MƏDƏNİYYƏT
TAHİR SALAHOV - İLİN ADAMI
Bakı, 6 mart (AZƏRTAC). Martın 6-da məşhur fırça ustası, Azərbaycanın xalq rəssamı, bu yaxınlarda 80 illik yubileyini qeyd etmiş Tahir Salahov ANS Şirkətlər Qrupunun və Milli qəhrəman Çingiz Mustafayev Fondunun təsis etdiyi “İlin adamı” xüsusi diplomuna və mükafata layiq görülmüşdür.
ANS Şirkətlər Qrupunun prezidenti Vahid Mustafayev demişdir ki, dünya şöhrətli rəssam harada olursa-olsun doğma Vətənini böyük məhəbbətlə tərənnüm edir. Tahir Salahovun planetin ən məşhur muzeylərində nümayiş etdirilən əsərləri tamaşaçıları heyran qoyur. Təntənəli mərasimdə bildirilmişdir ki, mükafat almaq asandır, ömrünü fədakarcasına Vətənə xidmətə, onun tarixi və mədəni dəyərlərinin təbliğinə həsr etmək isə çətin. Tahir Salahov bunun öhdəsindən uğurla gəlmiş, bütün ömrü boyu Vətəni, xalqı üçün yaşamışdır.
Tahir Salahov təntənəli mərasimdə demişdir: “İlin adamı” adına layiq görülmək çox xoşdur. Çox böyük hisslər keçirirəm. Mükafat qəlbimə məlhəmdir. Mən özümü təkcə ilin deyil, zəmanənin adamı hiss edirəm. Belə anlarda mənə elə gəlir ki, görkəmli şəxsiyyətlərimiz, yaradıcılığı insanların qəlblərini riqqətə gətirən – Qara Qarayev, Fikrət Əmirov, İmran Qasımov və bir çox başqaları da mənim yanımdadır. Onların ruhu bizimlədir”.
Rəssam Çingiz Mustafayev kimi mərd oğul böyütmüş Mustafayevlər ailəsinə təşəkkürünü bildirmişdir.
Tahir Salahovun mükafatları çoxdur. Ancaq onun üçün ən əziz mükafat Azərbaycan Respublikasının ali ordeni – “Heydər Əliyev” ordenidir. Bu mükafatı ona yubilyarın yaradıcılığını yüksək qiymətləndirən Prezident İlham Əliyev 80 illik yubileyi münasibətilə təqdim etmişdir.
Budur, Azərbaycan mədəniyyətini, azərbaycançılıq ideyalarını dünyada layiqincə təmsil edən soydaşımız daha bir mükafata “İlin adamı” mükafatına layiq görülmüşdür.
Tahir Salahovdan əvvəl bu mükafatı ölkəmizin ən dəyərli insanları – Azərbaycan xalqının ümummilli lideri Heydər Əliyev (2002, 2003), Heydər Əliyev Fondunun prezidenti, Milli Məclisin deputatı, YUNESKO-nun və İSESKO-nun xoşməramlı səfiri, Azərbaycanın birinci xanımı Mehriban Əliyeva (2005), Qafqaz Müsəlmanları İdarəsinin sədri Allahşükür Paşazadə (2006), Prezident İlham Əliyev (2007) almışlar.
Mükafatlandırma mərasimində Tahir Salahova xatirə hədiyyəsi təqdim olunmuşdur.
Mərasimdə diplomatlar, o cümlədən Rusiyanın ölkəmizdəki səfiri V.İstratov, yaradıcı ziyalıların nümayəndələri, paytaxtımızın qonaqları iştirak etmişlər.
######