REGİONLAR


Tərtərli pambıqçılar məhsuldarlığa görə ön sıradadırlar

Tərtər, 19 oktyabr, Tahir Ağaməmmədov, AZƏRTAC

Cari ilin məhsulu üçün 3300 hektar sahədə pambıq becərən tərtərli fermerlər və torpaq mülkiyyətçiləri hazırda məhsul yığımını davam etdirirlər. Ötən il 3123 hektar sahədən 8419,9 ton məhsul tədarük edərək orta məhsuldarlığa görə respublikanın pambıqçılıq rayonları arasında ön sırada dayanan Tərtər pambıqçıları bu ili də yüksək göstəricilərlə başa vurmağı qarşıya məqsəd qoyublar.

Tərtər Rayon İcra Hakimiyyətindən AZƏRTAC-ın bölgə müxbirinə bildiriblər ki, bu günə qədər tarlalardan 4860 ton məhsul toplanıb. Yığılan pambıq “MKT İstehsalat Kommersiya” MMC və “Azərpambıq” MMC-yə təhvil verilir.

“MKT İstehsalat Kommersiya” MMC-nin Tərtər filialı 649 fermerlə müqavilə bağlayıb

“MKT İstehsalat Kommersiya” MMC-nin Tərtər filialının direktoru Feruz Hacıyev tarlalarda məhsulun ötən ildəkindən də çox olduğunu bildirib: “Bu il 649 fermerlə 1667 hektar sahədə pambıq becərilməsi üçün müqavilə bağlanıb. Becərmə işləri bütün aqrotexniki qaydalara əsasən aparılıb. Tarlaların vəziyyəti qənaətbəxşdir. Barlı kollar yetişib. Əsas məqsədimiz hər hektardan yüksək məhsul götürməkdir. Dövlətimizin başçısı da Nazirlər Kabinetinin iclasında bu məsələyə toxunaraq, məhsuldarlığın artırılmasını əsas vəzifə kimi müəyyənləşdirdi. Odur ki, biz də məhsuldarlığın hər il daha da yüksəldilməsinə çalışırıq. Ötən il hər hektardan orta hesabla 28,9 sentner məhsul götürmüşdük. Bu il isə məhsuldarlığın 31 sentnerdən çox olacağını gözləyirik. Pambıq yığımına 8 ədəd kombayn, 20 ədəd traktor, 44 ədəd qoşqu cəlb edilib. Tarlalardan hər gün 200 tondan çox "ağ qızıl" toplanaraq filiala gətirilir. Artıq bu günədək 3515 ton məhsul tədarük olunub".

Qəbul məntəqəsinə gətirilən xam pambıqdan əvvəlcə nümunələr götürülür, laboratoriyada nəmlik və təmizlik göstəriciləri müəyyən edilir. Tam qurudulmuş pambıq sexdə emal olunur. Bu zaman pambıq tullantılardan təmizlənir, mahlıc çiyiddən ayrılır. Mahlıc preslənir, çiyid isə toxum anbarına yığılır.

“Pambıq yığımının sonunadək hər hektarın məhsuldarlığının 60 sentnerə çatacağını gözləyirəm”

Pambıq qəbulu məntəqəsinə məhsul təhvil verən Yuxarı Qapanlı kənd sakini Kərim Məmmədov ötən il olduğu kimi, bu il də yüksək məhsuldarlığa nail olduğunu bildirib: "Hələ kolxoz dövründən pambıqçılıqla məşğul olmuşam. Pambığa düzgün qulluq etdiyim üçün hər zaman məhsulum bol olub. Keçən il də 3 hektar sahədə pambıq becərib, hər hektardan 40 sentner məhsul götürdüm. Altı min manat təmiz gəlirim oldu. Bu il isə pambıq əkini sahəsini bir qədər də genişləndirib, 5 hektarda bol məhsul yetişdirmişəm. Artıq birinci yığımı başa çatdırıb, hər hektardan 40 sentner məhsul götürmüşəm. Pambıq yığımı mövsümünün sonunadək hər hektarın məhsuldarlığının 60 sentnerə çatacağını gözləyirəm. Hektarın məhsuldarlığının daha yüksək olması, həmçinin dövlət tərəfindən pambığın hər kiloqramına 10 qəpik subsidiya verilməsi, alış qiymətinin hər tona görə 50 manat artırılması sayəsində bu il qazancım daha çox olacaq. İnşallah, gələn il pambıq sahələrini daha da artıracağam", – deyə fermer bildirib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.