İQTİSADİYYAT


“TEKNOFEST” çərçivəsində “ROBOTEXNİKA” müsabiqəsi elan olunub

Bakı, 3 fevral, AZƏRTAC

“TEKNOFEST” Aerokosmik və Texnologiyalar Festivalına hazırlıq çərçivəsində daha bir maraqlı müsabiqə elan olunub.

Rəqəmsal İnkişaf və Nəqliyyat Nazirliyindən AZƏRTAC-a bildirilib ki, Bakıda keçiriləcək festivalın ən maraqlı müsabiqələrindən biri də həm məktəblilər, həm tələbələr və həm də gənc startaplar üçün nəzərdə tutulmuş “ROBOTEXNİKA”dır. Müsabiqə insanlara və müəssisələrə gündəlik fəaliyyətdə, istehsalatda, hətta kosmosda faydalı olacaq hər hansı bir işin müəyyən hissəsini icra edə bilən, mürəkkəb mexanizmləri sadələşdirən, hətta əyləncə funksiyasını yerinə yetirən robotların dizayn edilməsini dəstəkləyir.

Qeyd edək ki, robotlara müxtəlif növ mexaniki və ya pnevmatik əməliyyatları yerinə yetirmək üçün dizayn edilmiş, həmçinin materialın kinetik xüsusiyyətlərinə əsaslanan, öncədən proqramlaşdırılmış tapşırıqlar nəzdində fəaliyyət göstərən və ya süni intellekt tərəfindən idarə olunan, müxtəlif bort sensorları ilə yönləndirilən istənilən avtomatik qurğular daxildir.

“ROBOTEXNİKA” yarışması çərçivəsində istedadlı məktəblilər və tələbələrimiz öz intellektual ideya və məhsullarını həm festivalın ziyarətçilərinə, həm də yerli və xarici investorlara təqdim etmək imkanı qazanacaqlar. Müsabiqə iştirakçıları şəhadətnamə ilə təqdir olunmaqla yanaşı, həmçinin mükafat fondu uğrunda da öz güclərini sınaya biləcəklər.

Yuxarı sinif şagirdləri (7-11-ci siniflər) A kateqoriyasına daxil olmaqla onlar üçün mükafat fondu I yer 4 min manat, II yer 2 min manat, III yer min manat təşkil edəcək. Azərbaycanda təhsil alan universitet tələbələri B kateqoriyasında I yer 6 min manat, II yer 4 min manat, III yer 2 min manatdan ibarət mükafat fondu uğrunda mübarizəyə qoşula biləcəklər.

Müsabiqədə iştirak etmək üçün son müraciət tarixi 2022-ci il fevralın 17-dir.

Qeydiyyat üçün elektron keçid: https://teknofest.az/az/competitions/.

Məlumat üçün bildiririk ki, Rəqəmsal İnkişaf və Nəqliyyat Nazirliyinin təşkilatçılığı ilə bu ilin mayın 26–29-da Bakıda ilk dəfə olaraq “TEKNOFEST” keçiriləcək. Beynəlxalq brendə çevrilən “TEKNOFEST”in keçirilməsində əsas məqsəd aviasiya, kosmik sənaye, rəqəmsal iqtisadiyyat, təhsil və sair kimi sahələrin gənclər arasında təbliği, bu sahələrdə sahibkarlığın təşviq edilməsi, festival çərçivəsində təşkil olunan yarışlar vasitəsilə gənc mühəndislərin bilik və bacarıqlarının üzə çıxarılması, eləcə də milli texnologiyaların geniş ictimaiyyətə təqdim olunmasıdır.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.