REGİONLAR


Tərtər rayonunda quşçuluqla məşğul olan kənd sakinlərinə təlim keçirilib

Bakı, 15 oktyabr, AZƏRTAC

Tərtər rayonunun Hacıqərvənd kəndində kənd sakinlərinin iştirakı ilə “Quşlarda çiçək və nyukasl xəstəliklərinin profilaktikası və mübarizə tədbirləri” mövzusunda təlim keçirilib.

Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsindən AZƏRTAC-a verilən məlumata görə, təlimdə çıxış edən Aqrar Xidmətlər Agentliyinin Tərtər Rayon Baytarlıq İdarəsinin rəisi Murad Cəfərov bildirib ki, cari ilin 9 ayı ərzində rayonda nyukasl xəstəliyinə qarşı 479808 baş cavan quşda “La-sota” vaksini, 354647 baş yaşlı quşda “H” vaksini ilə profilaktiki peyvəndləmə tədbirləri aparılıb. Təkcə Hacıqərvənd kəndində nyukasl xəstəliyinə qarşı 14995 baş cücədə “La-sota” vaksini, 19992 baş quşda “H” vaksini ilə profilaktiki peyvəndləmə tədbiri həyata keçirilib.

Təlimdə fermerlərə nyukasl və çiçək xəstəlikləri, xəstəliklərin etiologiyası, patogenizi, kliniki əlamətləri, davamlılığı və mübarizə tədbirləri barədə geniş məlumat verilib, həmçinin nyukasl xəstəliyinin diaqnostikası, profilaktikası və ləğvinin dövlət vəsaiti hesabına, çiçək xəstəliyinin isə vətəndaşın öz vəsaiti hesabına aparıldığı bildirilib. Eyni zamanda, təsərrüfat sahibləri ev quşlarının saxlanması, bəslənməsi və infeksion xəstəliklərdən qorunması üçün əlavə tədbirlər barədə maarifləndiriliblər.

Təlim zamanı bütün infeksion xəstəliklərdən qorunmaq məqsədi ilə quşçuluqda istifadə olunan damların, alətlərin, yem və su qablarının baytarlıq-sanitariya cəhətdən steril olması üçün vaxtlı-vaxtında dezinfeksiya və dezinseksiya işlərinin aparılmasının vacibliyi diqqətə çatdırılıb. Bildirilib ki, quşlar yemlənən zaman yemlərin tərkibində olan vitaminlərin və mineral maddələrin yemdə norması quşların tələbatına uyğun olaraq verilməlidir. Quşların saxlanılması zamanı vitamin və mineral maddələrin çatışmazlığı orqanizmin immun zəifliyinə səbəb olur ki, bu da müxtəlif infeksion və digər xəstəliklərin yoluxma riskini artırır.

Sonda kənd sakinlərini maraqlandıran suallar cavablandırılıb və geniş fikir mübadiləsi aparılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.