REGİONLAR


Suvarma infrastrukturunun yaxşılaşdırılması bitkiçilik və heyvandarlıq sahələrinin inkişafına yol açır

Prezidentin Sərəncamı Hacıqabul, Şamaxı və Zərdab rayonlarında 20 min hektar torpaq sahəsinə yeni həyat verəcək

Bakı, 16 sentyabr, AZƏRTAC

Suvarma infrastrukturunun yaxşılaşdırılması bitkiçilik və heyvandarlıq sahələrinin inkişafı, ərzaq məhsulları ilə özünü təminetmə səviyyəsinin yüksəlməsi istiqamətində mühüm addımdır.

Bu fikri AZƏRTAC-a müsahibəsində Azərbaycan Dövlət İqtisad Universitetinin (UNEC) İqtisadiyyat kafedrasının müdiri, iqtisad elmləri doktoru Müslüm İbrahimov deyib.

Prezident İlham Əliyevin sentyabrın 12-də imzaladığı “Hacıqabul, Şamaxı və Zərdab rayonlarında ərazilərin suvarma suyu ilə təminatı layihələrinin davam etdirilməsi ilə bağlı əlavə tədbirlər haqqında” Sərəncamı yüksək qiymətləndirən mütəxəssis bildirib ki, bu rayonlarda suvarma suyu ilə təminat üçün başlanılmış layihələrin davam etdirilməsinə dövlət dəstəyini təmin etmək məqsədilə “Azərsu” Açıq Səhmdar Cəmiyyətinə 8 milyon manat ayrılması olduqca təqdirəlayiqdir. Bu sahədə həyata keçiriləcək tədbirlər bütövlükdə kənd təsərrüfatı məhsullarının artımına, eyni zamanda, ərzaq bazarında qiymətlərin sabitləşməsinə də müsbət təsir göstərəcək.

Ölkə ərazisinin təxminən 55 faizi kənd təsərrüfatı üçün yararlı torpaqlardır

Müslüm İbrahimov qeyd edib ki, ölkə ərazisinin təxminən 55 faizi kənd təsərrüfatı üçün yararlı torpaqlardır. Bunun 30 faizini (1432,7 min hektar) suvarılan torpaqlar təşkil edir. Suvarılan torpaqların 67 faizi əkin sahələrindən, 70 faizi isə çoxillik bitkilərdən ibarətdir. Azərbaycanın kənd təsərrüfatına yararlı torpaqlarının təxminən 30 faizə yaxını elə regionlarda yerləşir ki, orada daim külək eroziyası səbəbindən torpaqların deqradasiyası baş verir. Digər problem quraqlıqdır. Bu, kənd təsərrüfatı məhsullarının istehsalına mənfi təsir edir, torpağın münbitliyini aşağı salır.

Azərbaycanda istehsal olunan kənd təsərrüfatı məhsullarının 90-95 faizi suvarılan torpaqların payına düşür

Suvarmanın kənd təsərrüfatı məhsullarının istehsalının artırılmasında önəmli rol oynadığını vurğulayan M.İbrahimov deyib: “Azərbaycanda istehsal olunan kənd təsərrüfatı məhsullarının 90-95 faizi suvarılan torpaqların payına düşür. Qeyd etmək yerinə düşər ki, 1 ton taxıl istehsal etmək üçün təxminən 2000 ton su tələb olunur. Əgər bitkilərin vegetasiya dövründə su çatışmazlığı yaranarsa, məhsuldarlıq da aşağı düşəcək. Bu, eyni zamanda, məhsuldarlığın artması üçün istifadə olunan digər tədbirlərin (gübrə, texnikadan istifadə, növbəli əkin sistemi və s.) təsirini də minimuma endirir. Ona görə də Prezident İlham Əliyevin bu Sərəncamı kənd təsərrüfatının inkişafı, habelə əhalinin ərzaqla təminatı baxımından böyük əhəmiyyətə malikdir”.

Hacıqabul, Şamaxı və Zərdab su ehtiyatlarının çatışmazlığı baxımından riskli kənd təsərrüfatı istehsalı zonasına daxildir

Mütəxəssis qeyd edib ki, hər üç rayon su ehtiyatlarının çatışmazlığı baxımından riskli kənd təsərrüfatı istehsalı zonasına daxildir. Üstəlik külək eroziyası torpağın strukturuna mənfi təsir edir. Bu problemin həlli, ilk növbədə, çoxillik bitkilərin intensiv becərilməsindən asılıdır. Məsələn, çoxillik bitkilərin (üzümlüklər, tingliklər, çay plantasiyaları, yem çuğunduru, otlaq və biçənəklər) kök sistemləri torpaq strukturunun eroziyası prosesini dayandıra bilər. Təbii ki, bunun üçün sabit suvarma prosesi olmalıdır. Prezidentin müvafiq Sərəncamı Hacıqabul, Şamaxı və Zərdab rayonlarında 20 min hektar torpaq sahəsinə yeni həyat verəcək.

Suvarma suyu ilə təminatın yaxşılaşdırılması sosial-iqtisadi inkişafa müsbət təsir göstərəcək

“Prezidentin Sərəncamına əsasən həyata keçiriləcək tədbirlər nəticəsində Hacıqabul, Şamaxı və Zərdabda suvarma suyu ilə təminatın yaxşılaşdırılması bütövlükdə kənd təsərrüfatının inkişafına və ərzaq bazarının sabitləşməsinə müsbət təsir göstərəcək. Belə ki, suvarma sistemi təkcə bitkiçilik sahəsinə yox, həm də heyvandarlığın inkişafına müsbət təsir edir. Çoxillik yem bitkilərinin yüksək məhsuldarlığını nəzərə alaraq, artıq yazın ilk günlərində biçin işlərini aparmaq olar. Bundan başqa, il ərzində suvarma işlərinin aparılması şərti ilə 2-3 dəfə biçin də mümkündür. Bütün bunlar mal-qaranın məhsuldarlığına müsbət təsir etməklə yanaşı, süd və süd, ət və ət məhsullarının qiymət artımının da qarşısını ala bilər. Təbii ki, bütün bunlar nəticə etibarilə rayonların əsas göstəricilərinin yaxşılaşmasına gətirib çıxaracaq. Bu baxımdan görüləcək işlər həmin rayonların sosial-iqtisadi inkişafına əhəmiyyətli dərəcədə təsir göstərəcək”, - deyə iqtisad elmləri doktoru bildirib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.