İQTİSADİYYAT


Tokioda keçirilən “JATA-2017” beynəlxalq turizm sərgisində Azərbaycan da təmsil olunur  VİDEO

Tokio, 23 sentyabr, AZƏRTAC 

Sentyabrın 22-də Yaponiya paytaxtının möhtəşəm “Tokyo Big Sight” sərgi salonunda "JATA Tourizm EXPO Japan - 2017" beynəlxalq turizm sərgisi fəaliyyətə başlayıb.

Açılış mərasiminə Yaponiya hökumətinin rəsmiləri, bu ölkədəki diplomatik korpusun nümayəndələri, iştirakçı ölkələrin turizm şirkətlərinin rəhbərləri qatılıblar.

Yaponiya Milli Turizm Təşkilatının prezidenti Ryoiçi Matsuyama, Nazirlər Kabinetinin baş katibi Yoşohide Suqa, torpaq, infrastruktur, nəqliyyat və turizm naziri Keiçi İişi çıxış edərək qonaqları və sərgi iştirakçılarını salamlayıblar. Bildirilib ki, artıq ənənə şəkli almış turizm sərgisində dünyanın 170-dən çox ölkəsindən 700-dən artıq şirkət iştirak edir. Bu, qarşıya 2020-ci ilədək ölkəyə gələn turistlərin sayını 40 milyona çatdırmaq vəzifəsi qoyan Yaponiya üçün böyük uğurdur. Natiqlər əminliklə qeyd ediblər ki, sərgi qarşılıqlı əlaqələrin inkişafı və əməkdaşlığın möhkəmlənməsi üçün əlverişli imkan yaradacaq.

Dünyanın ən böyük turizm sərgilərindən hesab olunan “JATA-2017”də ilk dəfə olaraq Azərbaycan GUAM ölkələrinin birlikdə təmsil olunduğu pavilyonda ziyarətçilərə təqdim edilib. Ölkəmizi sərgidə Mədəniyyət və Turizm Nazirliyinin nümayəndə heyəti təmsil edir. Nümayəndə heyətinin tərkibinə nazirliyin əməkdaşları ilə yanaşı, “Azərbaycan Guide Travel” turizm şirkətinin nümayəndələri də daxildir.

GUAM Katibliyinin iqtisadi məsələlər üzrə proqram koordinatoru Səbuhi Temirov AZƏRTAC-ın Yaponiyadakı xüsusi müxbirinə bildirib ki, sərgidə Azərbaycanın turizm məhsulları ilk dəfə GUAM ölkələri üçün ayrılmış ümumi pavilyonda nümayiş etdirilir. GUAM-ın işçi qrupu tərəfindən üzv ölkələrin sərgidə birlikdə təqdim edilməsinin daha böyük maraq doğura biləcəyi nəzərə alınaraq ilk dəfə belə bir addım atılıb. Bununla əlaqədar, təşkilatçılar ölkələrimizin turizm potensialı barədə ziyarətçilərə daha ətraflı məlumat vermək üçün xüsusi proqram hazırlayıblar. Həmin proqramın məqsədi GUAM ölkələrinin, o cümlədən Azərbaycanın turizm potensialı barədə ziyarətçilərdə tam təsəvvür yaratmaqdır. Turizmi sevən yaponlar üçün ölkələrimiz yeni istiqamət kimi qəbul edilir və həmin istiqamətə maraq günbəgün artır. Növbəti mərhələ kimi yapon media nümayəndələrinin GUAM ölkələrinə səfərlərinin planlaşdırıldığını qeyd edən S.Temirov bildirib ki, bu addım Yaponiyada ölkələrimizin turizm potensialını tanıtmaq baxımından əhəmiyyətli olacaq.

Sərgi çərçivəsində keçirilən seminarda Azərbaycanın Yaponiyadakı səfirliyinin müşaviri Fərid Talıbov ölkəmizin iqtisadi uğurları, əldə edilən nailiyyətlər, eyni zamanda, turizm potensialı barədə ətraflı məlumat verib. O bildirib ki, son illər sürətlə inkişaf edən Azərbaycan möhtəşəm turizm infrastrukturu yaratmağa nail olub. Təbii əsrarəngizliyi, qədim tarixi abidələri, zəngin musiqi və mətbəx mədəniyyəti ilə seçilən ölkəmizdə hazırda müasir və rahat otellər şəbəkəsi yaradılıb, yeni yollar çəkilib.

Sərgiyə gələn ziyarətçilər Azərbaycanın da təmsil olunduğu GUAM-ın pavilyonuna xüsusi maraq göstərirlər. Onlara ölkəmizin turizm potensialı barədə ingilis və yapon dillərində müxtəlif reklam-çap məhsulları təqdim olunur.

Azərbaycan nümayəndə heyətinin doqquzuncu dəfə qatıldığı sərgi sentyabrın 25-də başa çatacaq.

Vüqar Ağayev

AZƏRTAC-ın xüsusi müxbiri

Tokio

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.