SİYASƏT


Tokioda Azərbaycanın və Yaponiyanın Xarici İşlər nazirlikləri arasında siyasi məsləhətləşmələr keçirilib

Tokio, 27 noyabr, AZƏRTAC

Tokioda Azərbaycanın və Yaponiyanın Xarici İşlər nazirlikləri arasında siyasi məsləhətləşmələr keçirilib.

AZƏRTAC xəbər verir ki, məsləhətləşmələrdə Azərbaycan tərəfini Xarici işlər nazirinin müavini Ramiz Həsənov, Yaponiya tərəfini isə Xarici İşlər Nazirliyinin Avropa məsələləri bürosunun baş direktorunun müavini, Mərkəzi Asiya, Qafqaz və GUAM üzrə xüsusi nümayəndə, səfir Hideki Uyama təmsil edib.

H.Ueyama qeyd edib ki, ötən il ərzində iki ölkə arasında münasibətlər yüksələn xətlə inkişaf edib, bir sıra yüksək səviyyəli qarşılıqlı səfərlər həyata keçirilib. Vurğulayıb ki, Azərbaycan-Yaponiya XİN-lər arası siyasi məsləhətləşmələr ölkələrimiz arasında siyasi dialoqun dərinləşməsi, müxtəlif məsələlər üzrə fikir mübadiləsinin aparılması üçün yaxşı zəmin yaradır. Yaponiya Azərbaycan ilə münasibətlərə xüsusi önəm verir ki, bu da ölkəmizin Cənubi Qafqazda ən vacib dövlət olmasından, Azərbaycanın regionda sabitliyin və sülhün bərqərar edilməsində mühüm rol oynamasından irəli gəlir.

R.Həsənov öz növbəsində iki ölkə arasında münasibətlərin yüksək səviyyədə olduğunu qeyd edib, əməkdaşlığımızın daha da inkişaf etdirilməsinin vacibliyini vurğulayıb. İki ölkə arasında mütəmadi siyasi məsləhətləşmələrin aparılmasında və beynəlxalq, həmçinin regional təşkilatlar çərçivəsində mövqelərin uyğunlaşdırılması məqsədilə dialoqun davam etdirilməsində Azərbaycanın maraqlı olduğu qeyd edib.

Azərbaycan ilə Yaponiya arasında enerji sahəsində əməkdaşlığın hazırkı səviyyəsindən məmnunluq ifadə edən R.Həsənov bununla yanaşı, qeyri-enerji sektorunda yüksək potensialın mövcudluğunu nəzərə alaraq, kənd təsərrüfatı, turizm, sənaye, nəqliyyat, informasiya texnologiyaları, səhiyyə, təhsil, idman və əczaçılıq sahələrində əməkdaşlığın inkişafı ilə bağlı birgə səylərin artırılmasının zəruriliyini qeyd edib.

Cənubi Qafqazda davam edən münaqişələrin, xüsusilə Ermənistan-Azərbaycan Dağlıq Qarabağ münaqişəsinin regionun sabitlik və təhlükəsizliyini təhdid etdiyini vurğulayan nazir müavini problemin həlli ilə bağlı görülən işlər barədə də qarşı tərəfi geniş şəkildə məlumatlandırıb.

R.Həsənov BMT Təhlükəsizlik Şurasının münaqişənin Azərbaycanın suverenliyi və ərazi bütövlüyü əsasında həllini tələb edən müvafiq qətnamələrinin yerinə yetirilməsi ilə bağlı beynəlxalq birliyin səylərinin artırılmasının vacibliyini vurğulayıb. Qeyd edib ki, məsələnin həll olunmamasına Ermənistan tərəfinin qeyri-konstruktiv mövqeyi, yüksək səviyyəli danışıqlar zamanı əldə edilmiş razılaşmalara əməl etməməsi və Azərbaycana qarşı ikili standartların tətbiq olunması maneçilik törədir.

R.Həsənovun BMT Təhlükəsizlik Şurasının Ermənistan-Azərbaycan Dağlıq Qarabağ münaqişəsi ilə bağlı müvafiq qətnamələrinin yerinə yetirilməməsi məsələsinə Yaponiya tərəfinin mövqeyinə dair sualına cavab olaraq H.Uyama BMT TŞ-nin qətnamələrinin həyata keçirilməsinin vacibliyini bildirib.

H.Uyama Dağlıq Qarabağ münaqişəsinin həllinin Qafqaz regionunda sülh və stabillik üçün çox vacib olduğunu, bununla əlaqədar ölkəsinin ATƏT-in Minsk qrupu həmsədrlərinin vasitəçilik səylərini dəstəklədiyini bəyan edib, məsələnin tezliklə beynəlxalq hüququn prinsiplərinə uyğun olaraq sülh yolu ilə həllini arzulayıb.

Görüşdə Azərbaycanın Yaponiyadakı müvəqqəti işlər vəkili Fərid Talıbov və Xarici İşlər Nazirliyinin kadrlar idarəsinin rəisi Gürsel İsmayılzadə də iştirak ediblər.

Vüqar Ağayev

AZƏRTAC-ın xüsusi müxbiri

Tokio

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.