DÜNYA


Şri-Lanka Prezidenti ölkə ərazisində fövqəladə vəziyyət rejimi tətbiq edəcək VİDEO

Bakı, 22 aprel, AZƏRTAC

Şri-Lanka Prezidenti Maytripala Sirisena silsilə terror aktlarından sonra ölkə ərazisində fövqəladə vəziyyət rejiminin tətbiqi barədə qərar qəbul edib.

AZƏRTAC Reuters agentliyinə istinadla xəbər verir ki, fövqəladə vəziyyət rejimi aprelin 23-dən etibarən qüvvəyə minəcək. Yeni terror aktlarının qarşısının alınması və fövqəladə vəziyyət rejiminin tətbiqinə aid müvafiq normativ aktlar bir qədər sonra dərc olunacaq. Həmçinin prezidentin terror hücumları ilə bağlı təhqiqatın aparılması üçün xaricdən kömək istəyəcəyi də gözlənilir.

Bu arada “Daily Mirror” qəzeti prezidentin mətbuat xidmətinə istinadla ölkənin Milli Təhlükəsizlik Şurasında ictimai təhlükəsizliyin təmin olunması üçün güc strukturlarının səlahiyyətlərini genişləndirmək barədə qərar qəbul olunduğunu yazıb. Yerli vaxtla saat 20:00-dan aprelin 23-ü saat 04:00-a qədər komendant saatı bərpa edilib.

Xatırladaq ki, ötən bazar günü pasxa bayramı zamanı Şri-Lankada törədilən partlayışlar seriyası nəticəsində azı 290 nəfər həlak olub, 500-ə yaxın insan isə yaralanıb. Həlak olanların arasında Danimarka, Yaponiya, Pakistan, Mərakeş, Hindistan, Banqladeş, Çin, Niderland, ABŞ, Türkiyə və Böyük Britaniya vətəndaşları da var.

Şri-Lanka ordusu təhlükəsizliyi təmin etmək üçün ölkənin paytaxtı Kolomboya mindən çox hərbçi göndərib. Hadisə ilə bağlı 24 nəfərin saxlanıldığı bildirilir. Hakimiyyət orqanları terror hücumlarında “Tövhid camaatı” qruplaşmasını ittiham edib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.