Tbilisi, 10 fevral, AZƏRTAC

Gürcüstandakı səfirliyimizin və Gürcüstanda Azərbaycanlı İş Adamları Birliyinin (AZEBİ) birgə təşkilatçılığı ilə AZEBİ idarə heyəti və üzvləri və bu ölkədə fəaliyyət göstərən Azərbaycan kapitallı şirkətlərin iştirakı ilə videokonfrans formatında görüş keçirilib.

AZƏRTAC xəbər verir ki, görüşdə Azərbaycanın Gürcüstandakı səfiri Faiq Quliyev və Batumidəki baş konsulu Pərviz İsmayılzadə, Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının (ASK) prezidenti Məmməd Musayev, “SOCAR Energy Georgia” şirkətinin baş direktoru Mahir Məmmədov, AZEBİ idarə heyətinin sədri Nəriman Qurbanov və təşkilatın üzvləri iştirak ediblər. Konfransa həmçinin 70-ə yaxın azərbaycanlı iş adamı qatılıb.

Tədbir çərçivəsində, ASK ilə AZEBİ arasında əməkdaşlığa dair Anlaşma Memorandumu imzalanıb.

Tədbirdə AZEBİ tərəfindən 2020-ci il üzrə görülmüş işlər barədə hesabat və 2021-ci il üzrə tədbirlər planı, eləcə də təşkilatın fəaliyyətinin təkmilləşdirilməsi ilə bağlı müzakirələr aparılıb.

AZEBİ-nin idarə heyətinin sədri Nəriman Qurbanov çıxış edərək, təşkilatın fəaliyyəti barədə ətraflı məlumat verib.

Bildirilib ki, 2009-cu ildə Gürcüstanda təsis edilmiş AZEBİ-nin əsas məqsədi Gürcüstan ilə Azərbaycan arasında ticari-iqtisadi əlaqələri gücləndirmək, bu ölkədə yaşayan azərbaycanlıların sahibkarlığını və qarşılıqlı sərmayə layihələrini təşviq etmək, azərbaycanlı iş adamlarının maraqlarını müdafiə etməkdir.

Səfir Faiq Quliyev çıxış edərək, Azərbaycan ilə Gürcüstan arasında iqtisadi münasibətlər, həyata keçirilmiş iri infrastruktur layihələri barədə məlumat verib, COVID-19 pandemiyası dövründə ölkələrimiz arasında həmrəylik və əməkdaşlıq əlaqələrindən bəhs edib.

Səfir, ümummilli lider Heydər Əliyevin Azərbaycan ilə Gürcüstan arasında əlaqələrin strateji tərəfdaşlıq səviyyəsinə çatmasında əvəzsiz xidmətlərindən danışıb, Ulu Öndərin siyasi kursunun Prezident İlham Əliyev tərəfindən uğurla davam etdirildiyini və Gürcüstan ilə münasibətlərə xüsusi diqqət yetirildiyini vurğulayıb.

Bildirib ki, Azərbaycan Prezidenti, Müzəffər Ali Baş Komandan İlham Əliyevin rəhbərliyi altında Vətən müharibəsində qüdrətli Azərbaycan Ordusu tərəfindən qazanılan şanlı və tarixi qələbədən sonra regionda əməkdaşlıq üçün yeni imkanların yaranıb. O, 44 gün davam edən Vətən müharibəsi zamanı Gürcüstandakı şirkətlər və soydaşlarımız tərəfindən Azərbaycan Silahlı Qüvvələrinə göstərilən dəstəyin həmrəyliyimizin bariz nümunəsi olduğunu qeyd edib.

Diplomat Azərbaycanın Gürcüstanın ən böyük ticarət tərəfdaşı olmaqla, bu ölkəyə ən çox xarici sərmayə yatıran ölkələrdən biri və Azərbaycan şirkətlərinin Gürcüstanın ən böyük vergi ödəyiciləri olduğunu diqqətə çatdırıb. Qeyd edib ki, Azərbaycan şirkətləri yatırılan sərmayələr hesabına Gürcüstanda minlərlə iş yerləri yaratmaqla, ölkədə işsizlik probleminin həllində yaxından iştirak edirlər.

Səfir iki ölkənin işgüzar dairələri arasında sıx əməkdaşlıq əlaqələrinin qurulması, şirkətlərin iştirakı ilə mütəmadi olaraq biznes forumların təşkilinin vacibliyini, ASK ilə AZEBİ arasında imzalanan əməkdaşlığa dair Anlaşma Memorandumunun bu əlaqələrin daha da dərinləşməsinə töhfə verəcəyinə ümidvar olduğunu bildirib.

Bundan başqa, Gürcüstanın sosial-iqtisadi sahədə apardığı islahatlar, hökumət tərəfindən həyata keçirilən proqramlar, sərmayə layihələri və tenderlər barədə AZEBİ tərəfindən iş adamları arasında aparılan maarifləndirmə işlərinin əhəmiyyəti qeyd olunub.

Azərbaycanın Batumi şəhərindəki baş konsulu Pərviz İsmayılzadə çıxış edərək, konsulluq dairəsi ərazisində, o cümlədən Acarıstan Muxtar Respublikasında mövcud imkanlar barədə iş adamlarına geniş məlumat verib.

Baş konsul iki ölkə arasında paytaxt şəhərlərlə yanaşı, regionlararası əməkdaşlığın inkişaf etdirilməsinin əhəmiyyətinə toxunaraq, Azərbaycanın Naxçıvan və Gürcüstanın Batumi şəhərlərinin qardaşlaşdığını söyləyib. O, iki il öncə Bakı-Batumi-Bakı birbaşa hava reysinin açılmasının ölkələrimiz arasında işgüzar əlaqələrin genişlənməsinə və qarşılıqlı turist səfərlərinin artmasına töhfə verdiyini vurğulayıb.

Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının prezidenti Məmməd Musayev çıxışında iki ölkənin biznes assosiasiyaları arasında mütəmadi olaraq görüşlərin keçirilməsinin vacibliyini qeyd edib, bu xüsusda, AZEBİ ilə əməkdaşlığa dair Anlaşma Memorandumunun imzalanmasının əhəmiyyətini vurğulayıb.

O, ikitərəfli əməkdaşlıq formatı ilə yanaşı, işgüzar dairələrin iştirakı ilə Azərbaycan, Türkiyə və Gürcüstan arasında üçtərəfli biznes forumların təşkilinin səmərəli olduğunu qeyd edib.

“SOCAR Energy Georgia” şirkətinin baş direktoru Mahir Məmmədov çıxış edərək, SOCAR şirkəti tərəfindən Gürcüstanda həyata keçirilən layihələr, o cümlədən pandemiya dövründə yerli fermerlərə dəstək üçün Gürcüstanın Ətraf Mühitin Mühafizəsi və Kənd Təsərrüfatı Nazirliyi ilə SOCAR arasında imzalanmış “Aqrodizel” proqramı barədə məlumat verib. SOCAR şirkətinin Gürcüstanda ən böyük vergi ödəyicilərdən biri olduğunu, şirkətin Gürcüstanda yaşayan soydaşlarımızın təhsil məsələlərini hər zaman diqqət mərkəzində saxladığını söyləyib.

Tədbir çərçivəsində AZEBİ-nin icraçı direktoru Qaratel Allahverdiyeva təşkilat tərəfindən 2020-ci il ərzində görülən işlər və 2021-ci il üzrə tədbirlər planı barədə təqdimatla çıxış edib.

Görüşdə həmçinin “Azərbaycan Dəmir Yolları” QSC-nin Gürcüstan filialının rəhbəri Elçin Ağayev, “Paşa Bank Gürcüstan”ın idarə heyətinin sədri Arda Arkun, “Qara Dəniz Terminalı”nın rəhbəri Kərim Quliyev, “Aqara” şəkər zavodunun direktoru Alxan Əlizadə, “AS Georgia” şirkətinin rəhbəri Emin Abbasov və başqaları çıxış edərək, iki ölkə arasında iqtisadi əlaqələrin genişləndirilməsi və AZEBİ-nin fəaliyyətinin gücləndirilməsi ilə bağlı təkliflər irəli sürüblər.

Görüşdə Azərbaycan şirkətlərinin üzləşdiyi problemlər və gələcək əməkdaşlıq imkanları ətrafında fikir mübadiləsi aparılıb, bu fəaliyyətin həyata keçirilməsində AZEBİ-nin rolu xüsusi qeyd edilib. Eyni zamanda, Azərbaycan Respublikası Prezidentinin müvafiq fərmanları ilə təsis edilmiş Azərbaycan Respublikasının ərazi bütövlüyünün müdafiəsi ilə əlaqədar yaralananların və şəhid ailələrinin təminatına dəstək fondu (“YAŞAT” Fondu), eləcə də, işğaldan azad edilmiş ərazilərimizdə quruculuq-bərpa və abadlıq işlərinin aparılması ilə bağlı “Qarabağ Dirçəliş Fondu” publik hüquqi şəxs barədə təqdimat olub.

Xətayi Əzizov

AZƏRTAC-ın xüsusi müxbiri

Tbilisi