SİYASƏT
Tehrana olan beynəlxalq etimadsızlıq getdikcə artır
Bakı, 1 fevral, AZƏRTAC
Azərbaycanın İran İslam Respublikasındakı səfirliyinə silahlı hücum və bir nəfərin qətlə yetirilməsi beynəlxalq hüququn və konvensiyaların kobud şəkildə pozulmasıdır. Bu qanlı olay terror hadisəsi kimi dəyərləndirilir. Artıq İran mətbuatı da etiraf etdi ki, hadisəni törədən cinayətkar SEPAH-ın üzvü olub və o, bu təşkilatdan könüllü olaraq təqaüdə çıxıb. İran mətbuatı terrorçu haqqında ətraflı məlumat yayıb. Məlum olub ki, 54 yaşlı cinayətkar bu yaxınlarda Bəsic və İnqilab Keşikçiləri ilə birlikdə Təbrizdə baş verən etiraz aksiyalarının yatırılmasında da iştirak edib. Faktlar da təsdiqləyir ki, cinayəti törədən şəxs peşəkar terrorçu imiş. İran rəsmiləri bunu ört-basdır etmək üçün guya, hadisənin ailə-məişət zəminində baş verdiyini iddia edirdilər. Göründüyü kimi, yerli mətbuat Tehranın polis rəisini ifşa etdi. Silahlı şəxsin videogörüntüləri də Tehran polisinin yalanlarını üzə çıxartdı.
Bu fikirləri AZƏRTAC-a açıqlamasında siyasi şərhçi Əliqismət Bədəlov bildirib.
O deyib ki, buna qədər də Azərbaycanın Fransada və Londondakı səfirliklərinə hücumlar olmuşdu. Artıq aydın olur ki, bu hücumlarda da iranlı terrorçuların iştirakı olub. Londonda Azərbaycan səfirliyinə İslam məzhəbçiliyi ilə pərdələnmiş həmin hücumun arxasında İran xüsusi xidmətinin əli olduğu qənaətinə gəlmək mümkündür. İranın səfirliyimizə silahlı hücumu və terror törətməsi erməni terrorçularının indiyə qədər soydaşlarımıza qarşı törətdikləri qanlı olayları xatırladır. Ermənilər də günahsız insanları amansızcasına qətlə yetiriblər, özlərini qatı islamçı hesab edən iranlılar da. Deməli, bu yaxınlarda Tehranla İrəvanın qardaşlaşması barədə razılığa gəlinməsi təsadüfi deyilmiş. Məlum olub ki, İranla Ermənistanın əməlləri və xislətləri eyni imiş. Ötən ilin oktyabrında Qafan şəhərində İranın Baş Konsulluğunun açılması da bunu təsdiqlədi. İslamı təhqir edən, müsəlman məscidlərində heyvan saxlayan Ermənistanla qardaşlıq münasibətlərini gücləndirən İranı Ermənistandan nə fərqləndirir? Həmin mərasimdə İranın xarici işlər naziri Hüseyn Əmir Abdullahianın “İran İslam Respublikası Ermənistanın və regionun təhlükəsizliyini öz təhlükəsizliyi hesab edir” deməsi Ermənistanla İranın doğrudan da, qardaşlaşmasından xəbər verir.
Ə.Bədəlov bu terror hadisəsinin bir daha İran İslam Respublikasının öz üzərinə düşən beynəlxalq öhdəlikləri yerinə yetirməməsinin açıq-aydın göstərdiyini vurğulayaraq deyib ki, silahlı hücumun səfirliyimizin ərazisində baş verməsi birbaşa dövlətimizin suverenliyinə və ərazi bütövlüyünə təcavüzdən xəbər verir: “Böyük Britaniya və Fransadakı səfirliklərimizə hücumdan fərqli olaraq, İrandakı diplomatik missiyamızda törədilən terror zamanı bir nəfər səfirlik əməkdaşının qətlə yetirilməsi, ikisinin isə yaralanması bu ölkədəki diplomatik korpusumuzun heç də lazımi səviyyədə mühafizə olunmamasından xəbər verir. Məlum olduğu kimi, diplomatik fəaliyyət Vyana Konvensiyası əsasında tənzimlənir. Səfirliyimizdə törədilən terror bir daha təsdiqlədi ki, İran “qardaşı” Ermənistan kimi, beynəlxalq hüququn və Vyana Konvensiyasının maddələrini kobud şəkildə pozub.
Siyasi şərhçi bildirib ki, İran 1965-ci ildən, Azərbaycan isə 1992-ci ildən Vyana Konvensiyasının üzvüdürlər. Konvensiyaya əsasən, səfirliklər yerləşdikləri ölkənin mühafizə xidmətləri tərəfindən qorunmalıdır. Təsəvvür edin ki, terrorçu əlində “Kalaşnikov” markalı avtomat ilə səfirliyin binasına daxil olur, atəş açır, ancaq iranlı mühafizəçi, həmçinin İranın xüsusi xidmət orqanları, eyni zamanda, yerli polis bu qanlı hadisəyə hər hansı reaksiya vermir. Bütün bunlar bir daha təsdiqləyir ki, bu cinayət əvvəlcədən hazırlanmış və planlı şəkildə həyata keçirilib. Son vaxtlar İranda etiraz aksiyasına çıxan qadınları edam edirlər, ancaq diplomatik korpusda terror aktı törədən cinayətkar isə yerli televiziya kanallarına sərbəst şəkildə müsahibə verir.
Ə.Bədəlov deyib ki, terrorçunun televiziya kanallarına müsahibə verməsinə şəraitin yaradılması da İran xüsusi xidmət orqanlarının növbəti oyunudur. Guya, cinayətkara törətdiyi qanlı olayın səbəbini açıqlaması ilə əlaqədar şərait yaradılıb. Səbəb isə aydındır: İran xüsusi xidmət orqanlarının hazırladıqları mətn üzrə çıxış etmək. Yəni, hadisə ailə-məişət zəminində baş verib. Bəs İranı ölkəmizin düşməni ilə dost, qardaş olmağa vadar edən səbəb nədir? Prezident İlham Əliyevin uzaqgörənliklə müəyyənləşdirdiyi diplomatiyası, dünyanın ən qüdrətli dövlətlərinin və nüfuzlu beynəlxalq təşkilatlarının 30 il ərzində nizamlaya bilmədikləri Ermənistan-Azərbaycan münaqişəsini Müzəffər Ali Baş Komandanımızın rəhbərliyi ilə yenilməz Ordumuz cəmi 44 günə həll etdi. Ermənistan üzərindəki tarixi Qələbəmiz Azərbaycanı dünyada qalib, qüdrətli dövlət kimi tanıtdı. Artıq dünya birliyi də Azərbaycanın regionda ən güclü dövlət olduğunu etiraf edir.
Siyasi şərhçi tarixi qələbədən sonra Azərbaycanla əməkdaşlıq etmək istəyən dövlətlərin sayının getdikcə artdığını bildirib. Deyib ki, görünür, ölkəmizin nüfuzunun sürətlə artması İranı da təşvişə salıb. Özünü İslam dövləti adlandıran İranın müsəlmanların qatı düşməni olan Ermənistanla qardaşlaşıb ölkəmizə qarşı təhdid və təzyiq göstərməsi əbəsdir: “Vətən müharibəsində də bunun şahidi olmuşduq. O zaman da İran Ermənistanı dəstəklədi, silah-sursat, yanacaq, avadanlıq göndərdi, “Ermənistan sərhədi qırmızı cizgimizdir” dedi. Sonra isə məzhəbçiliyi qızışdırmağa, ölkəmizi “sionizmin dayağı” kimi qələmə verməyə çalışdı, Arazın üzərində hərbi təlimlər keçirib, ölkəmizi təhdid etmək istədi. Hadisələr göstərdi ki, bu dəfə də yanılırlar. Çünki Azərbaycan səfirliyinə qarşı törədilən terrordan sonra Tehrana olan beynəlxalq etimadsızlıq getdikcə artır. Artıq dünyanın bir sıra ölkəsi İrandakı səfirliklərinin fəaliyyətini dayandırmaq barədə düşünür”.