Sumqayıt, 14 iyul, Ətrabə Rzayeva, AZƏRTAC

Sumqayıt şəhərində cari ilin 6 ayı ərzində ümumi daxili məhsul istehsalı ötən ilin eyni dövrü ilə müqayisədə 20 faiz və ya 157 milyon manat artaraq 933 milyon manat olub. Sənaye müəssisələrində 705 milyon manatlıq məhsul istehsal edilib ki, bu da əvvəlki ilin müvafiq dövrü ilə müqayisədə 123 faiz təşkil edir.

AZƏRTAC xəbər verir ki, bu barədə Hüseyn Ərəblinski adına Sumqayıt Dövlət Dram Teatrının konfrans zalında keçirilən 2018-ci ilin birinci yarısında Sumqayıt şəhərinin sosial-iqtisadi inkişafının yekunlarına və qarşıda duran vəzifələrə həsr olunan hesabat yığıncağında bildirilib.

Hesabat dövrü Sumqayıt şəhəri üçün uğurlu olub deyən Sumqayıt Şəhər İcra Hakimiyyətinin başçısı Zakir Fərəcov qeyd edib ki, əldə olunan nailiyyətlər, iqtisadi göstəricilərin ötən illə müqayisədə artması nəticəsində yerli büdcə gəlirləri proqnoza qarşı 3,2 milyon manat və ya 15,6 faiz artaraq 23,7 milyon manat olmuş, xərc hissəsi isə 20 milyon manat proqnoza qarşı 19 milyon manat və ya 94 faiz icra olunub.

Hesabat məruzəsi ilə çıxış edən Sumqayıt şəhər icra hakimiyyəti başçısının müavini Sahib Quliyev şəhərin iqtisadi inkişafının bütün aspektlərinə toxunaraq mühüm iqtisadi göstəricilərdən olan ticarət dövriyyəsinin ilin ilk 6 ayında 460 milyon manat olduğunu, əvvəlki dövrlə müqayisədə 27 faiz artdığını diqqətə çatdırıb. Bildirilib ki, şəhər icra hakimiyyətinin yaxından köməyi və dəstəyi ilə hesabat dövründə 2095 nəfər işlə təmin edilib, 36 nəfərə işsizlik müavinəti təyin edilib.

Cari ilin əvvəlindən şəhərin küçə və yollarının əsaslı və cari təmiri sahəsində müəyyən işlər görülüb deyən natiq İsmət Qayıbov, Babək, Ərşad Kərimov, Cəfər Cabbarlı, Kamran Hüseynov, Kimyaçılar küçələrində 105 min kvadratmetr, 2, 3, 6, 9-cu mikrorayonların, 41a, 41-ci və s. məhəllələrin ərazilərində 62 min kvadratmetr olmaqla, ümumilikdə 200 min kvadratmetrdən çox asfalt örtüyünün döşəndiyini, 15 min poqonmetr beton bordür dəyişdirildiyini bildirib. Bununla yanaşı 54 kanalizasiya quyusunun qapağı bərpa edilib. Ağa Quliyev küçəsində əsaslı təmir işləri davam etdirilir. Metallurq Yəhya Məmmədov küçəsi sənaye zonasından keçməklə Bakı-Quba yoluna qədər 4,0 kilometr uzunluğunda yenidən qurularaq kompleks şəkildə əsaslı təmir olunur. Şəhərin 9, 10, 11, 12, 13-cü mikrorayonlarında 60 yaşayış binasında dam örtüyünün metal-kirəmitlə əvəz edilməsi işləri başa çatdırılıb, 40 binada isə işlər davam etdirilir.

Diqqətə çatdırılıb ki, Prezident İlham Əliyevin yaxından köməyi sayəsində istismar müddəti ötmüş 105 ədəd lift dəyişdirilərək yenisi ilə əvəz olunub. Şəhərdə çoxmənzilli binaların lift təsərrüfatının maddi-texniki bazasının möhkəmləndirilməsi, istismar müddəti başa çatmış liftlərin yeniləri ilə əvəz olunması, cari təmir işləri daim nəzarətdə saxlanılır. 2, 3, 17, 18-ci mikrorayonlarda, 45-ci məhəllədə 82 ədəd lift online rejimdə işləyən intellektual idarəetmə sisteminə - Mərkəzləşdirilmiş Dispetçer Xidmətinə qoşulub. Hazırda digər liftlərin də bu xidmətinə qoşulması işləri aparılır.

Məruzədə qeyd olunub ki, ölkə rəhbərinin yaxından köməyi sayəsində əhaliyə göstərilən nəqliyyat xidmətinin yaxşılaşdırılması məqsədilə xırda tutumlu, istismara yararsız, ekoloji tələblərə cavab verməyən nəqliyyat vasitələrinin çox hissəsi xətlərdən çıxarılıb, sərnişinlərin rahatlığı üçün Türkiyə istehsalı olan 170 ədəd sərnişin avtobusu gətirilərək marşrut xətlərinə buraxılıb. Müasir tipli yeni dayanacaqların quraşdırılması işləri davam etdirilir. Xidmətin keyfiyyətinin daha da artırılmasına nail olmaq üçün əlavə olaraq 40-a yaxın yeni avtobus şəhərə gətiriləcək.

Hesabat məruzəsi ətrafında çıxışlarda İqtisadiyyat Nazirliyinin regional şöbəsinin müdiri Romal Əhmədov, “Sumqayıt Kimya Sənaye Parkı” MMC-nin direktoru Nazim Talıbov, Yüksək Gərginlikli Elektrik Şəbəkəsinin müdiri Xəndan Əhmədov və başqaları məhsul olduqları sahələrdə görülən işləri ətraflı təhlil edib, perspektiv məsəllərin həlli müzakirə olunub, fəaliyyət istiqamətləri müəyyənləşdirilib.

Yığıncaqda Prezident İlham Əliyevə müraciət qəbul olunub.