Cəlilabad, 13 noyabr, İsmayıl Cəfərli, AZƏRTAC 

Qırx dörd gün davam edən haqq savaşımızda Rəşadətli Ordumuz şücaət və qəhrəmanlıq göstərərək Böyük Qələbə qazandı. Yenilməz ordumuzun ardıcıl zəfər yürüşləri ilə Vətən müharibəsində düşməni dizi üstə çökdürdük. Müqəddəs Qarabağımızın azad olunması xalqımızda sonsuz sevgi və coşqu yaratdı. Bu zəfərlər içərisində 8 noyabr tarixi də təqvimə qızıl hərflərlə yazıldı. 8 may işğal tarixi təqvimdən silindi, əvəzinə 8 noyabr – Şanlı Qələbə Günü həkk olundu, Qarabağın üzük qaşı hesab etdiyimiz Şuşa şəhəri düşmən əsarətindən qurtuldu.

AZƏRTAC xəbər verir ki, 28 ildir Cəlilabad şəhərində məskunlaşan Şuşa sakinləri bu xəbəri sevinc göz yaşları ilə qarşılayıblar. Bir-birinə sarılıb uşaq tək hıçqırır, bu qələbəni bütün türk dünyasının zəfəri hesab edirlər.

Şuşa sakini 90 yaşlı Aydın Babayev cənnət guşələri xatırlayaraq deyib ki, Qarabağın bütün yolları Şuşaya, Cıdır düzünə aparır: “O xəbəri ekranlardan izləməyimizin özü bir tarixi andır. Ali Baş Komandanımızın Şuşanın azad olunması xəbərini verdiyi an hansı hisslər keçirdiyimizə Allah şahiddir. Sevincimdən ağladım. Bizim böyüklərimiz bu arzu ilə dünyadan köçdülər. Şükürlər olsun ki, Şuşamızı azad görmək bizə nəsib oldu. Bir arzum var ki, Cəlilabaddan Şuşaya piyada gedim. İnşallah onu da həyata keçirəcəyəm”.

Ailənin digər bir üzvü Fəxrəddin Babayev isə bildirib ki, dövlətimizin başçısı adını tarixə qızıl hərflərlə yazdı. “Bizim sanki ümidlərimiz də ölmüşdü. 1992-ci ildə Cəlilabad rayonuna gələndə hər gecə ağlayırdıq. Həmin illərdə ölkədə vəziyyət çox qarışıq idi. Deyirdik, görəsən, biz yenə o torpağımıza qayıda biləcəyik? İnsan öz evini məcburən atıb necə gələ bilər axı? Allahın ədalətinə şükür! Tarix təkrarlandı. İndi biz onları öz dədə-baba torpaqlarımızdan qovduq. Mənim sevincimin həddi-hüdudu yoxdur. Biz bu sevincə görə ailəmiz adından Azərbaycanın tarixini yazan Prezidentimizə təşəkkür edirik”, - deyə o vurğulayıb.

Şuşa sakini Çimnaz Babayeva isə doğma şəhərinin azad olunması xəbərini eşitdiyi anı belə xatırlayıb: “Çörək bişirirdim, oğlum zəng etdi ki, “anacan Prezidentimiz canlı efirə çıxacaq”. Sonra Bakıdakı qızım zəng etdi, ağlaya-ağlaya dedi ki, gözlərimiz aydın olsun. Dedim, nə olub? Bildirdi ki, Şuşa azad edilib. Sevincimdən nə edəcəyimi bilmədim...”

Çimnaz xanımın qardaşı 1992-ci il yanvarın 18-də Daşaltı kəndi uğrunda gedən döyüşlərdə şəhid olub. O, Şuşaya qayıdanda ən birinci qardaşının qəbrini ziyarət edəcəyini söyləyib: “Prezidentimizə minnətdaram. Qardaşımın qisası alındı. Ordumuzun qarşısında baş əyirəm. Allah İlham Əliyevin başını uca etsin. Allah qalib əsgərlərimizi qorusun”.

Şuşa sakini Xasay Əliyev də bu günlərdə sevinc göz yaşlarına qərb olub. Məcburi köçkün adının üzərindən götürülməsinin sevincini yaşayır. “Biz azad olunan Şuşanın sakinləriyik. Artıq köçkün deyilik. İlham Əliyev torpağımızı azad etdi. Prezidentimizin polad iradəsi sayəsində qalib gəldik. Ali Baş Komandanımız Şuşanın azad edildiyini deyəndə gözlərinin dolduğunu hiss elədim. Sevincdən biz də ağladıq. Var olsun Prezidentimiz! Paşinyana dərs verdi. Şərəfsiz indi gedib xarabasında rəqs eləsin”, - deyə həmsöhbətimiz fikrini tamamlayıb.

Bağdagül Əliyevanın da arzusu ürəyində qalmadı. Şuşanın İmanqulular kəndinin sakini olan həmsöhbətimiz tez-tez doğma yurdundakı günlərlə bağlı xatirələrini yada salır. “O xatirələrimi nəvələrimə danışırdım. Şükür olsun bu günə, Şuşaya gedib qurbanlar kəsəcəyəm. Allah Prezidentimizə cansağlığı versin. Üzərimizdən köçkünlük adını götürdü. Allah Ordumuzu, Prezidentimizi qorusun!”