CƏMİYYƏT


TƏBİB-in İdarə Heyətinin sədri elmi-tədqiqat institutlarının rəhbərləri ilə görüşüb

Bakı, 20 fevral, AZƏRTAC

Tibbi Ərazi Bölmələrini İdarəetmə Birliyinin (TƏBİB) İdarə Heyətinin sədri Ramin Bayramlı elmi-tədqiqat institutlarının rəhbərləri ilə görüşüb.

TƏBİB-in mətbuat xidmətindən AZƏRTAC-a bildirilib ki, tədbirdə R.Bayramlı qurumun yaranmasının məqsədi, vəzifə və fəaliyyət istiqamətləri barədə iştirakçılara məlumat verib.

Qurumun yaranmasını ölkədə aparılan islahatların davamı kimi qiymətləndirən İdarə Heyətinin sədri TƏBİB-in Nizamnaməsi və struktur bölmələri barədə geniş məlumat verib. O qeyd edib ki, elmi-tədqiqat institutları ilə işbirliyi qarşıda duran əsas prioritet məsələlərdəndir: “İlk növbədə, müəssisələrdə innovativ, çevik və elmə açıq olan struktur qurulmalıdır. Səhiyyə müəssisələrinin idarə edilməsində optimallaşdırma işlərinin həyata keçirilməsi və hər iki istiqamətdə - müalicə və elm istiqamətlərində inkişafa nail olmaq üçün beynəlxalq təcrübədən istifadə edilməlidir. Eyni zamanda, elmi fəaliyyətlə və müalicə ilə məşğul olan kadrların iş fəaliyyətlərinin optimallaşdırılması istiqamətində mühüm işlərin görülməsinə ehtiyac var”.

R.Bayramlı İcbari Tibbi Sığorta üzrə Dövlət Agentliyi tərəfindən “Azərbaycan Respublikasının inzibati ərazi vahidləri üzrə tibbi ərazi bölmələri”nin təsdiq edildiyini və tibb müəssisələrinin resurslarından və kadr potensialından səmərəli istifadə, fəaliyyətlərinin optimallaşdırılması və əhalinin müxtəlif növ tibbi yardıma əlçatanlığının təmin edilməsinin əsas məqsəd olduğunu vurğulayıb.

Daha sonra hər bir müəssisə rəhbəri təmsil etdiyi institutda cari problemlər və mövcud çatışmazlıqlar barədə məlumat verib və iclas iştirakçıları ilə problemlərin həlli yolları müzakirə edilib. TƏBİB tərəfindən işlənib hazırlanan layihələr iclas iştirakçılarının diqqətinə çatdırılıb, ölkədə tibbi kadr potensialının formalaşdırılması, rezidentura təhsilinin təkmilləşdirilməsi və müxtəlif yeni ixtisasların yaradılmasının vacibliyi nəzərə çatdırılıb.

İclas ümumi müzakirələrlə davam etdirilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.