MƏDƏNİYYƏT
Tokio Türk Mədəniyyət Mərkəzi Yaponiyada türk xalqlarının mədəniyyətlərini təbliğ edir VİDEO
Tokio, 12 iyul (AZƏRTAC). Tokioda yerləşən Türk Mədəniyyət Mərkəzinin rəhbəri Abdulla Saqqallı bildirmişdir ki, onun rəhbərlik etdiyi qurum Yaponiyada bütün türk xalqlarının mədəniyyətinin təbliği ilə məşğuldur.
AZƏRTAC-ın Yaponiyadakı xüsusi müxbirinə müsahibə verən A.Saqqallı qeyd etmişdir ki, qurum 1997-ci ildə Türkiyə və Orta Asiya Mədəniyyət Mərkəzi kimi fəaliyyətə başlamışdır. Mərkəzdə 16 dil tədris olunmuşdur. Burada türk dili ilə yanaşı, arzu edənlər üçün Azərbaycan, özbək, qazax və qırğız dilləri də öyrədilmişdir. Lakin hazırda həmin dilləri öyrədən mütəxəssislər olmadığından, mərkəzdə yalnız türk dili tədris edilir. İndiyədək dil kurslarında 10 minə yaxın şəxsə türk dili öyrədilmişdir.
Mərkəzin Tokionun məşhur ticarət mərkəzlərindən biri olan Şincukuda 150 kvadratmetrlik sahədə yerləşdiyini deyən A.Saqqallının sözlərinə görə, burada türk əl işləri, ebru sənəti, tətbiqi sənət və miniatür, saz ifaçılığı, türk mətbəxi və digər kurslar da fəaliyyət göstərir. Müəllimlərin əksəriyyəti türklər olsa da, onlarla birlikdə mərkəzdə Türkiyədə müxtəlif sənətləri öyrənmiş yaponlar da çalışırlar. Məsələn, yerli əhalinin xüsusi maraq göstərdiyi saz və ebru sənətini tədris edən müəllimlər bu sənətlərə Türkiyədə yiyələnmiş yaponlardır. Yeri gəlmişkən, qeyd edək ki, saz ifaçılığı müəllimi Kiyoşi Ohira Azərbaycanın saz musiqi alətində də çox məharətlə ifa edir, Azərbaycan mahnılarını və saz havalarını yaxşı bilir. O, artıq 11 ildir ki, mərkəzdə saz və ud ifaçılığı sənətini tədris edir. Hazırda saz ifaçılığı kurslarında 15 nəfər müdavim vardır.
Mərkəzin rəhbəri bildirmişdir ki, burada Quran xətt sənəti kursları da fəaliyyət göstərir. Sözügedən kursları tədris edən müəllim də milliyyətcə yapondur. Hazırda 5 nəfər bu sənəti öyrənir.
Yaponların türk mətbəxinə böyük maraq göstərdiklərini qeyd edən Abdulla Saqqallı, mərkəzdə ayda bir dəfə türk yemək kurslarının da təşkil edildiyini bildirmişdir. Həmin kurslarda 5 növ yeməyin hazırlanmasının öyrədildiyini diqqətə çatdıran A.Saqqallı, hazırda kursda 30 nəfərin bu işi öyrəndiyini söyləmişdir.
Yaponların kilim toxuma sənətinə marağı nəzərə alınaraq, mərkəzdə belə bir kurs da təşkil edilmişdir. Həmin sənəti öyrənmək istəyənlər 26 ildir Yaponiyada yaşayan Həsən bəyin kurslarında təhsil alırlar. Kilim toxuma dəzgahları isə Yaponiyada hazırlanır.
Mərkəzdə yeni kursların açılması məqsədi ilə iş aparıldığını bildirən A.Saqqallı bu sırada çini qabların düzəldilməsi üçün kursun təşkili ilə bağlı danışıqların aparıldığını da qeyd etmişdir.
Türk mədəniyyətinin təbliği məqsədi ilə mərkəzdə digər işlərin görüldüyünü də vurğulayan A.Saqqallı iki ayda bir dəfə yapon alt yazısı ilə türk filmlərinin göstərildiyini demişdir. Yaponlar tərəfindən böyük maraqla qarşılanan filmlər mərkəz tərəfindən hazırlanır.
Bundan əlavə, iki ayda bir dəfə “Türk qəhvəaltısı” da təşkil edilir. Buraya əsasən, kursların iştirakçıları ilə yanaşı, Yaponiyada yaşayan qarışıq ailələr dəvət edilirlər.
Mərkəz qədim adət-ənənələrin təbliğinə də xüsusi diqqət yetirir. Toy ərəfəsində təşkil edilən xına gecəsi, mantı və çiy küftə ziyafətləri yaponlar tərəfindən xüsusi maraqla qarşılanır. Ramazan ayında həm mərkəzdə, həm də ailələrdə təşkil edilən iftar süfrələri də türk mədəniyyətinin təbliği baxımından əhəmiyyətlidir.
İldə iki dəfə təşkil edilən pikniklər barədə danışan mərkəzin rəhbəri bildirmişdir ki, məqsəd yapon və türk xalqlarını biri-birinə daha da yaxınlaşdırmaqdır. Belə tədbirlərdə 100-dən artıq insan iştirak edir.
İldə bir dəfə Türkiyədə təşkil edilən “Sənət gəzintiləri” də mərkəzin üzvləri tərəfindən maraqla qarşılanır. Bu səfərlər zamanı iştirakçılar müxtəlif sənət növləri ilə, məsələn ötən il xətt və ebru, bu il isə mətbəx və əl işləri ilə yerində tanış olmuş, müəyyən biliklər almışlar.
Rəhbərlik etdiyi qurumun müxtəlif olimpiadalara qatıldığını diqqətə çatdıran A.Saqqallı bildirmişdir ki, sonuncu “Mənim Türkiyəm” olimpiadasında mərkəzdən 199 nəfər iştirak etmişdir.
Türk Mədəniyyət Mərkəzinin yalnız Tokioda deyil, eyni zamanda, Senday, Naqoya, Osaka və Ohayama kimi şəhərlərdə də fəaliyyət göstərdiyini qeyd edən A.Saqqallı bununla daha çox yaponların türk mədəniyyətini öyrənmək imkanı qazandıqlarını bildirmişdir.
Vüqar Ağayev
AZƏRTAC-ın xüsusi müxbiri
Tokio