CƏMİYYƏT
Sumqayıt və Gəncə Şəhər prokurorluqlarının yeni inzibati binaları istifadəyə verilib
Bakı, 1 oktyabr, AZƏRTAC
1 oktyabr - Azərbaycan Respublikası Prokurorluğu işçilərinin peşə bayramı günü və Milli Prokurorluğun yaradılmasının 100 illik yubileyi ərəfəsində Sumqayıt və Gəncə Şəhər prokurorluqlarının yeni inzibati binaları istifadəyə verilib.
Baş Prokurorluğun mətbuat xidmətindən AZƏRTAC-a bildiriblər ki, Sumqayıt Şəhər Prokurorluğunun yeni inşa olunmuş inzibati binasının açılış mərasimində Azərbaycan Respublikasının baş prokuroru Zakir Qaralov, Sumqayıt Şəhər İcra Hakimiyyətinin başçısı Zakir Fərəcov və hüquq mühafizə orqanlarının əməkdaşları iştirak ediblər.
Əvvəlcə mərasim iştirakçıları yeni inzibati binanın foyesində ulu öndər Heydər Əliyevin büstü önünə gül dəstələri qoyaraq, dahi şəxsiyyətin unudulmaz xatirəsinə dərin hörmət və ehtiramlarını bildiriblər.
Daha sonra baş prokuror Zakir Qaralov binada yaradılan şərait barədə məlumat verib. Bildirilib ki, dörd mərtəbədən ibarət binanın foyesində ulu öndər Heydər Əliyevin və dövlətimizin prokurorluq orqanlarına qayğısını əks etdirən fotoguşə yaradılıb. Müasir standartlara uyğun tikilmiş inzibati bina bütün zəruri avadanlıq, kompüter sistemi, kommunikasiyalar və mühəndis qurğuları ilə təchiz edilib, mebel və digər inventarla təmin olunub. Baş prokuror, həmçinin qeyd edib ki, son illər prokurorluq orqanlarında sağlam iş mühitinin yaradılması üçün ciddi işlər görülüb, dövlətçilik, qanunçuluq prinsipləri önə çəkilib. Nəticədə prokurorluğa ictimai etimad artıb, onun nüfuzu daha da yüksəlib.
Prokurorluq orqanlarının formalaşmasında ümummilli lider Heydər Əliyevin tarixi xidmətlərindən danışan baş prokuror son illər ölkəmizdə hüquq quruculuğu sahəsində həyata keçirilən məqsədyönlü tədbirlərdən söz açıb, demokratik cəmiyyətdə prokurorluğun rolunun artmasının vacibliyini vurğulayıb.
Sumqayıt Şəhər İcra Hakimiyyətinin başçısı Zakir Fərəcov prokurorluq orqanlarının əməkdaşlarını Azərbaycan Prokurorluğunun yaradılmasının 100-cü ildönümü münasibətilə təbrik edib, onlara çətin və şərəfli işlərində uğurlar arzulayıb. O, Azərbaycan dövlətçiliyinin möhkəmləndirilməsində, qanunçuluğun təmin edilməsində, cinayətkarlıqla mübarizədə prokurorluq orqanlarının rolunu yüksək qiymətləndirib.
Prezident İlham Əliyevin prokurorluq orqanlarına göstərdiyi diqqət və qayğıdan söz açan Sumqayıt şəhər prokuroru Sərdar İmanov prokurorluq əməkdaşları üçün tikilən yeni binanın istifadəyə verilməsini onların əməyinə verilən yüksək qiymət kimi dəyərləndirib.
Sonra mərasim iştirakçıları Sumqayıt Şəhər Prokurorluğunun yeni inzibati binasında yaradılan şəraitlə tanış olublar.
Gəncə Şəhər Prokurorluğunun yeni inşa olunmuş inzibati binasının açılış mərasimində baş prokurorun birinci müavini Rüstəm Usubov, Gəncə Şəhər İcra Hakimiyyətinin başçısı Niyazi Bayramov və hüquq mühafizə orqanlarının əməkdaşları, ədliyyə işçiləri iştirak ediblər.
Baş prokurorun birinci müavini Rüstəm Usubov prokurorluq orqanlarının yaradılmasının 100 illik yubileyi münasibətilə şəhər prokurorluğunun əməkdaşlarını təbrik edib. Məlumat verilib ki, Xətai prospekti ilə Vaqif küçəsinin kəsişməsində inşa olunan bina dörd mərtəbədən ibarətdir. Müasir standartlara uyğun tikilmiş inzibati bina bütün zəruri avadanlıq, kompüter sistemi, kommunikasiyalar və mühəndis qurğuları ilə təchiz edilmiş, mebel və digər inventarlarla təmin olunub.
R.Usubov diqqətə çatdırıb ki, Azərbaycan Prokurorluğunun demokratik məzmunda tamamilə yenidən formalaşması, mili maraqlarımıza xidmət edən təsisat kimi hərtərəfli təkmilləşməsi və müasirləşməsi məhz ulu öndər Heydər Əliyevin həyata keçirdiyi dövlətçilik siyasəti və onun gündəlik qayğısı nəticəsində mümkün olub.
Gəncə Şəhər İcra Hakimiyyətinin başçısı Niyazi Bayramov prokurorluğun əməkdaşlarını peşə bayramları münasibətilə təbrik edərək, Azərbaycan dövlətçiliyinin möhkəmləndirilməsində, qanunçuluğun təmin edilməsində, cinayətkarlıqla mübarizədə prokurorluq orqanlarının rolunu yüksək qiymətləndirib.
Hər iki tədbirdə xüsusilə vurğulanıb ki, Sumqayıt və Gəncə Şəhər prokurorluqlarının inzibati binalarının istifadəyə verilməsi çox əlamətdar dövrə - Azərbaycan Respublikasının prokurorluq orqanlarının yaradılmasının 100 illiyinə təsadüf edir.
Tədbirlərdə iştirak edən prokurorluq əməkdaşları Azərbaycan dövlətinin onlara göstərdiyi yüksək etimadı doğruldacaqlarına, qarşıya qoyulan vəzifələri bundan sonra da əzmlə yerinə yetirəcəklərinə inam ifadə ediblər.