ELM VƏ TƏHSİL
Təlimlərdə iştirak üçün müsabiqənin ikinci mərhələsinə başlanılır
Bakı, 17 oktyabr, AZƏRTAC
Təhsil Nazirliyinin birbaşa tabeliyində olan və Bakı Şəhəri üzrə Təhsil İdarəsinin tabeliyində fəaliyyət göstərən ümumtəhsil məktəbi, lisey və gimnaziyaların direktorlarını, direktor müavinlərini, müəllimlərini əhatə edən təlimlərdə iştirak üçün müsabiqənin ikinci mərhələsinə başlanılır.
Nazirlikdən AZƏRTAC-a bildiriblər ki, ikinci mərhələ oktyabrın 28-də S.C.Pişəvəri adına humanitar fənlər gimnaziyasında həyata keçiriləcək.
Müsabiqənin ikinci mərhələsi ilə bağlı məlumatlar bu mərhələyə keçən namizədlərin elektron poçt ünvanlarına göndəriləcək, eyni zamanda, telefon vasitəsilə məlumat veriləcək.
İkinci mərhələdə namizədlərə bir saat ərzində kağız formatda 30 test tapşırığı təqdim olunmaqla onların məntiqi dünyagörüşü qiymətləndiriləcək.
Təlimlərin keçirilməsinin məqsədi müasir idarəetmə bilik və bacarığına yiyələnmiş, informasiya texnologiyalarına bələd olan, ölkəmizin təhsil və sosial inkişafına töhfə verə biləcək ümumi təhsil müəssisəsi direktorlarını təkmilləşdirmək və yetişdirməkdir.
Təlim prosesində müdavimlər təhsildə keyfiyyətin idarəedilməsi, təhsili idarəetmənin hüquqi əsasları, təhsildə statistika, təhlil, təhsildə maliyyənin idarəolunması və digər mövzular üzrə bilik və bacarıqlarını artırmaq imkanı əldə edəcəklər.
Təlim iştirakçıları nazirlik tərəfindən təşkil olunan yekun qiymətləndirmədə iştirak edəcəklər. Yekun qiymətləndirmədə qənaətbəxş nəticə göstərən və hazırda direktor vəzifəsində çalışmayan şəxslər bu vəzifə üzrə vakant yerlərə təyin olunmaq üçün ehtiyat kadr kimi qeydə alınacaqlar.