İQTİSADİYYAT
Sumqayıt Kimya Sənaye Parkı ölkə iqtisadiyyatının daha da gücləndirilməsində mühüm rol oynayır
Bakı, 18 sentyabr, AZƏRTAC
Yeddi aydan artıqdır ki, dünyanın başı üzərini almış koronavirus kabusu hələ də bəşəriyyəti qorxu altında saxlamaqdadır. Bu virusa yoluxanların sayının 30 milyon nəfəri keçməsi pandemiyanın hələ də tüğyan etdiyindən xəbər verir. Həm yoluxanların, həm də dünyasını dəyişənlərin sayı da təsdiqləyir ki, dünya bu virusla mübarizəyə hazır deyilmiş. Azərbaycanda isə pandemiyanın yayıldığı ilk gündən düşünülmüş şəkildə mübarizə aparıldı. Dövlətimizin başçısının rəhbərliyi və göstərişi ilə həyata keçirilən tədbirlər, qəbul edilən qərarlar öz bəhrəsini göstərməkdədir.
Bu fikirləri AZƏRTAC-a politoloq Səhər İsmayılova bildirib.
Politoloq deyib ki, Azərbaycan dünya ölkələri ilə müqayisədə pandemiyadan ən az zərər çəkənlər sırasındadır. Siyasi, iqtisadi, mədəni sahələr üzrə itkilərimiz artıq bərpa olunur. Pandemiyanın tüğyan etdiyi müddətdə nəzərdə tutulmuş sosial və iri infrastruktur layihələrinin reallaşdırılması da təsdiqlədi ki, ölkəmiz belə virus qarşısında aciz deyil. Bunun əsas səbəblərindən biri respublikamızın iqtisadi qüdrətinin möhkəm təməllər üzərində qurulmasıdır. Məlum olduğu kimi, Azərbaycan müstəqilliyini bərpa etdikdən sonra bütün sahələrdə olduğu kimi, iqtisadi sahədə də yaddaqalan nailiyyətlər qazanılıb. Ulu Öndərin siyasi kursunu layiqincə davam etdirən Prezident İlham Əliyevin dövlət idarəçiliyindəki uzaqgörənliyi ölkəmizi dünyanın inkişaf etmiş dövlətləri sırasına qoşub. Bu illər ərzində dövlətimizin başçısının respublikamızda iqtisadiyyatın şaxələndirilməsi istiqamətində ardıcıl tapşırıqlar verməsi, mühüm əhəmiyyət kəsb edən tədbirlərin həyata keçirilməsi və qərarlar qəbul edilməsi bu sahənin dayanıqlılığını təmin etməkdədir. Hətta dünya iqtisadiyyatını xeyli zəiflədən sərt koronavirus pandemiyası da bu dayanaqlılığa ciddi təsir göstərə bilmədi. İqtisadiyyatın daha da möhkəmləndirilməsi məqsədilə ölkəmizdə bir-birinin ardınca yaradılan sənaye kompleksləri həm yeni iş yerlərinin açılmasında, həm də istehsal sahələrinin genişləndirilməsində respublikamızın əlaqələrini daha da genişləndirdi və bu da ölkəmizlə əməkdaşlıq edən dövlətlərin sayını getdikcə artırdı.
Prezident İlham Əliyevin 2011-ci il 21 dekabr tarixli Fərmanı ilə Sumqayıt Kimya Sənaye Parkının yaradılması ölkəmizin iqtisadi qüdrətini artırmaqla yanaşı, Sumqayıtı Cənubi Qafqazda ikinci sənaye mərkəzinə çevirdi. Sumqayıt Kimya Sənaye Parkının Azərbaycan iqtisadiyyatında xüsusi yerinin olmasını faktlar da təsdiqləyir. Məsələn, 2019-2020–ci illərdə Sumqayıt Kimya Sənaye Parkında bir milyard manatdan artıq məhsul istehsal edilib. Bunun da təqribən 33 faizi ixrac olunub. Bütövlükdə, Sumqayıt Kimya Sənaye Parkında məhsul istehsalı və ixrac istiqamətində müsbət dinamika mövcuddur. Ümumilikdə, 2019-cu ildə Sumqayıt Kimya Sənaye Parkında 823 milyon manatlıq məhsul istehsal edilib ki, bunun da 276 milyon manatı - təqribən 33 faizi ixrac olunub. 2020-ci ilin ilk 6 ayı ərzində 534 milyon manatlıq məhsul istehsalı ilə Sumqayıt Kimya Sənaye Parkının ölkə sənayesinin qeyri-neft sektorunda (5,7 milyard manat) xüsusi çəkisi 9,3 faiz, 182 milyon manatlıq ixracla ölkə üzrə qeyri-neft sənaye məhsullarının ixracında (910 milyon manat) xüsusi çəkisi 20 faiz təşkil edib. Hazırda parkın ərazisində fəaliyyət göstərən müəssisələrdə altı minə yaxın insanın daimi işlə təmin olunması əhalinin həyat tərzinin daha da yaxşılaşdırılmasında mühüm rol oynayır. Son illər Azərbaycan brendinin dünya bazarlarında daha çox müştəri cəlb etməsi üçün bütün imkanlardan istifadə edilir. Dövlətimizin başçısının qeyri-neft sektorunun inkişafını diqqət mərkəzində saxlamasının əsas məqsədi iqtisadiyyatın davamlı olması, yeni iş yerlərinin açılması, əhalinin gəlirlərinin artması və istehsal olunan məhsulun Azərbaycan brendi kimi dünya bazarına çıxarılmasıdır. Sumqayıt Kimya Sənaye Parkı bu sahədə mühüm rol oynayır. Bununla yanaşı, bu müəssisə iqtisadi siyasətin əsas hədəfi kimi ölkədaxili tələbatın yerli istehsal hesabına təmin olunmasını, habelə Azərbaycan istehsallı məhsulların ixracını reallaşdırmağa xidmət edir. Yaxın günlərdə Azərbaycan Prezidentinin Sumqayıt Kimya Sənaye Parkında Peşə Təhsil Mərkəzinin açılışında iştirakı pandemiya şəraitinə baxmayaraq nəzərdə tutulan layihələrin reallaşdırılmasında növbəti nümunədir. Mərkəzin təhsil proqramı beynəlxalq təcrübə nəzərə alınmaqla hazırlanıb. Tədris prosesinə Sumqayıt Kimya Sənaye Parkının rezidentlərinin mütəxəssisləri cəlb olunub. Tələbələrin ixtisas fənləri üzrə dərslərinin 80 faizi Sumqayıt Kimya Sənaye Parkının müəssisələrində keçiriləcək. Həmçinin praktiki dərslərin təşkili məqsədilə mərkəzdə təlim avadanlıqları stendləri quraşdırılıb. Yeni mərkəzin açılışı bir daha onu göstərir ki, iqtisadi subyektlərin fəaliyyətində peşəkar kadrların hazırlanmasında, müasir, innovativ yanaşmaların öyrənilməsində bu tədris müəssisəsinin xüsusi təsiri olacaq. Bununla yanaşı, yeni iş yerlərinin yaradılması, gənc nəslin xüsusi peşələrə yiyələnərək gələcəkdə ixtisaslarına uyğun özlərinə iş tapması yetişən nəslin həyat tərzinə müsbət təsir göstərəcək.
Sumqayıt Kimya Sənaye Parkının ümumi inkişaf tendensiyası yeniliklərə münasibəti ilə fərqlənir. Elə onun nəzdində açılışı olan Peşə Təhsil Mərkəzini də bu xüsusda fərqləndirmək olar. Çünki ilk dəfədir ki, ölkədəki sənaye parkı ərazisində peşə təhsili müəssisəsi yaradılır. Bu da gənclərimizin qarşılaşdıqları işsizlik probleminin aradan qaldırılmasına öz təsirini göstərəcək. Müasir infrastruktura malik mərkəzdə təhsil alan tələbələrə dövrün tələbinə uyğun bacarıqlar və peşə vərdişləri aşılanacaq. Təlim-tədris prosesində iştirak edəcək mütəxəssislərin elə parkın rezidentlərinin yüksəkixtisaslı işçilərindən ibarət olması da sevindirici haldır. Burada təhsil alan tələbələrin gələcək iş problemləri də demək olar ki, öz həllini tapıb. Onlar Sumqayıt Kimya Sənaye Parkının müəssisələrində təcrübə keçməklə iş yeri əldə etmək imkanı qazanacaqlar.
Dövlətimizin başçısı mərkəzdə iştirakı zamanı Sumqayıt Kimya Sənaye Parkının böyük əhəmiyyətə malik olduğunu bildirdi, xaricdə yaşayan azərbaycanlı iş adamlarına da gəlib doğma Azərbaycana vəsait qoymaları barədə müraciətini xatırlatdı. Dedi ki, Azərbaycan onların Vətənidir və onlar hər zaman Azərbaycanın dəstəyini görürlər, güclü Azərbaycan onların da gücünü artırır. Ona görə azərbaycanlılar müxtəlif ölkələrdə iqtisadiyyat, kommersiya, biznes sahələrində böyük uğurlar əldə ediblər. Onlar da öz Vətəninə vəsait qoymalıdırlar, öz Vətəni ilə daim əlaqə saxlamalıdırlar, öz uşaqlarını Azərbaycan dəyərləri əsasında, milli ruhda tərbiyə etməlidirlər ki, övladları həm Azərbaycan dilini bilsinlər, həm də bizim milli dəyərlərimizi yaşatsınlar. Dövlət başçısı bir daha diqqətə çatdırdı ki, əgər biz bütün bu amilləri düzgün istiqamətə səfərbər edə bilsək, onda Azərbaycana investisiya axını dayanmayacaq. Dövlətimizin də qarşıya qoyduğu prioritet vəzifələrdən biri də budur. Belə mərkəzlərin açılması dünyada yaşanan, pandemiya nəticəsində dərinləşən böhranın aradan qaldırılmasında müsbət rol oynayacaq. Bu, həm də Azərbaycanın postpandemiya dövrünə ən hazırlıqlı ölkələr sırasında olması istiqamətində düşünülmüş addımdır. İri infrastruktur layihələrin reallaşdırılması ölkəmizin yeni inkişaf dinamikasına sahib olmasına da öz təsirini göstərəcək. Prezident İlham Əliyevin “Sumqayıt Kimya Sənaye Parkı” Məhdud Məsuliyyətli Cəmiyyətinin nəzdində Peşə Təhsil Mərkəzinin açılışında iştirakı bir daha təsdiqlədi ki, həm pandemiya, həm də postpandemiya dövründə yerli istehsalın dəstəklənməsi ölkəmiz üçün mühüm əhəmiyyət kəsb edir. O cümlədən koronavirus pandemiyasının tüğyan etdiyi dövrdə də iqtisadi siyasət və uğurlu islahatlar müvəffəqiyyətlə davam etdirilir.