və əhalinin sosial müdafiəsi nazirinin müavini Hidayət Abdullayev, Yasamal rayon İcra Hakimiyyətinin başçısı Elşad Həsənov, YAP Yasamal rayon təşkilatının sədri Bəxtiyar Nəbiyev, Vətən müharibəsi şəhidlərinin övladları və tanınmış mədəniyyət və incəsənət nümayəndələri iştirak ediblər.

Təqdimat mərasimində çıxış edən H.Abdullayev bildirib ki, Prezident, Silahlı Qüvvələrin Müzəffər Ali Baş Komandanı İlham Əliyevin tapşırığı ilə icra olunan sosial dəstək tədbirləri 44 günlük Vətən müharibəsindən sonrakı dövrdə də uğurla davam etdirilir. Şəhid ailələrinin, qazilərin sosial müdafiə və aktiv məşğulluq proqramları, reabilitasiya xidmətləri ilə əhatə olunması məqsədilə mühüm işlər görülür, onların rifahı, sosial-məişət şəraitlərinin yaxşılaşdırılması məsələləri daima diqqətdə saxlanılır.

Nazir müavini bildirib ki, dövlət başçısının sosial-həssas qruplara olan xüsusi diqqətinin nümunəsi kimi son illərdə həmin kateqoriyadan olan şəxslərin sosial müdafiəsi tədbirləri daha da gücləndirilib. Əmək və Əhalinin Sosial Müdafiəsi Nazirliyi tərəfindən bu sahədə davamlı olaraq sosial layihələr icra edilir. “Meşədə əhvalat” tamaşasının əsas məqsədi də çətin həyat şəraiti ilə qarşılaşan uşaqların sosial reabilitasiyası və cəmiyyətə inteqrasiyasına dəstək göstərməkdir. Tamaşanın aktyorları Sosial Xidmətlər Agentliyinin Həssas əhali qruplarından olan şəxslər üçün Sığınacaq və Sosial reabilitasiya müəssisəsinin 3 nəfər azyaşlı sakini və universitetin “Teatr sənəti” fakültəsinin 3 tələbəsidir.

Sosial Xidmətlər Agentliyi ilə Azərbaycan Dövlət Mədəniyyət və İncəsənət Universiteti arasında imzalanmış memoranduma əsasən səhnələşdirilən bu tamaşa travma və çətinliklərlə üzləşmiş insanlara sənət yaradıcılığı( art-terapiya) vasitəsilə terapevtik yardım etmək və çətin həyat şəraiti ilə qarşılaşan uşaqların cəmiyyətə yenidən adaptasiya olunmasına və sosiallaşmasına yardımçı olmağı hədəfləyib.

Universitetin rektoru, sənətşünaslıq üzrə elmlər doktoru, professor Ceyran Mahmudova bildirib ki, bu kimi tədbirlər xüsusi qayğıya ehtiyacı olan şəxslərin dəstəklənməsi, onların cəmiyyətə yenidən qazandırılması baxımından çox vacibdir. Tamaşanın bədii rəhbəri Əməkdar incəsənət xadimi Bəhram Osmanov, quruluşçu rejissoru Elvin Nuridir.

Sonra Sosial Xidmətlər Agentliyinin 1 saylı sağlamlıq imkanları məhdud uşaqlar üçün sosial xidmət müəssisəsinin sakinlərinin hazırladığı "Arşın mal alan" tamaşasından rəqs nümunəsi təqdim edilib.

"Meşədə əhvalat" tamaşası qonaqların marağına səbəb olub.

Tamaşa iştirakçılarına təşəkkürnamələr təqdim edilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.