Naxçıvan, 18 sentyabr, AZƏRTAC

Muxtar respublikada heyvandarlıqla məşğul olan ailə təsərrüfatları əlverişli şəraitdən yararlanır, fəaliyyətlərini daha da genişləndirirlər. İstehsal etdiyi məhsulları ilə alıcı rəğbəti və etimadını qazanan, işini günün tələbləri səviyyəsində qurmağa səy göstərən ailə təsərrüfatı sahiblərindən biri də Babək rayonunun Çeşməbasar kənd sakini Asif Qasımovdur.

AZƏRTAC-ın Naxçıvan bürosu xəbər verir ki, Asif Qasımov 20 başdan çox iribuynuzlu mal-qara saxlayır. On beş ildən artıqdır təsərrüfatla məşğuldur. Heyvandarlıq xüsusi zəhmət tələb edən kənd təsərrüfatı sahələrindən olsa da, gün-güzəranını bu işin hesabına quran Asif Qasımov deyir ki, sovetlər dönəmində aqrar sahə ilə məşğul olan bütün təsərrüfat adamları çətinliklərlə üzləşirdilər. Çünki özlərinə aid bir mal-qara və yaxud torpaq sahəsi yox idi. Ölkəmiz müstəqillik əldə etdikdən sonra hər bir kəndli öz torpağının sahibi oldu.

Süni mayalanma yolu ilə artıq bir neçə baş buzovun doğulduğunu bildirən təsərrüfatçı bu yolla doğulan hər buzova görə dövlətimiz tərəfindən 100 manat subsidiyanın verilməsindən də razılıqla danışıb, göstərilən diqqət və qayğıya görə minnətdarlığını bildirib.

“Bizə qayğı göstərən dövlətimiz sağ olsun, torpağımızı istədiyimiz kimi əkib-becərir, bol məhsul əldə edirik. Zəhmətlə, işgüzarlıqla hər şeyə nail olmaq mümkündür. Dövlətimiz tərəfindən zəhmətsevər insanlara verilən dəstək bizi öz təsərrüfatımızı daha da genişləndirməyə həvəsləndirir”, - deyən təsərrüfatçı 25 xırdabuynuzlu heyvan da saxladığını bildirib. O, ailə təsərrüfatçısı kimi Naxçıvanda keçirilən yarmarka və festivallara qatılaraq, istehsal etdiyi məhsulları satıb yaxşı gəlir qazanıb.

Süd məhsullarına tələbatın çox olduğunu deyən təsərrüfatçı qeyd edib ki, istehsal etdiyi süd, qatıq və pendiri Naxçıvan şəhərində yaradılan ailə təsərrüfatı məhsulları mağazasına, Babək rayonunda dükanlara verir. Bununla dolanışığını təmin etməklə yanaşı, süd və süd məhsullarına tələbatın ödənilməsinə də töhfə verməyə çalışır.

Asif Qasımov onu da deyib ki, təsərrüfat adamına boş dayanmaq yaraşmaz. Nə qədər gücün çatır, bir o qədər çox işlə məşğul olmalısan: “Mən heyvandarlıqla yanaşı, həm də uzun illərdir ki, əkinçiliklə məşğulam. Bu il 9 hektar sahədə buğda, arpa əkmişdim, məhsul da ürəyimcə oldu. Bundan əlavə, heyvanlara tədarük üçün 3 hektardan artıq ərazidə yonca, satış üçün tərəvəz və bostan bitkiləri də becərirəm”.

Bu gün ölkəmizdə olduğu kimi, onun ayrılmaz tərkib hissəsi olan muxtar respublikamızda da hər bir kəndli göstərilən dövlət dəstəyini öz üzərində hiss etdikcə daha çox zəhmətə qatlaşır, əkib-becərdiyi torpağına sıx tellərlə bağlanır. Yaradılmış şəraitdən layiqincə istifadə edən belə təsərrüfat sahibləri öz təsərrüfatlarını daha da genişləndirirlər.