ELM VƏ TƏHSİL


Təhsil naziri UNESKO-nun Baş direktorunun müavini ilə görüşüb

Paris, 14 iyun, AZƏRTAC

Azərbaycan Respublikasının Təhsil naziri Ceyhun Bayramovun rəhbərlik etdiyi nümayəndə heyəti Parisə səfəri çərçivəsində UNESKO-nun Baş direktorunun təbiət elmləri üzrə yeni təyin olunmuş müavini Şamila Nair-Beduel ilə görüşüb.

AZƏRTAC-xəbər verir ki, görüşdə Ceyhun Bayramov Şamila Nair-Bedueli yeni təyinatı münasibətilə təbrik edərək, məsuliyyətli işində uğurlar arzulayıb.

Sonra elmin müasir dünyadakı vacib rolundan söz açılaraq, uşaqları elmə cəlb etməyin yollarından, Azərbaycanda həyata keçirilən bir sıra layihələrdən, respublika olimpiadalarından və digər intellektual yarışlardan danışılıb.

Ş.Nair-Beduel nüvə tədqiqatları sahəsində elm fakültələrinin dekanları üçün təşkil olunan seminarlar barədə məlumat verib. Belə layihələrin bilikləri paylaşmaq və qadın alimləri təşviq etmək üçün yaxşı vasitə olduğunu vurğulayıb. O, iyulun 16-17-də Parisdə elm konfransının keçiriləcəyini diqqətə çatdıraraq, bu tədbirin inkişaf edən tendensiyaları müzakirə etmək, elm dialoqu yaratmaq, elmin rolunu dərk etmək, mühüm nəticələr əldə etmək və bu sahədə informasiya boşluğunu aradan qaldırmaq üçün önəmli platforma olacağını bildirib.

Tərəflər UNESKO-nun dəstəyi ilə təsis olunması nəzərdə tutulan elm və texnologiya üzrə muzey layihəsi barədə müzakirə aparıblar. Müzakirələrin davamı olaraq nümayəndə heyəti Parisdə fəaliyyət göstərən və Avropanın ən böyük elm muzeyi olan “Elm və sənaye şəhərciyi”nə baş çəkib.

Təhsil naziri Ceyhun Bayramov Ş.Nair-Bedueli ölkəmizə dəvət edib.

Şəhla Ağalarova

AZƏRTAC-ın xüsusi müxbiri

Paris

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.