DÜNYA


Təbii fəlakət Gürcüstanın bölgələrində ciddi fəsadlar törədib

Tbilisi, 1 dekabr, AZƏRTAC

Güclü külək və qasırğa Gürcüstanda ciddi fəsadlar törədir. Dekabrın 1-də gecə saatlarında İmereti, Meqreli-Zemo (Yuxarı) Svaneti və Quriya bölgələrindən Gürcüstanın Fövqəladə Hallar Xidmətinə, ümumilikdə, 465 müraciət daxil olub.

AZƏRTAC xəbər verir ki, İmereti bölgəsində ən çox ziyan Kutaisi şəhərinə dəyib. Güclü külək və qasırğa bu şəhərdə 170 evin dam örtüyünü uçurub. Yol və magistrallarda 150 ağac aşıb və nəticədə 5 avtomobil əzilərək yararsız hala düşüb.

Meqreli-Yuxarı Svaneti bölgəsində 46 evin damını külək aparıb. Elektrik şəbəkəsinə ciddi ziyan dəyib, bölgəyə elektrik enerjisinin verilməsi dayandırılıb.

Quriya bölgəsində isə əsasən ağacların aşması nəticəsində elektrik xətləri zədələnib.

Hazırda bu ərazilərdə təbii fəlakətin nəticələrini aradan qaldırmaq üçün Fövqəladə Hallar Xidmətinin 500-dən çox xilasedicisi cəlb olunub.

İki gündür davam edən aramsız yağışlar nəticəsində çaylarda sululuq artıb, bəzi bölgələrdə torpaq sürüşməsi qeydə alınıb. Yollar və körpülər dağılıb.

Güclü qar səbəbindən Gürcüstandan Rusiyaya gedən əsas magistral yolda qoşqulu və quşqusuz yük maşınlarının hərəkəti qadağan edilib.

Xətayi Əzizov

AZƏRTAC-ın xüsusi müxbiri

Tbilisi

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.