ELM VƏ TƏHSİL
TƏHSİL NAZİRLİYİNİN NÜMAYƏNDƏ HEYƏTİ MOSKVADA KEÇİRİLƏN BEYNƏLXALQ MÜŞAVİRƏDƏ İŞTİRAK ETMİŞDİR
Moskva meri Yuri Lujkovun müşavirə iştirakçılarına müraciəti ilə başlanan açılış mərasimində Azərbaycan Respublikası təhsil nazirinin müavini İradə Hüseynova çıxış etmişdir. Ümummilli liderimiz Heydər Əliyevin milli-mədəni siyasəti, təhsil konsepsiyası, onun rəhbərliyi ilə hazırlanaraq təsdiq olunmuş təhsil islahatları haqqında dövlət sənədləri, rus dili və mədəniyyətinə göstərdiyi qayğı barədə verilən geniş məlumat dərin maraq və minnətdarlıqla qarşılanmışdır. Heydər Əliyev siyasi kursunun layiqli davamçısı, Azərbaycan Prezidenti İlham Əliyevin Rusiya ilə Azərbaycan arasında əlaqələrin dinamik inkişafı üzrə səmərəli fəaliyyətinin ölkələrimizin elm, təhsil, mədəniyyət sahəsində əlaqələrinin genişlənməsinə, o cümlədən respublikamızda rus dilinin tədrisinə müsbət təsir göstərdiyi xüsusi qeyd olunmuşdur.
Müşavirə iştirakçılarına tədris rus dilində olan məktəblər, rus dilində dərslik və dərs vəsaitlərinin nəşri, ölkəmizdəki rus diasporunun mənəvi tələblərinin dolğun ödənilməsi, ali təhsil müəssisələrinin, xüsusən Bakı Slavyan Universitetinin rusistika sahəsində nailiyyətləri haqqında ətraflı məlumat verilmiş, ikitərəfli əməkdaşlığın inkişafına dair bir sıra konkret təkliflər irəli sürülmüşdür. Nazir müavini İ.Hüseynova səfər zamanı Azərbaycanın Təhsil Nazirliyi və Moskva hökumətinin təhsil departamenti arasında ikitərəfli əməkdaşlıq haqqında protokol imzalamışdır. O, Moskva şəhərindəki 157 nömrəli Azərbaycan məktəbində, 1576 nömrəli gimnaziyada şagird və müəllim kollektivi ilə maraqlı görüşlər keçirmişdir. Azərbaycan məktəbinin fəaliyyəti ilə tanışlıqdan sonra belə müəssisələrin sayının artırılmasının zəruriliyini vurğulayan İradə Hüseynova səfər proqramı çərçivəsində Moskvanın Mədəniyyət mərkəzi ilə də tanış olmuşdur.
Nazir müavininin apardığı danışıqların nəticəsi olaraq Moskva və Bakı məktəbləri şagirdlərinin təhsil və istirahətinin təşkili, iki ölkədə yay linqvistik məktəblərinin yaradılması, məktəblərin pedaqoji və şagird kollektivləri arasında əlaqələr qurulması, Azərbaycan və rus xalqlarının dil, mədəniyyət, ənənələrinin öyrənilməsi məqsədi ilə şagird mübadiləsi haqqında rəsmi razılıq əldə edilmişdir. Eyni zamanda «Üçüncü minillikdə sülh mədəniyyəti və sivilizasiyalar arasında dialoq» layihəsi üzrə birgə fəaliyyət, idarəetmə və pedaqoji kadrların təcrübə mübadiləsi və ixtisasartırması, elmi-metodik, pedaqoji, bədii ədəbiyyat və informasiya-kommunikasiya texnologiyalarının mübadiləsi, metodik proqram və materialların müştərək hazırlanması və istifadəsi, birgə mədəni tədbirlərin keçirilməsi, qardaşlaşmış məktəblərin geniş şəbəkəsinin yaradılması, onların iş təcrübəsinin yayılması və digər məsələlər haqqında qərarlar qəbul edilmişdir.