ELM VƏ TƏHSİL


Təhsil müəssisələrində yeni müsabiqə: məktəblilər araşdırma aparacaqlar

Bakı, 20 noyabr, AZƏRTAC

Ümumi təhsil müəssisələrinin “Kiçik Akademiya” üzvləri arasında tədqiqatçılıq müsabiqəsi keçiriləcək.

Bakı Şəhəri üzrə Təhsil İdarəsinin (BŞTİ) əmrinə əsasən təşkil olunan müsabiqə şagirdlərin elmi axtarışlara sövq edilməsi, müasir tədqiqat metodlarına yiyələnməsi, bu sahədəki fəaliyyətlərinin stimullaşdırılması, elmi-tədqiqat fəaliyyətinə meyli olan istedadlı şagirdlərin vaxtında aşkara çıxarılması, “Kiçik Akademiya”ların fəaliyyətinin təkmilləşdirilməsi və əhatə dairəsinin genişləndirilməsi məqsədlərinə xidmət edir.

BŞTİ-dən AZƏRTAC-a bildirilib ki, VIII-X sinif şagirdləri arasında keçiriləcək müsabiqə çərçivəsində məktəblilər onlara təqdim olunan mövzular (məktəb ekologiyası, plastik qablaşdırma tullantılarının ətraf mühitə mənfi təsiri, plastik qablaşdırmadan istifadənin orqanizmə mənfi təsiri, alternativ qablaşdırma materiallarından istifadənin əhəmiyyəti, alternativ və bərpa olunan enerjinin istifadəsi, səs-küy çirklənməsi, ekologiya və iqtisadiyyat, Azərbaycanın biomüxtəlifliyi, cəmiyyət və təbiət arasında qarşılıqlı əlaqələr) üzrə araşdırma aparacaqlar.

Paytaxtın 12 inzibati rayonu üzrə keçirilməsi nəzərdə tutulan müsabiqə 3 mərhələdən ibarətdir. Müsabiqənin I (məktəbdaxili) mərhələsində hər məktəbdən bir şagirdin ən yaxşı araşdırma işi müəyyənləşdirilərək II mərhələyə təqdim olunacaq. II mərhələnin nəticələrinə əsasən 30 tədqiqat işi seçilərək final mərhələsində dinləniləcək. III mərhələdə isə 9 ümumi təhsil məktəbi müvafiq olaraq I, II, III və həvəsləndirici yerlərə (2 məktəb I, 2 məktəb II, 3 məktəb III və 3 məktəb həvəsləndirici) layiq görüləcək.

Qaliblər BŞTİ tərəfindən diplom və hədiyyələrlə mükafatlandırılacaq.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.