REGİONLAR
Tərtərdə aqrar sahənin inkişafı diqqət mərkəzində saxlanılır
Tərtər, 20 aprel, Tahir Ağaməmmədov, AZƏRTAC
Tərtər rayonunun iqtisadiyyatında aparıcı yer tutan aqrar sahənin inkişafı daim diqqət mərkəzində saxlanılır. Cari ilin birinci rübündə rayonda 7 milyon 117,9 min manatlıq kənd təsərrüfatı məhsulları istehsal edilib. Aqrar sahədə bundan sonra da yüksək nailiyyətlər əldə etmək üçün məqsədyönlü işlər görülür.
AZƏRTAC-ın bölgə müxbiri xəbər verir ki, bu barədə Tərtər rayonunda 2018-ci ilin birinci rübünün yekunlarına həsr olunan hesabat yığıncağında məlumat verilib.
Rayon icra hakimiyyətinin başçısı Müstəqim Məmmədovun məruzəsində bildirilib ki, 2018-ci ilin məhsulu üçün 3 min 133,4 hektar sahədə yazlıq bitkilərin səpini aparılıb. Bunun 803,7 hektarı şəkər çuğunduru, 451 hektarı günəbaxan, 751 hektarı yonca, 481,4 hektarı kartof, 542,3 hektarı tərəvəz, 22 hektarı dən üçün qarğıdalı, 9 hektarı yem üçün sorqo və s.dir. Bu il rayonda 3300 hektar sahədə pambıq becərilməsi nəzərdə tutulub. Hazırda rayonda yaz-tarla işləri, o cümlədən çiyid səpini davam etdirilir.
Diqqətə çatdırılıb ki, ilin üç ayında rayonun sosial-iqtisadi inkişafının sürətləndirilməsi, iqtisadiyyatın daha da möhkəmləndirilməsi, infrastrukturun inkişaf etdirilməsi, sahibkarlığın dəstəklənməsi, əhalinin problemlərinin həlli və yaşayış məntəqələrinin abadlaşdırılması sahəsində tədbirlər uğurla həyata keçirilib. Bu dövrdə rayonda ümumi məhsul buraxılışının həcmi 27,8 milyon manat olub. Bu, ötən ilin müvafiq dövrünə nisbətən 0,7 faiz çoxdur. Əvvəlki ilin müvafiq dövrünə nisbətən kənd təsərrüfatı məhsulları istehsalı 2,6 faiz, sənaye məhsulları istehsalı 4,1 faiz artıb. Bütün maliyyə mənbələri hesabına əsas kapitala 3 milyon 706,1 min manat investisiya yönəldilib, 3 milyon 522,7 min manatlıq tikinti-quraşdırma işləri aparılıb. Rüb ərzində 117-si daimi olmaqla, 537 yeni iş yeri açılıb.
Hesabat dövründə Tərtər şəhər 6 nömrəli tam orta və Qazyan kənd ümumi orta məktəblərinin binalarında əsaslı təmir işləri başa çatdırılıb. Rayon mərkəzində Olimpiya İdman Kompleksinin, 100 yerlik körpələr evi-uşaq bağçasının tikintisinə, 20 ədəd çoxmənzilli yaşayış binasının fasad hissələrinin və giriş bloklarının əsaslı təmirinə, Nicat İsgəndərov, Nəriman Nərimanov və Mehdi Hüseynzadə küçələrində abadlıq və yenidənqurma işlərinə başlanılıb. Rayonun Buruc-Güləbatlı-Xoruzlu-Kəbirli-Bayandurlu-Qaradağlı kəndlərarası avtomobil yolunun yenidən qurulması işləri də həyata keçirilir. Ekoloji tarazlığın qorunması məqsədilə Bərdə, Ağdam və Gəncə istiqamətində yol kənarlarında və rayonun yaşayış məntəqələrində, meşə zolaqlarında 8,5 mindən çox müxtəlif növ ağac, 1,5 min gül, 500 min ədəd həmişəyaşıl kollar əkilib. Həmçinin Tərtər şəhərində Bayraq Muzeyinin, rayon icra hakimiyyətinin inzibati binasının, xalça istehsalı emalatxanasının tikintisi üçün torpaq sahəsi ayrılıb.
Yığıncaqda təhsil, səhiyyə, mədəniyyət, idman və digər sahələrdə həyata keçirilən tədbirlərdən, elektrik enerjisi, rabitə, təbii qaz, içməli və təsərrüfat suyu ilə təminat istiqamətində görülən işlərdən də bəhs edilib, mövcud problemlərin aradan qaldırılması yollarından danışılıb.