REGİONLAR
Tələbələr Dövlət Miqrasiya Xidmətində istehsalat təcrübəsi keçirlər
Naxçıvan, 30 noyabr, AZƏRTAC
Naxçıvan Dövlət Universitetinin və “Naxçıvan” Universitetinin Beynəlxalq münasibətlər ixtisasının 4-cü kurs tələbələri muxtar respublikanın Dövlət Miqrasiya Xidmətində istehsalat təcrübəsi keçirlər.
Naxçıvan Muxtar Respublikasının Dövlət Miqrasiya Xidmətinin mətbuat xidmətindən AZƏRTAC-ın Naxçıvan bürosuna bildirilib ki, təcrübə 16 noyabr - 30 dekabr tarixlərini əhatə edir. Tələbələr xidmətin müxtəlif struktur bölmələrində mövcud iş prosesi ilə tanış edilir və müəyyən iş bacarıqlarına sahiblənirlər. Təhsil aldıqları ixtisas üzrə təcrübə toplayan tələbələr, gələcək iş həyatlarında mühüm sayılan vərdişlər əldə edirlər.
Dövlət Miqrasiya Xidməti tərəfindən hazırlanan və təsdiq olunan tədris proqramlarında xidmətin təcrübəli əməkdaşları tərəfindən tələbələrə Naxçıvan Muxtar Respublikasında uğurla həyata keçirilən dövlət miqrasiya siyasətinin xüsusiyyətləri barədə ətraflı məlumatlar verilir. Bu baxımdan miqrasiya proseslərinin yaranmasına səbəb olan siyasi amillər və müasir miqrasiya proseslərinin istiqamətləri, miqrasiya sahəsində tətbiq edilən innovativ yeniliklər, həmçinin bu proseslərin həyata keçirilməsində informasiya təminatının rolu barədə təsəvvürün yaranması məqsədilə onların ayrı-ayrı sahələrlə tanışlığı da təmin olunur.
Vətəndaşlıq məsələlərinə baxılması, miqrasiya sahəsində uçot sisteminin tətbiqi və monitorinqinin həyata keçirilməsi mövzularında da tələbələrə geniş məlumatlar verilir.
Dərslər daha çox slayd və videoçarxlarla tədris olunur ki, bu da təcrübə zamanı dərslərin effektiv və keyfiyyətli formada öyrənilməsi üçün müstəsna əhəmiyyətə malikdir.
Təcrübə müddətində tələbələrin Naxçıvan Muxtar Respublikası Dövlət Miqrasiya Xidmətinin Qanunsuz Miqrantların Saxlanılması Mərkəzinin iş prinsipi və fəaliyyəti ilə də tanışlığı həyata keçirilib.
Sonda istehsalat təcrübəsini uğurla başa vuran tələbələrə şəhadətnamələr təqdim ediləcək.
Qeyd edək ki, təcrübənin əsas məqsədi tələbələrin nəzəri biliklərini möhkəmləndirmək və sonrakı əmək fəaliyyətində istifadəsini təmin etməkdən, tələbələri ixtisasın profilindən və xüsusiyyətindən asılı olaraq, yeni texnologiyalarla, iş üsulları ilə tanış etməkdən, həmçinin onlarda işgüzarlıq, təşkilatçılıq və texnologiya vərdişləri aşılamaqdan ibarətdir.