İQTİSADİYYAT
Statistika Komitəsinin bir qrup əməkdaşı Buxarestdə təlim səfərinə qatılıblar
Bakı, 18 sentyabr, AZƏRTAC
Sentyabrın 17-20-də Dövlət Statistika Komitəsinin nümayəndələri “Avropa standartlarına çatmaq üçün Azərbaycan Respublikasının Dövlət Statistika Komitəsinə Avropa İttifaqının dəstəyi” layihəsi çərçivəsində Rumıniya Milli Statistika İnstitutunda təlim səfərində olublar.
Komitədən AZƏRTAC-a bildirilib ki, məqsəd Rumıniya Milli Statistika İnstitutunun rəsmi internet səhifəsinin strukturu, məlumatların yerləşdirilməsi, istifadəçi qruplarının maraqları, statistik məlumatların yayılması, istifadəçilərlə əlaqələrin qurulması, coğrafi informasiya sistemləri, inzibati məlumatlardan istifadə sahəsində təcrübəsinin öyrənilməsidir.
Səfər müddətində Ruminiya mütəxəssislərinin institutun rəsmi internet səhifəsinin strukturu haqqında, yayım sahəsində mövcud olan qanunverici sənədləri, statistik məlumatların yayılması və istifadəçilərlə əlaqələrin qurulması, istifadəçi qruplarının bölgüsü, onların statistik məlumatlarla təmin olunma prosesi, coğrafi informasiya sistemləri, statistik məlumatların elektron xəritələr vasitəsilə yayılması, yayımlanan statistik məlumatların əhatə dairəsi, inzibati məlumatlardan istifadə, həmçinin statistik məlumatların istehsalı prosesində informasiya və kommunikasiya texnologiyalarının tətbiqi sahəsində təqdimatları nümayiş olunub. Eyni zamanda, Dövlət Statistika Komitəsinin əməkdaşları tərəfindən Rumıniya Milli Statistika İnstitutunun mütəxəssislərinə Dövlətstatkomun rəsmi internet səhifəsinin strukturu, statistik məlumatların toplanması, işlənməsi və yayılması prosesi, mövcud yayım növləri, həmçinin son illər bu istiqamətlərdə həyata keçirilmiş islahatlar və layihələr barədə ətraflı məlumat verilib.
Azərbaycan Respublikasının Dövlət Statistika Komitəsi və Rumıniya Milli Statistika İnstitutu arasında qarşılıqlı əməkdaşlığın perspektivləri də müzakirə edilib.