REGİONLAR
Tərtər şəhərində küçələrdən birinə “Azərbaycan Bayrağı” ordenli şəhid Mehrac Mahmudovun adı verilib
Tərtər, 24 iyun, Tahir Ağaməmmədov, AZƏRTAC
Tərtər şəhərindəki küçələrdən birinə respublikamızın ərazi bütövlüyü uğrunda gedən döyüşlərdə qəhrəmanlıqla həlak olmuş “Azərbaycan Bayrağı” ordenli Mehrac Mahmudovun adı verilib.
AZƏRTAC xəbər verir ki, bu münasibətlə iyunun 24-də rayon ictimaiyyətinin nümayəndələrinin, şəhidin ailə üzvlərinin və döyüş yoldaşlarının, hərbçilərin iştirakı ilə mərasim keçirilib.
Əvvəlcə torpaqlarımız uğurunda şəhid olan Vətən övladlarının xatirəsi bir dəqiqəlik sükutla yad edilib.
Rayon icra hakimiyyətinin başçısı Müstəqim Məmmədov şəhidin qəhrəmanlıqla dolu döyüş yolundan danışıb. Məlumat verilib ki, Mehrac Mahmudov 1958-ci il yanvarın 17-də Tərtər rayonunun Səhləbad kəndində anadan olub. Orta məktəbi bitirdikdən sonra 1977-1979-cu illərdə keçmiş Sovet Ordusu sıralarında həqiqi hərbi xidmət keçib. Ermənilərin torpaqlarımıza təcavüzü başlayanda M.Mahmudov “Tərtər” özünümüdafiə batalyonuna yazılıb. Tərtər və Ağdam rayonları istiqamətlərində gedən döyüşlərdə şücaət göstərib. 1994-cü il aprelin 23-də Ağdam rayonunun İlxıçılar kəndi uğrunda gedən döyüşdə şəhid olub. Göstərdiyi xüsusi xidmətlərinə və şücaətinə görə 1998-ci il iyunun 24-də “Azərbaycan Bayrağı” ordeni ilə təltif olunub.
Qarabağ Müharibəsi veteranlarına, şəhid ailələrinə dövlət tərəfindən göstərilən diqqət və qayğıdan danışan M.Məmmədov bildirib ki, Tərtərdə Qarabağ müharibəsi əlilləri və şəhid ailələri üçün iki 16, bir 24, bir 54 mənzilli yaşayış binaları, həmçinin fərdi evlər tikilib istifadəyə verilib. Onlarla əlil avtomobil və əlil arabası ilə təmin olunub.
Qeyd edilib ki, bu yaxınlarda Tərtər şəhərində Azərbaycanın Milli Qəhrəmanı Mübariz İbrahimovun və şəhid İlqar Həsənovun adları verilmiş küçələrin də açılışı olacaq.
Mehrac Mahmudovun oğlu Ziya Mahmudov, bacısı Validə Mahmudova, keçmiş döyüşçülər, hərbçilər çıxış edərək, Qarabağ müharibəsi veteranlarına, əlillərə və şəhid ailələrinə göstərilən diqqət və qayğıya görə Prezident İlham Əliyevə minnətdarlıqlarını bildiriblər.
Sonra mərasim iştirakçılarının alqış sədaları altında Mehrac Mahmudovun adını daşıyan küçəyə vurulmuş barelyefin üzərindən ağ örtük götürülüb.