Bakı, 3 iyun, AZƏRTAC

İnteryer dizayneri binanın ahəngdar, rahat və gözəl olması üçün dizayn layihəsi hazırlayır. O, həm rəssam, həm memar, həm dekorator, həm də mühəndisdir. Bu gün interyer və eksteryerin bədii tərtibatçısı sahəsinə tələbat yüksəkdir.

AZƏRTAC-ın əməkdaşı bu peşənin öyrədildiyi Mədəniyyət və Sənətkarlıq üzrə Bakı Dövlət Peşə Təhsil Mərkəzində olub.

Adətən 9 illik təhsildən gələn tələbələrin üstünlük təşkil etdiyi ixtisas birillik, iki illik və üçillik qruplarda tədris olunur. Burada hər qrup üzrə 20 tələbə təhsil alır. Digər qruplardan fərqli olaraq üçillik təhsili bitirən tələbələr diplomla yanaşı attestatla da təmin olunurlar.

İnteryer və eksteryerin bədii tərtibatçısı ixtisasının istehsalat təlimi ustası Gülnar Əliyeva deyir ki, rəssamlıq qabiliyyəti olmayan tələbələr də burada özlərini inkişaf etdirirlər. Onun sözlərinə görə, tələbələr oxuduqları müddətdə həm sənətlə məşğul olur, həm də müxtəlif texnikaları öyrənərək fəaliyyətlərini genişləndirirlər: “Burada tələbələrə vitraj, barelyef, mozaika, gipslə işləmək, oyma sənəti kimi sahələri öyrədirik. Hansı özlərinə yaxındırsa, seçib, o yolla davam edir. Tələbələrimiz ikinci kursda istehsalat təcrübəsinə yollanırlar. Təcrübə üçün teatr, televiziya, tikinti şirkətləri kimi ixtisasımızın uyğun olduğu müəssisələrə göndərilirlər. İki-üç aylıq təcrübə müddətində özünü yaxşı göstərən tələbələr elə orada işlə təmin olunurlar”.

Gülnar Əliyeva deyir ki, məzun tələbələr arasında fərdi sahibkarlıqla da məşğul olanlar çoxdur: “Tələbələrimiz öz fərdi işlərini qurmağa çalışırlar. Biz tərəfdən də lazımı kömək göstərilir. Sərgilərdə iştirak edənlər sifarişlər qəbul edirlər”.

Birinci kurs tələbəsi Rəsul İslamov deyir ki, rəssamlığa marağı olduğu üçün bu peşəni seçib: “Məktəb illərində də rəssamlıqla məşğul olmuşam. Rəsm müsabiqələrinə, sərgilərə qoşulurdum. Ötən il Xətai Sənət Mərkəzinin təşkilatçılığı ilə uşaq, yeniyetmə və gənclər arasında “Təbiəti yaşıla boyayaq” adlı rəsm sərgisində iştirak etmişəm”.

On yeddi yaşlı Əminə Qarakişiyeva əsasən milli ornamentlər üzərində işləməyi sevir: “Yutubda müəllimin səhifəsi ilə tanış olub, buraya gəlməyi qərara aldım. Məktəb vaxtı rəsmlə məşğul olurdum. Burada vitraj sahəsinə yönəlmişəm”.

Qeyd edək ki, bu peşə on ildən artıqdır ki, Mədəniyyət və Sənətkarlıq üzrə Bakı Dövlət Peşə Təhsil Mərkəzində öyrədilir.