İDMAN


Tennis turnirində koronavirusa yoluxma qalmaqala çevrilib

Bakı, 25 iyun, AZƏRTAC

Xorvatiyanın Zadar şəhərində keçirilən turnirdə Novak Cokoviç, Qriqor Dimitrov və Borna Çoriçin koronavirusa yoluxması tennis aləmində böyük qalmaqala səbəb olub.

AZƏRTAC xəbər verir ki, təşkilatçıların səhlənkarlığı ucbatından tamaşaçıların tribunaya buraxılması nəticəsində virusun iştirakçılar, azarkeşlər, hətta jurnalistlər arasında yayılması ciddi müzakirələrə yol açıb. Novak Cokoviçin təşəbbüsü ilə test xarakterli turnirin təşkilatçıları bir-birlərini məsuliyyətsizlikdə ittiham etməyə başlayıblar. Bəziləri serbiyalı raketka ustasını belə bir yarış keçirdiyinə görə tənqid edir.

Tennisçinin atası Srcan isə Qriqor Dimitrovu qınayıb. Məsələ ondadır ki, yoxlanış zamanı əvvəlcə məhz Bolqarıstan idmançısında virus aşkarlanıb. Novakın atasının sözlərinə görə, özünü yoxlamadan Xorvatiyaya gələn Dimitrov Balkan yarımadasının əhalisinə xəyanət edib. Dimitrovun meneceri Georgi Stoymenov isə gileylənib ki, nəyə görə Qriqoru Belqrad və Zadarda yoxlamayıblar. Onun sözlərinə görə Serbiyaya gələndən əvvəl Qriqor 3 ay özünü cəmiyyətdən təcrid edib.

Böyük ehtimalla, virusa o, məhz bu turnirdə yoluxub. Belə olduqda isə məsuliyyəti təşkilatçılar daşıyır. Argentinalı tennisçi Qido Pelya da buna görə turnirin təşkilatçılarını günahlandırıb. O, belə vəziyyətdə tennis yarışları keçirməyin düzgün olmadığını deyib. Pelyanın fikrincə, insanları təhlükəyə saldığına görə Novak tennis dünyasına, ümumiyyətlə bütün bəşəriyyətə hörmətsizlik edib. Rusiyalı tennisçi Svetlana Kuznetsova isə bu qalmaqaldan sonra avqustda mövsümün bərpasına şübhə ilə yanaşdığını söyləyib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.