Bakı, 17 fevral, AZƏRTAC

Milli Azərbaycan Tarixi Muzeyində Mezolit dövrünə aid çoxsaylı ox ucluqları saxlanılır.

Muzeydən AZƏRTAC-a bildirilib ki, bu nümunələr arasında çaxmaqdaşından hazırlanmış ox ucluğu xüsusi yer tutur. Ox ucluğu 1956-1958-ci illərdə məşhur arxeoloq Məmmədəli Hüseynovun rəhbərliyi ilə arxeoloji qazıntı aparılan Damcılı mağarasından tapılıb. Qırmızımtıl-narıncı rəngdə olan ucluğun eni 1, uzunluğu 2 santimetrdir. Bu düşərgədə aparılmış arxeoloji qazıntılar zamanı 2 mindən çox heyvan sümüklərinin tapılması qədim sakinlərin həyatında ovçuluğun başlıca məşğuliyyətlərdən biri olması fikrini irəli sürməyə əsas verir.

Azərbaycanda Mezolit dövrünün izlərinə Qazax rayonunda Avey dağında və Damcılı mağarasında və Qobustanda Böyükdaş və Kiçikdaş dağları ərazisindəki düşərgələrdə rast gəlinib. Bu məkanlardan çaxmaq və dəvəgözü daşlarından hazırlanmış mikrolitlər, ox ucları və sair, eləcə də əhliləşdirilmiş heyvan sümükləri tapılıb. Mezolit dövründə mənimsəmə təsərrüfatının varlığını təsdiq edən arxeoloji tapıntılardan biri də Milli Azərbaycan Tarixi Muzeyinin zəngin kolleksiyasındakı çoxsaylı ox ucluqlarıdır.