Tələbələr BMT-nin Dayanıqlı İnkişaf Məqsədlərini müzakirə ediblər

Bakı, 15 mart, AZƏRTAC

Azərbaycan Memarlıq və İnşaat Universitetində (AzMİU) Gənclər və İdman Nazirliyi, Gənclər Fondu, BMT-nin ölkəmizdəki nümayəndəliyi və Azərbaycan Tələbə Gənclər Təşkilatları İttifaqının tərəfdaşlığı ilə “AzMUN” proqramı çərçivəsində BMT-nin Dayanıqlı İnkişaf Məqsədləri haqqında seminar və “Bootkamping” keçirilib.

AzMİU-dan AZƏRTAC-a bildirilib ki, tədbirdə 4 Dayanıqlı İnkişaf Məqsədi - yoxsulluğa son, aclığa son, sağlamlıq və rifah, keyfiyyətli təhsil haqqında məlumatlandırma aparılıb.

Tədbirdə “Mərkəzi Asiya üzrə Subregional Ofis ölkələrində ərzaq israfı və tullantısının azaldılması” layihəsinin mütəxəssisi Pərviz Əliyev, UNICEF-in nümayəndəsi Natiq Umarov, “AzMUN” proqramının rəhbəri Leyla Məmmədzadə iştirak ediblər.

Seminardan sonra tələbələrlə komanda işləri görülüb. Fəal tələbələrə sertifikat və hədiyyə verilib.