Stokholm, 6 noyabr, AZƏRTAC

Diasporla İş üzrə Dövlət Komitəsinin nümayəndə heyəti İsveçdə səfərdədir. Səfər çərçivəsində Dövlət Komitəsinin sədri Fuad Muradov Azərbaycanın İsveçdəki səfirliyində ümummilli lider Heydər Əliyevin büstü önünə əklil qoyub.

AZƏRTAC xəbər verir ki, daha sonra Komitə sədri İsveç siyasətində uğur qazanmış bir qrup azərbaycanlı ilə görüş keçirib.

Görüşdə Azərbaycanın İsveçdəki səfiri Adış Məmmədov, həmçinin İsveç Sosial-Demokratlar Partiyasının üzvü, Söderberq Jönköpinq region parlamentinə seçkilərdə qalib gələn İradə Əliyeva, İsveç Sosial-Demokratlar Partiyasından Haninge bələdiyyəsindən əyalət parlamentinə seçilən deputat Vüsal Quliyev və İsveç Mərkəz Partiyasından Partille bələdiyyə məclisinin üzvü Turan Əliyev də iştirak ediblər.

Görüşdə çıxış edən Azərbaycanın İsveçdəki səfiri Adış Məmmədov Skandinaviya regionunda yaşayan həmyerlilərimizin siyasi təşkilat və partiyalara uğurlu inteqrasiyasının vacibliyini qeyd edib, bu işdə qazanılan uğurların təqdirəlayiq olduğunu vurğulayıb. Xaricdəki diasporumuzun Azərbaycan həqiqətlərini daha geniş auditoriyaya çatdırması kimi vacib funksiyanı yerinə yetirməli olduğunu qeyd edən səfir bu işdə müəyyən uğurların qazanılmasına rəğmən bu səpkidə aparılan işin davam etdirilməsinin zəruriliyini diqqətə çatdırıb.

İsveçdə yaşayan və fəaliyyət göstərən həmvətənlərimizin Azərbaycan və azərbaycançılıq naminə gördükləri işlərdən danışan A.Məmmədov onların fəaliyyətinin yüksək qiymətləndirildiyini bildirib. İsveçdə doğulan və yüksək təhsil alan azərbaycanlı gənclərin böyük potensiala malik olduqlarını, diaspora fəaliyyətində yaranmış bəzi boşluqları doldura biləcəklərini qeyd edib.

Sonra çıxış edən Diasporla İş üzrə Dövlət Komitəsinin sədri Fuad Muradov İsveçin siyasi həyatında fəallıq göstərən azərbaycanlılarla görüşdən məmnunluğunu ifadə edib. Komitə sədri deyib ki, yaşadığı yerdən və çalışdığı sahədən asılı olmayaraq hər bir azərbaycanlı Vətənə dəstək olmalı və ümumi amal uğrunda iş aparmalıdır.

Azərbaycan diasporunun fəaliyyəti, Diasporla İş üzrə Dövlət Komitəsi tərəfindən gələcəkdə həyata keçirilməsi nəzərdə tutulan layihələr və addımlar haqqında danışan F.Muradov diaspor üzvlərinin birgə fəaliyyət göstərməsinin, müxtəlif layihələr yerinə yetirməsinin əhəmiyyətini qeyd edib.

Azərbaycanın Prezident İlham Əliyevin rəhbərliyi altında sürətlə inkişaf etdiyini, bu siyasətin uğurlu nəticələr verdiyini qeyd edən Dövlət Komitəsinin sədri ümummilli lider Heydər Əliyevin diaspor quruculuğuna verdiyi töhfələrdən danışıb, Azərbaycan dövlətinin xaricdə yaşayan soydaşlarımıza daim diqqət və qayğı göstərdiyini bildirib.

Fuad Muradov Azərbaycan icmalarının yaşadıqları ölkələrin cəmiyyətlərinə inteqrasiyasına, bu dövlətlərin ictimai-siyasi, iqtisadi və mədəni həyatında fəal iştirakına xüsusi önəm verilməsinin vacibliyini bildirib. İsveçdəki azərbaycanlıların qazandıqları uğurların təqdirəlayiq olduğunu bildirən Fuad Muradov diaspor hərəkatının keyfiyyətcə yeni mərhələ olan lobbiçilik fəaliyyətinə keçməsinin reallaşması istiqamətində də mühüm planların olduğunu diqqətə çatdırıb.

Görüşdə xaricdə yaşayan soydaşlarımızın azərbaycançılıq ideyaları ətrafında birləşmək imkanlarından, Dağlıq Qarabağ münaqişəsi və Azərbaycan həqiqətlərinin dünya ictimaiyyətinə çatdırılmasında diaspor təşkilatlarının rolundan danışılıb. Komitə sədri onların qayğıları ilə maraqlanıb, soydaşlarımızın təklif və ideyaları ətrafında maraqlı müzakirələr aparılıb.

Rauf Əliyev

AZƏRTAC-ın xüsusi müxbiri

Stokholm