REGİONLAR


Təhsil naziri: Son 15 ildə Azərbaycanda üç mindən çox yeni məktəb binası tikilib VİDEO

Balakən, 13 iyul, Mustafa Dadaşov, AZƏRTAC

Son 15 ildə Azərbaycanda 3 min 100-dən çox yeni məktəb binası tikilib və ya əsaslı təmir edilib. Bu göstərici ölkədə olan ümumi məktəblərin sayının 70 faizindən də çoxdur. Eyni zamanda, dövlətimizin başçısı tərəfindən 2018-ci il üçün təsdiq edilmiş dövlət investisiya proqramına uyğun olaraq, bu il ölkə ərazisində 137 modul tipli məktəbin quraşdırılması da nəzərdə tutulur. Belə məktəblər əsasən ucqar, şagirdlərin sayı az olan yaşayış məntəqələrində quraşdırılır. Bu prosesə ötən ildən başlanılıb və 2017-ci ildə ölkə ərazisində 106 belə məktəb quraşdırılıb.

AZƏRTAC-ın bölgə müxbiri xəbər verir ki, bu barədə təhsil naziri Ceyhun Bayramov Balakən rayonunun Şərif kəndində inşa edilmiş yeni məktəb binasına baxış keçirən zaman jurnalistlərə müsahibəsində məlumat verib.

Nazir bildirib ki, bundan əlavə, dövlət investisiya proqramı çərçivəsində ölkə ərazisində şagird sayı daha yüksək olan məktəblərdə əsaslı təmir işləri də aparılır. Onların bir qismi yeni tədris ilinin başlanğıcınadək şagirdlərin istifadəsinə veriləcək. Digərlərinin tikintisi isə ilin sonunadək başa çatdırılacaq.

Jurnalistlərin “Təhsil haqqında” Qanuna ediləcək dəyişikliklərlə bağlı suallarını cavablandıran nazir Ceyhun Bayramov deyib: “Təhsil haqqında” Qanun 2009-cu ildə qəbul edilib. Həmin vaxtdan keçən 9 il ərzində bir sıra yeni istiqamətlər meydana çıxıb, normativ hüquqi aktlar qəbul edilib. 2013-cü ildə təhsilin inkişafı üzrə dövlət strategiyası qəbul olunub. Bütün bunlar mövcud qanuna bir sıra dəyişikliklərin olunmasını zəruri edirdi. Bu zərurətdən çıxış edərək Təhsil Nazirliyi tərəfindən təkliflər paketi hazırlanaraq hökumətə təqdim olunub. Cari ilin iyununda Milli Məclis tərəfindən dəyişikliklər paketi qəbul edilib və dövlətimizin başçısının müvafiq Fərmanı ilə Qanun qüvvəyə minib. Fərmanın icrası ilə bağlı müvafiq icra strukturlarına, Nazirlər Kabinetinə və Təhsil Nazirliyinə bir sıra tapşırıqlar verilib və hazırda bu istiqamətdə iş davam etdirilir”.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.