Sumqayıt, 1 iyul, Ətrabə Rzayeva, AZƏRTAC 

Ölkəmizdə gücləndirilmiş xüsusi karantin rejiminin tətbiq edildiyi şəhərlərdən biri də Sumqayıtdır. Şəhər əhalisinin əksəriyyəti vəziyyətin ciddiliyini başa düşür və qoyulan qaydalara riayət edir. Sumqayıt ərazisində sakinlərin qoyulan qaydalara düzgün riayət etmələrinə ciddi nəzarət olunur.

Bunu AZƏRTAC-a Sumqayıt Şəhər Polis İdarəsinin rəisi, polis polkovniki Nəriman İmanov deyib. Gücləndirilmiş xüsusi karantin rejimi ilə əlaqədar idarənin polis əməkdaşları tam səfərbər olunublar. O, Nazirlər Kabineti yanında Operativ Qərargah tərəfindən qəbul edilən xüsusi karantin rejimi qaydalarının təmin olunması məqsədilə ümumilikdə 700 -ə yaxın polis əməkdaşının, Daxili Qoşunların və Fövqəladə Hallar Nazirliyinin nümayəndələrinin şəhərin bütün küçə və prospektlərində sutka ərzində birgə xidmətə cəlb edildiyini qeyd edib. Həmçinin Sumqayıtda 16 dayanaqlı buraxılış postu qurulub. Postlar iki növbədə xidmət aparır. Rəis əməkdaşların, eyni zamanda əhalinin sosial məsafəyə əməl etmələrinə və qoruyucu maskalardan istifadəsinə də nəzarət etdiyini bildirib.

Nəriman İmanov bildirib ki, ölkəmizdə xüsusi karantin rejimi tətbiq olunandan ilk gündən bu günədək Sumqayıt Şəhər Polis İdarəsi tərəfindən şəhər ərazisində keçirilən nəzarət tədbirləri nəticəsində 28 nəfər şəhər sakini inzibati qaydada həbs olunub. Bununla yanaşı, COVID-19 infeksiyasının yayılmasının qarşısının alınması istiqamətində gücləndirilmiş iş rejimində çalışan polis əməkdaşları ötən müddət ərzində 4 min 656 şəxs barəsində inzibati protokol tərtib edərək cərimələyiblər.

“Əməkdaşlarımız pandemiya dövründə təkcə müəyyən olunmuş qaydaların əməl olunmasına nəzarət etmir, həm də əhali arasında maarifləndirici, təbliğat işi də aparır. İnsanlara pandemiya şəraitində davranış qaydaları, vəziyyətin ciddiliyi və karantin rejimi ilə bağlı məlumatlar verir”, - deyə Nəriman İmanov əlavə edib.

Qeyd edək ki, COVID-19 infeksiyasının yayılma sürətinin azaldılması, habelə onun törədə biləcəyi fəsadların minimuma endirilməsi məqsədilə xüsusi karantin rejiminin sərtləşdirilməsini təmin etmək üçün Bakı, Sumqayıt, Gəncə, Lənkəran, Yevlax, Masallı, Cəlilabad şəhərlərinin və Abşeron rayonunun ərazisində 21 iyun saat 00:00-dan 5 iyul saat 06:00-dək ciddiləşdirilmiş karantin rejimi tətbiq edilib.