QAN YADDAŞI


Təbrizdə nəşr olunan “Sorxab” qəzetində Xocalı soyqırımı haqqında məqalə dərc olunub

Tehran, 23 fevral, AZƏRTAC

Təbrizdə nəşr olunan “Sorxab” qəzetində Xocalı soyqırımı haqqında məqalə dərc olunub.

AZƏRTAC Azərbaycanın Təbriz şəhərindəki Baş Konsulluğuna istinadla xəbər verir ki, materialda Ermənistanın Azərbaycana qarşı işğalçılıq siyasəti barədə geniş məlumat verilib.

Qeyd olunub ki, 1988-ci ildən başlayaraq Ermənistanda hərbi-siyasi gücə nail olmuş millətçi qüvvələr SSRİ-də yaranmış siyasi vəziyyətdən məharətlə istifadə edib. Azərbaycana qarşı açıq ərazi iddiası irəli sürülmüş və Ermənistanda yaşayan 200 minə qədər azərbaycanlı kütləvi şəkildə deportasiyaya məruz qalmışdı. Bunun ardınca isə Dağlıq Qarabağın azərbaycanlı icmasına qarşı kütləvi terror və qırğınlar həyata keçirməyə başlanılıb. Ermənistan-Azərbaycan Dağlıq Qarabağ münaqişəsinin gedişində erməni millətçiləri tərəfindən işğal edilmiş Azərbaycan torpaqlarında çox sayda qırğın və qətliamlar törədilib.

Məqalədə qeyd edilib ki, bunların ən dəhşətlisi Xocalıda törədilən soyqırımı olub. Belə ki, 1992-ci il fevralın 25-dən 26-na keçən gecə Ermənistan silahlı qüvvələri keçmiş SSRİ-nin 366-cı motoatıcı alayının da dəstəyi ilə Xocalı şəhərinə hücuma keçmiş, bütün beynəlxalq hüquq, o cümlədən beynəlxalq humanitar hüquq normalarını pozaraq oraya zirehli texnika yeritmiş, şəhərin dinc əhalisinə misli görülməmiş qəddarlıqla divan tutublar.

Xocalı şəhərində törədilmiş müdhiş cinayətlərin xarakteri və miqyası bu soyqırımı aktının BMT Baş Məclisinin 1948-ci il 9 dekabr tarixli 260 (III) saylı qətnaməsi ilə qəbul edilmiş "Soyqırımı cinayətinin qarşısının alınması və cəzalandırılması haqqında" Konvensiyada ifadə olunmuş tərifə tam uyğun gəldiyini sübut edir. Qabaqcadan planlaşdırılmış kütləvi və amansız qırğın aktı həmin ərazidə yaşayan insanları məhz azərbaycanlı olduqlarına görə tamamilə məhv etmək niyyəti ilə törədilib.

Prezident İlham Əliyevin rəhbərliyi ilə Xocalı soyqırımının dünyada tanıdılması, Ermənistan-Azərbaycan Dağlıq Qarabağ münaqişəsi barədə həqiqətlərin beynəlxalq ictimaiyyətə çatdırılması, təcavüzkarın ifşası və işğal edilmiş torpaqlarımızın azad olunması üçün bütün zəruri addımlar atılmaqdadır. Hazırda bu soyqırımını törədənlərin ifşa olunması və beynəlxalq ictimaiyyətin hadisə ilə bağlı geniş məlumatlandırılması Azərbaycanın xarici siyasətinin əsas istiqamətlərindən biri kimi müəyyənləşdirilib. Eləcə də, Xocalı həqiqətlərinin dünyaya çatdırılması, beynəlxalq aləmdə yayılması, bu soyqırımına obyektiv qiymət verilməsi istiqamətində davamlı olaraq iş aparılır. Bu baxımdan Heydər Əliyev Fondunun prezidenti, UNESCO və İSESCO-nun xoşməramlı səfiri Mehriban Əliyevanın gördüyü işlər olduqca təqdirəlayiqdir. Belə ki, Fond bəşəriyyətin ən böyük faciələrindən olan Xocalı soyqırımı haqqında faktların dünyaya çatdırılması istiqamətində çox sistemli və ardıcıl fəaliyyət göstərir.

 

Rabil Kətanov

AZƏRTAC-ın xüsusi müxbiri

Tehran

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.