REGİONLAR


Sumqayıtda SOCAR-ın bir sıra obyektləri istifadəyə verilib VİDEO

Sumqayıt, 21 sentyabr, Ətrabə Rzayeva, AZƏRTAC

SOCAR-ın prezidenti Rövnəq Abdullayev sentyabrın 21-də Sumqayıt şəhərində olub, şirkətin bir sıra obyektlərinə baş çəkib.

AZƏRTAC xəbər verir ki, Rövnəq Abdullayev əvvəlcə Sumqayıt Kimya Sənaye parkında “SOCAR-Polimer” layihəsi çərçivəsində tikilən polipropilen və yüksək sıxlıqlı polietilen qurğularında aparılan tikinti işlərinin gedişatı ilə tanış olub.

Sonra SOCAR-ın prezidenti “Azərikimya” İB-nin Etilen-polietilen zavoduna gələrək polimer istehsalatında inzibati və məişət binasının açılışında iştirak edib.

BMT-nin İnkişaf Proqramının rezident nümayəndəsi Qulam İsakzainin, “Milli Fəaliyyətlər Planı” (NAMA) layihəsinin meneceri Nazim Məmmədovun və digər qonaqların da iştirak etdiyi açılış mərasimində Etilen-polietilen zavodunun direktoru Oqtay Niftəliyev məlumat verərək bildirib ki, 2016-cı ildən etibarən polietilen istehsalatının inzibati binasının yeni layihə əsasında əsaslı təmirinə başlanılıb. Binanın təmiri, isitmə sisteminin quraşdırılması SOCAR və BMT-nin Bakı ofisinin birgə layihəsi əsasında həyata keçirilib. Fasadın üzlənməsi zamanı enerji resurslarına qənaət olunması məqsədilə xüsusi izolyasiya materiallarından istifadə olunub. Binanın daxili işıqlanmasının təmin olunması üçün gücü 10 Kvt/saat olan günəş panelləri quraşdırılıb. İnzibati binanın istifadəyə verilməsi ilə ümumilikdə 457 işçinin iş və məişət şəraiti müasir tələblərə cavab verəcək şəkildə yaxşılaşdırılıb.

SOCAR-ın prezidenti və qonaqlar daha sonra Etilen-polietilen zavodunun mexaniki emal sahəsinin əsaslı təmir və yenidənqurma işlərindən sonra istismara verilməsi mərasimində iştirak ediblər. Bildirilib ki, qurğu və avadanlıqların fiziki və mənəvi cəhətdən köhnəldiyi, əməkçilərin iş və məişət şəraitinin qənaətbəxş olmaması nəzərə alınaraq, mexaniki emal sahəsində ötən ilin sonlarından başlayaraq əsaslı təmir və yenidənqurma işlərinə start verilib. Aparılan təmir işlərinin həcmi 3700 kvadratmetrdən artıq olub. Bütün mövcud avadanlıqlar yenilənib, sıradan çıxanlar yeniləri ilə əvəzlənib, 67500 kvadratmetr ərazidə abadlıq işləri aparılıb.

Sonra sənaye və məişət tullantı sularının təmizlənməsi üçün tikilmiş yeni qurğu açılıb. Qurğunun tikinti işlərinə ötən ilin noyabr ayında başlanılıb. Ümumi sahəsi 2 hektar ərazini əhatə edən qurğuda “Azərikimya” İB-nin struktur bölmələrində əmələ gələn sənaye və məişət tullantı suları ilə yanaşı, Sumqayıt Kimya Sənaye Parkında bir neçə istehsalçının fəaliyyəti zamanı formalaşacaq tullantı sularının da təmizlənməsi həyata keçiriləcək.

Etilen-polietilen zavodunda aparılan əsaslı təmir və modernizasiya işlərinin gedişi ilə tanışlıq zamanı məlumat verilib ki, avqustun 10-dan başlanılan əsaslı təmir işləri 20 sentyabr - Neftçilərin peşə bayramı günü ərəfəsində uğurla yekunlaşıb. Həmçinin bildirilib ki, Etilen-polietilen zavodunda icrasına start verilmiş və 2019-cu ilə qədər mərhələli şəkildə həyata keçiriləcək layihələr çərçivəsində mövcud texnoloji qurğuların modernləşdirilməsi, yeni qurğuların və yardımçı sahələrin inşası işləri davam etdirilir.

Kimyaçılarla görüşən Rövnəq Abdullayev onları Neftçilərin peşə bayramı günü münasibətilə təbrik edib, işlərində uğurlar arzulayıb.

Sonda SOCAR-ın prezidenti “Azərikimya” İB-nin Etilen-polietilen zavodunun balansın¬da olan Kimyaçı Mədəniyyət Sarayına gələrək, aparılan əsaslı təmir və yenidənqurma işlərinin gedişi ilə tanış olub. Bildirilib ki, mədəniyyət ocağı üç mərtəbədən ibarətdir. 6400 kvadratmetr sahəyə malik birinci mərtəbədə 800 nəfərlik parter və amfiteatrdan ibarət konsert zalı, inzibati və texniki otaqlar, digər mərtəbələrdə rəqs zalı, həmçinin müxtəlif dərnəklərin, tədris və kursların yerləşdiyi otaqlar əsaslı təmir olunub, ərazidə geniş abadlıq-quruculuq işləri aparılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.