SİYASƏT
Telman İsa: Ümummilli Lider bütün varlığı ilə sevdiyi doğma xalqının mənafelərini daim önə çəkib
Bakı, 30 sentyabr, AZƏRTAC
Məlum olduğu kimi, Azərbaycan Prezidenti İlham Əliyev sentyabrın 29-da 2023-cü ilin ölkəmizdə “Heydər Əliyev İli” elan edilməsi haqqında Sərəncam imzalayıb. Sərəncamda 2023-cü il mayın 10-da Azərbaycan xalqının ümummilli lideri, müstəqil Azərbaycan dövlətinin qurucusu, görkəmli siyasi və dövlət xadimi Heydər Əliyevin anadan olmasının 100 ili tamam olduğu qeyd edilir.
Hesab edirəm ki, bu qərar zamanında verilmiş tarixi qərardır. Çünki Tanrı bir topluma yardım etmək, kömək göstərmək istəyəndə o toplumun başına Heydər Əliyev kimi bir lider gətirib. Bu, danılmaz bir gerçəkdir. Dahi Heydər Əliyev millətinin ən çətin günlərində Tanrının göndərdiyi xilaskar oldu və böyük şəxsiyyətin misilsiz xidmətlərini sadalamaqla bitməz. O, Azərbaycanı yox olmaq təhlükəsindən xilas etməklə adını tarixə qızıl hərflərlə yazdırdı. Bəli, dinindən, millətindən asılı olmayaraq, bu günün Azərbaycanının vətəndaşları ona borcludur.
Bu sözləri AZƏRTAC-a açıqlamasında siyasi ekspert Telman İsa söyləyib.
“1990-cı illərin əvvəli indi də gözümün önündədir. Tələbə idim. Ətrafda bir xaos, qanunsuzluq, qarşılıqlı apatiya, aqressiya hökm sürürdü. Biri digərini dinləmir, yerli, yersiz ittihamlar irəli sürür, nəticədə də itirən, sarsılan gənc dövlətimiz, dövlətçiliyimiz olurdu. O ümidsiz günlərdə hakimiyyətə gələn dahi şəxsiyyət öz xalqını zamanın mürəkkəb tarixi-siyasi sınaqlarından uğurla çıxardı və ardıcıl mübarizə apararaq onu müstəqilliyə qovuşdurdu. Azərbaycan xalqı yeni əsrə və yeni minilliyə məhz Heydər Əliyev zəkasının işığında qədəm qoydu. Davamlı yüksəliş yolunda inamla irəliləyən müasir Azərbaycan ulu öndər Heydər Əliyevin həyat amalının təntənəsidir.
Həmin dövrü təhlil etsək və dahi şəxsiyyətin rəhbərliyinin birinci dövrünə nəzər salsaq, ortaya maraqlı məqamlar çıxacaq. Özünün qeyri-adi idarəçilik bacarığı, polad iradəsi və yüksək vətənpərvərliyi sayəsində, uzaqgörən və məqsədyönlü qərarları ilə ulu öndər Heydər Əliyev çox qısa müddətdə respublikamızda sosial-iqtisadi, elmi-texniki və mədəni sahələrin inkişafında böyük sıçrayışa nail olub. Tariximizin gedişatının və həyatımızın ahənginin köklü surətdə dəyişdiyi, azadlıq və müstəqillik duyğularının milli düşüncəmizdə üstünlük təşkil etməyə başladığı bu illər Azərbaycanın quruculuq salnaməsinin ən parlaq səhifələridir. Ulu Öndərin xalqın yaradıcılıq enerjisini bir məqsədə yönəltməklə tarixi yaddaşın bərpası istiqamətində atdığı qətiyyətli addımlar o dövrdə milli ruhun canlanmasına xidmət göstərib, özünüdərki və soy-kökə qayıdışı təmin edib, müstəqil dövlət quruculuğuna aparan yolun təməl daşına çevrilib”, - deyə Telman İsa qeyd edib.
Siyasi ekspert bildirib ki, ümummilli lider Heydər Əliyev bütün varlığı ilə sevdiyi və canından əziz bildiyi doğma xalqının mənafelərini daim önə çəkib və respublikamızın inkişafı üçün malik olduğu bütün imkanlardan istifadə edib. Bu, həm sovetlər birliyi dönəmində, həm də Azərbaycanın müstəqilliyi illərində belə olub.
“Bir qədər öncə qeyd etdiyim kimi, müstəqilliyini bərpa edən Azərbaycan Ermənistanın təcavüzü, xarici təzyiqlər və daxili çəkişmələr üzündən dünyanın siyasi xəritəsindən silinmək və dövlətçiliyini itirmək təhlükəsi ilə qarşılaşmışdı. Taleyimizin həll olunduğu ağır bir zamanda xalqın təkidli tələbinə səs verərək yenidən hakimiyyətə qayıdan Heydər Əliyev doğma Vətənin xilası naminə misilsiz fədakarlıq nümayiş etdirib, ölkəmizi ictimai-siyasi pərakəndəliyin və anarxiyanın məngənəsindən qurtarıb, bütün sahələrdə müşahidə olunan dərin tənəzzülün qarşısını alıb, yenidən qurduğu və hər cür qəsdlərdən qoruduğu dövlətin dayanıqlı inkişaf yolunu müəyyən edib. Ulu öndər Heydər Əliyevin ölkəmizə rəhbərliyi illəri xalqımızın nadir tarixi imkandan faydalanaraq, böyük əziyyətlər bahasına öz müstəqilliyini əbədi və dönməz etdiyi taleyüklü mərhələdir. Onun hakimiyyətə gəldiyi ilk illərdəki çıxışları, ölkənin ali qanunverici orqanının tribunasından xalqa, deputatlara, ürəyi, amalı Vətən sevgisi ilə alışıb yanan şəxslərə, vətəndaşlara, şəhər sakinlərinə müraciəti hələ də gözümün önündədir”, - deyə T.İsa diqqətə çatdırıb.
Telman İsa qeyd edib ki, Ümummilli Lider müəllifi olduğu milli inkişaf strategiyasında ictimai, siyasi, sosial, iqtisadi, mədəni və digər sahələrdə qarşıda duran vəzifələri düzgün müəyyənləşdirib və məharətlə həyata keçirib. Heydər Əliyevin milli neft strategiyasının uğurla reallaşdırılması nəticəsində xalqımız öz təbii sərvətlərinin tam sahibinə çevrilib və qısa müddətdə ölkəmizin inkişafına güclü təkan verən resurslar əldə edilib. Azərbaycan Respublikasının ilk Konstitusiyasının qəbul olunması və bütün sahələri əhatə edən köklü islahatların həyata keçirilməsi, demokratik, hüquqi dövlət quruculuğu, nizami ordunun yaradılması ümummilli lider Heydər Əliyevin Azərbaycan xalqı qarşısında müstəsna xidmətləridir. Xalqımızı vahid amal ətrafında birləşdirən azərbaycançılıq ideologiyasının formalaşdırılması, ana dilinin dövlət qayğısı ilə əhatə olunması, ictimai-siyasi, elmi və mədəni fikir tariximizin əlamətdar hadisələrinin müntəzəm qeyd edilməsi ənənəsinin yaradılması, Azərbaycanın çoxəsrlik mənəvi-mədəni irsə sahib qədim diyar və sivilizasiyaların qovşağında yerləşən tolerantlıq məkanı kimi geniş şöhrət qazanması Heydər Əliyevin mükəmməl quruculuq proqramının tərkib hissələri olub.
Siyasi ekspert bildirib ki, bu gün fəxrlə vurğuladığımız və taleyüklü məsələlərdə, həlledici məqamlarda karımıza gələn mükəmməl xarici siyasətimiz də Ulu Öndərin əməyinin nəticəsidir. Rusiya, İran, Qərb ölkələri ilə əməkdaşlıq, beynəlxalq mötəbər qurum və təşkilatların imkanlarından istifadə, aparıcı aktor ölkələrin diqqətini Azərbaycana yönəltmək də Heydər Əliyevin xidmətləri sırasındadır. Bunu hətta düşmən tərəf də etiraf edir və vurğulayır ki, 44 günlük qalibiyyətimizin möhkəm təməlləri elə məhz Heydər Əliyev tərəfindən qoyulub, onun layiqli davamçısı Prezident İlham Əliyev isə bu müsbət işləri məntiqi sonluğa çatdırıb.
“Əlbəttə, “Heydər Əliyev İli” ilə bağlı təkliflərimi də qələmə almağı özümə rəva bilirəm. Məlumdur ki, paytaxt Bakı şəhəri daxil olmaqla, regionlarda Heydər Əliyev mərkəzləri fəaliyyət göstərir. Fikrimcə, “Heydər Əliyev İli” çərçivəsində həmin məkanlarda silsilə tədbirlər təşkil olunmalı, gənclərimiz, tələbələrimizin iştirakı təmin olunmalıdır. Ulu Öndərin keçdiyi yola nəzər salmaq, öyrənmək, araşdırmaq, gələcək nəsillərə ötürülmənin yollarının axtarmaq da bu sırada olmalıdır ki, növbəti illərdə Azərbaycana göz dikənlərə layiqli cavablar verilsin”, - deyən Telman İsa fikirlərini yekunlaşdırıb.