REGİONLAR


Sumqayıt Dövlət Universitetində “Azərbaycan arxeologiyasının əsasları” dərs vəsaiti təqdim olunub

Sumqayıt, 1 noyabr, Ətrabə Rzayeva, AZƏRTAC

Sumqayıt Dövlət Universitetində (SDU) tarix elmləri doktoru, tanınmış arxeoloq, Əməkdar jurnalist Qafar Cəbiyevin “Azərbaycan arxeologiyasının əsasları” adlı dərs vəsaiti təqdim olunub. Təqdimatda respublikamızın tanınmış alimləri, universitetin professor-müəllim və tələbə heyəti iştirak ediblər.

AZƏRTAC xəbər verir ki, təqdimatda çıxış edən SDU-nun rektoru professor Elxan Hüseynov kitabın əhəmiyyətindən, Azərbaycan arxeologiya elmində müstəsna xidmətləri olan Qafar Cəbiyevin çoxşaxəli fəaliyyətindən söhbət açıb. Bildirilib ki, Azərbaycan ən qədim tarixə və mədəniyyətə malik olan ölkədir. Respublikamızın ərazisində aparılan kompleks elmi tədqiqatlar zamanı bəşər tarixinin müxtəlif inkişaf mərhələlərinə aid zəngin maddi mədəniyyət qalıqları aşkar edilib və Azərbaycan ərazisinin ən qədim sivilizasiya mərkəzlərindən biri olması elmi faktlarla sübuta yetirilib.

Qeyd olunub ki, ümummilli lider Heydər Əliyev tarixi keçmişimizin elmi tədqiqinə və təbliğ olunmasına xüsusi qayğı göstərib, bunun nəticəsində tarixçilərimiz xalqımızın keçdiyi uzunmüddətli inkişaf dövrlərini yenidən tədqiq etməyə başlayıblar. Prezident İlham Əliyevin tarix elminə və xüsusən arxeologiya sahəsinə göstərdiyi diqqət və qayğı nəticəsində bu istiqamətdə böyük uğurlar əldə edildiyini diqqətə çatdıran rektor tanınmış arxeoloq Qafar Cəbiyevin qələmə aldığı dərs vəsaitində müxtəlif dövrlərə aid abidələr və orada aparılan tədqiqatların nəticələrinin əksini tapdığını vurğulayıb.

Rektor onu da bildirib ki, arxeoloji qazıntılara, çoxsaylı araşdırmalara əsaslanan bu əsər elm və təhsil ictimaiyyətinə təqdim edilən sanballı dərs vəsaiti, eyni zamanda, ciddi tədqiqat işidir. Kitabın maraqlı bölmələrindən biri XX əsr görkəmli Azərbaycan arxeoloqlarının həyat və yaradıcılıqları haqqında ilk dəfə verilən bioqrafik oçerklərdir. Bu isə həm elmi, həm də tərbiyəvi əhəmiyyətə malikdir.

Tədbirdə tarix və coğrafiya fakültəsinin dekanı, professor Adil Baxşəliyev, Azərbaycan və Şərqi Avropa xalqları tarixi kafedrasının müdiri, professor Şirxan Səlimov, dosent Bəhram Məmmədli, tarix və onun tədrisi metodikası kafedrasının dosenti Neyman Xasayev, AMEA-nın müxbir üzvü Cəfər Qiyasi, tarix elmləri doktoru, professor Kamil İbrahimov, “MİRAS” İctimai Birliyinin sədri Fariz Xəlilli və tələbələr çıxış edərək bildiriblər ki, “Azərbaycan arxeologiyasının əsasları” kitabı tarixşünaslıq baxımından böyük əhəmiyyət kəsb edir. Kitabda tariximizin bütün dövrlərini özündə yaşadan çoxsaylı arxeoloji abidələr barədə ətraflı bəhs olunur. Nəşr əsasən arxeologiya ixtisası üzrə doktorant və dissertantlar, habelə ali məktəblərin magistr və bakalavr pilləsində tarix ixtisası üzrə təhsil alanlar üçün etibarlı dərs vəsaitidir.

Kitabın müəllifi Qafar Cəbiyev təqdimatın keçirilməsinə verdiyi dəstəyə görə SDU-nun rəhbərliyinə təşəkkürünü bildirib. O, son zamanlar ölkəmizdə aparılan araşdırmalar nəticəsində mədəniyyət, tarix və abidələrin, arxeologiya və etnoqrafiyanın, təbii sərvətlərin müxtəlif tədqiqatların predmetinə çevrildiyini qeyd edib. Yeni elmi istiqamətlər müəyyənləşdirilib və bir sıra uğurlu nəticələr əldə olunub. Bununla yanaşı, aparılmış arxeoloji ekspedisiyalar nəticəsində mühüm elmi dəyərə malik olan materialların əldə edilməsi də “Azərbaycan arxeologiyasının əsasları” adlı dərs vəsaitinin işıq üzü görməsinə zəmin yaradıb.

Sonra təqdimatda tələbələrin sualları cavablandırılıb, fikir mübadiləsi aparılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.