CƏMİYYƏT
Tanınmış həkim riskli hamiləlik nəticəsində doğulan körpələrə böyük sürpriz hazırlayıb VİDEO
Bakı, 28 dekabr, AZƏRTAC
Yüksək riskli hamiləlik və doğum üzrə mütəxəssis, cərrah mama-ginekoloq Səbinə Mirzəyeva riskli hamiləlik yaşamış analar və onların körpələri ilə görüşüb. “Azərbaycan” kinoteatrında baş tutan tədbirdə Səbinə Mirzəyevanın nəzarəti altında dünyaya gələn 100-dən çox müxtəlif yaşlı körpələr və onların valideynləri iştirak ediblər.
AZƏRTAC xəbər verir ki, qarşıdan gələn Yeni il və Dünya Azərbaycanlılarının Həmrəyliyi Günü münasibətilə təşkil olunan görüşdə xüsusilə riskli hamiləlik keçirmiş qadınlar iştirak edib.
Qonaqları salamlayan həkim bildirib: “Hər bir xanımın mənim üçün xüsusi yeri var. Bu 17 illik fəaliyyətim dövründə xanımlara bağlılığım bir az da artıb. Bu illər ərzində biz daha da yaxın olmuşuq, daha da doğmalaşmışıq. İllərlə ana olmaq arzusu ilə yaşayan, sonunda bu arzusunu reallaşdırmaq imkanı əldə edən, ana olacağını öyrənən və hamiləlik müddətində müxtəlif çətin vəziyyətlər, gərgin risklərlə üzləşən xanımlarımız, sizin mənim həyatımdakı, xatirələrimdəki və öz dünyamdakı yeriniz və rolunuz tam fərqlidir. Çünki mən sizinlə mən olmuşam. Çünki məni həkim Səbinə Mirzəyeva edən siz olmusunuz. Çünki siz mənim tibdəki imzamsınız. Siz mənə, mənsə sizə arxalanaraq, bütün problemlərə birgə sinə gərmişik, istənilən maneələri birgə dəf etmişik və bütün riskli vəziyyətlərdən birgə üzüağ çıxmışıq. Siz bu gün ona görə xoşbəxtsiniz ki, suallarla, şübhələrlə dolu günlər artıq geridə qalıb və sağlam körpələrinizə qovuşmusunuz. Mən isə ona görə xoşbəxtəm ki, bu gün siz hamınız yenə də mənim yanımdasınız”.
Mama-ginekoloq pasiyenti olan əksər qadınların yalnız ana olana qədər deyil, hətta ana olduqdan illər sonra belə onunla isti münasibəti qoruduqlarına görə özünü xoşbəxt həkim adlandıraraq, hamının bayramını təbrik edib: “Əgər bu isti münasibətlərimizin təməlini atmaqda cəhd edən tərəflərdən biri mən olmuşamsa, digəri də siz olmusunuz. Buna görə sizə sonsuz təşəkkürlərimi bildirirəm. Sizin çoxluğunuz, mənim vaxtımın azlığı səbəbilə illərin necə keçdiyini hiss etməyə macal tapmasam da, bir filmə, bir kitaba, bir ömürə sığmayacaq illəri geridə qoyduğumuzun fərqindəyəm. Şən və pozitiv, xoş və mənalı, unudulmaz və dəyərli anlarla yadda qalan 2017-ci ilin bizimlə vidalaşmasına, yarım qalan arzularımızın davamını görmək istədiyimiz, övladlarımızın uğur yüksəkliklərinin şahidi olacağımız 2018-ci ilin qapımızı döyməsinə sayılı günlər qalıb. Bu üzdən üzümüzə gələn yeni ilə yüksək əhval-ruhiyyə və enerji dolu pozitiv düşüncələrlə qədəm qoymağınızı arzu edirəm. Övladlarınızla bağlı qurduğunuz bütün planlar və ürəyinizdə götür-qoy etdiyiniz ən böyük xəyallar belə gerçəkliyə qovuşsun”.
S.Mirzəyevanın zalda böyük alqış sədaları altında qarşılanan çıxışından sonra qonaqlar üçün təşkil olunmuş maraqlı şou-proqram başlayıb, sonra isə çizgi filmi nümayiş olunub. Mərasimdə iştirak edən qonaqlar Səbinə Mirzəyevanın 2017-ci ildə göstərdiyi fəaliyyəti ilə bağlı statistik məlumatları əks etdirən xüsusi fotoafişalarla tanış olublar. Körpələrin və onların valideynlərinin hər biri maraqlı hədiyyələr və unudulmaz xatirələrlə zalı tərk ediblər.
Xatırladaq ki, yüksək riskli hamiləlik və doğum üzrə mütəxəssis, cərrah mama-ginekoloq Səbinə Mirzəyeva hazırda “Baku Medical Plaza” klinikasında çalışır.
O, 2012-ci ildə Almaniyanın Hamburq şəhərində yerləşən Eppendorf Universitetinin mama-ginekologiya kafedrasında “Yüksək riskli hamiləlik və doğuş” üzrə təhsil proqramına yiyələnib.
Ağrısız doğuş, qeysəriyyə kəsiyi, histeroskopik, laparoskopik, ginekoloji estetik və uroginekoloji əməliyyatlar üzrə peşəkar həkim kimi fəaliyyət göstərən Səbinə Mirzəyeva illərlə ana olmaq arzusu ilə yaşayan qadınların müalicəsi ilə də məşğuldur.