SİYASƏT
Tokionun “Citizens School” beyin mərkəzində Azərbaycan haqqında təqdimat keçirilmişdir VİDEO
Tokio, 31 yanvar (AZƏRTAC). Yanvarın 30-da Yaponiya parlamentinin Tokiodan seçilmiş deputatı, hakim Liberal Demokratik Partiyanın (LDP) üzvü Haruyasu Tateişinin dəvəti ilə Azərbaycanın bu ölkədəki səfiri Gürsel İsmayılzadə “Citizens School” beyin mərkəzində ölkəmiz barədə təqdimatla çıxış etmişdir.
H.Tateişinin təsisçisi olduğu “Citizens School” beyin mərkəzində G.İsmayılzadə çıxış edən ilk əcnəbi səfir olmuşdur.
Tədbirdə Yaponiya parlamentinin üzvləri, iş adamları və Tokio ictimaiyyətinin nümayəndələri iştirak etmişlər.
G.İsmayılzadə təbdir iştirakçılarını 2020-ci il Yay Olimpiya Oyunlarının Tokioda keçirilməsi münasibətilə təbrik etmişdir. Səfir bu Olimpiya Oyunlarının keçiriləcəyi namizəd şəhərlər siyahısında Azərbaycanın paytaxtı Bakının da olması barədə məlumat vermiş, 2015-ci ildə ilk Avropa Oyunlarının Azərbaycanda keçiriləcəyini diqqətə çatdırmışdır. Səfir, həmçinin UNESCO-nun Bakıda keçirilmiş beynəlxalq konfransında yapon milli mətbəxi “Vaşoku”nun bu təşkilatın qeyri-maddi mədəni irs siyahısına salınması münasibətilə də təbriklərini çatdırmışdır.
Sonra Azərbaycan, onun tarixi, ölkə rəhbərliyinin daxili və xarici siyasəti, respublikamızın son illər əldə etdiyi iqtisadi uğurlar, həyata keçirilmiş islahatlar barədə ətraflı məlumat verilmişdir. Səfir ölkə rəhbərliyi tərəfindən görülmüş işlər nəticəsində Azərbaycanın sabit siyasi sistemə malik demokratik dövlətə çevrildiyini bildirmişdir. Prezident İlham Əliyevin rəhbərliyi ilə həyata keçirilən uğurlu iqtisadi siyasət nəticəsində son illər ümumi daxili məhsulun bir neçə dəfə artmasından, ölkəyə sərmayə qoyuluşu üçün əlverişli mühit yaradılmasından bəhs olunmuşdur.
G.İsmayılzadə 2013-cü il oktyabrında Azərbaycanda keçirilmiş prezident seçkiləri haqqında tədbir iştirakçılarını məlumatlandırmış, seçkilərinin azad, ədalətli və şəffaf, beynəlxalq təşkilatlar və müstəqil müşahidəçilərin də qeyd etdikləri kimi, qanun pozuntusu olmadan, demokratik şəkildə keçirildiyini, Azərbaycan xalqının səsvermə prosesində fəal iştirak etdiyini və texniki təminatın yüksək səviyyədə olduğunu bildirmişdir.
`Azərbaycanın coğrafi mövqeyinin ölkənin tarixinə və xarici siyasət istiqamətlərinin formallaşmasına təsiri barədə məlumat verən diplomat regional sabitliyin əsasında bölgə dövlətləri arasında qarşılıqlı faydalı münasibətlərin dayandığını bildirmişdir. Bu xüsusda, Azərbaycanın öz qonşuları Gürcüstan və Türkiyə ilə əlaqələrinin nümunəvi olduğu qeyd edilmişdir. Regionun hərtərəfli inkişafında əsas maneənin Ermənistan-Azərbaycan, Dağlıq Qarabağ münaqişəsi olduğu bildirilmiş, Ermənistanın Azərbaycan ərazisinin 20 faizini işğal etməsi nəticəsində bir milyondan çox azərbaycanlının qaçqın və məcburi köçkünə çevrilməsi haqda məlumat verilmişdir. Münaqişənin tarixi, səbəbləri və danışıqlar prosesinin hazırkı durumuna toxunan səfir problemin həllində ölkəmizin tutduğu ədalətli mövqe barədə də iştirakçıları məlumatlandırmışdır. Bildirilmişdir ki, Ermənistan hakimiyyətinin qeyri-konstruktiv mövqeyi nəticəsində bu dövlət regional inteqrasiya proseslərindən tamamilə kənarda qalmışdır.
Sonra Qərb ilə Şərqin kəsişməsində yerləşən Azərbaycanın siyasi və strateji üstünlükləri barədə məlumat verilmiş, ölkəmizin yalnız əlverişli nəqliyyat dəhlizi deyil, həmçinin mədəniyyətlərarası dialoqda vacib rol oynayan bir dövlət kimi tanındığı bildirilmişdir. Azərbaycanın tolerantlıq nümunəsi olduğu, müxtəlif mədəniyyətlərin, dini konfessiyaların dinc yanaşı yaşadığı məkana çevrildiyi qeyd edilmişdir.
Azərbaycanın son illər təkcə regionda deyil, həm də beynəlxalq aləmdə nüfuzunun artdığını vurğulayan səfir ölkəmizin dünyanın enerji təhlükəsizliyinin təmin edilməsində oynadığı mühüm rolu vurğulamışdır. Azərbaycanın həyata keçirdiyi Bakı-Tbilisi-Ceyhan və Bakı-Tbilisi-Ərzurum kimi nəhəng neft və qaz, eləcə də TAP layihələri barədə ətraflı məlumat verilmişdir. Hazırda enerji sahəsində prioritetin təbii qazın nəqli olduğunu bildirən səfir Avropanın enerji təhlükəsizliyinin təmin edilməsində Azərbaycanın rolundan danışmışdır. Yaponiyanın “Itochu” və “İnpex” şirkətlərinin də Bakı-Tbilisi-Ceyhan neft boru kəmərinin iştirakçıları olduğu bildirilmişdir.
Bununla yanaşı, Azərbaycan hökumətinin qeyri-neft sektorunun inkişafına xüsusi diqqət yetirdiyi vurğulanmış, sənaye, turizm, kənd təsərrüfatı, alternativ və bərpa olunan enerji mənbələri sahələrində geniş imkanların mövcud olduğu bildirilmişdir.
Təqdimatda Azərbaycanın etibarlı tərəfdaş kimi beynəlxalq münasibətlər sistemində özünü doğrultduğu diqqətə çatdırılmış, ölkəmizin 2012-2013-cü illər üçün BMT Təhlükəsizlik Şurasına qeyri-daimi üzv seçilməsinin bunun bariz nümunəsi olduğu vurğulanmışdır.
Səfir Azərbaycan-Yaponiya əlaqələri barədə ətraflı məlumat vermiş, iki dost ölkə arasında əməkdaşlığın inkişafından məmnunluğunu bildirmişdir.
Azərbaycanın müstəqilliyinin bərpası və ərazi bütövlüyünün qorunması uğrunda xalqın mübarizəsindən danışan diplomat 20 Yanvar faciəsi və Xocalı soyqırımı haqqında da məlumat vermişdir. G.İsmayılzadə Qanlı Yanvarın Azərbaycanda hər il ümumxalq hüzn günü kimi qeyd edildiyini bildirmişdir. 1990-cı il yanvarın 20-də sovet silahlı qüvvələrinin Azərbaycan xalqına qarşı həyata keçirdiyi qətliamın insanlığa qarşı törədilmiş ağır cinayətlərdən biri kimi xalqımızın qan yaddaşına yazıldığı qeyd edilmişdir. Bildirilmişdir ki, 20 Yanvar Azərbaycan tarixinin həm də qəhrəmanlıq səhifəsi, xalqımızın azadlıq uğrunda mübarizə əzminin və yenilməz iradəsinin rəmzidir.
Daha sonra erməni işğalçıları və sovet ordusunun 366-cı motoatıcı alayının Xocalı şəhərinin dinc sakinlərinə qarşı törədilmiş soyqırımı haqqında danışılmışdır. Bu kütləvi qırğın zamanı qocalar, uşaqlar, qadınlar da daxil olmaqla 613 dinc sakinin qətlə yetirildiyi, 487 nəfərin şikəst edildiyi, 1275 insanın əsir götürülərək ağlasığmaz zülmə və həqarətlərə məruz qaldığı, 150 nəfərin taleyinin isə hələ də məlum olmadığı qeyd edilmişdir. Səfir Xocalıda erməni cəlladları tərəfindən törədilənlərin yalnız Azərbaycan xalqına qarşı soyqırımı deyil, həm də bəşəriyyət, insanlıq əleyhinə qanlı cinayət olduğunu söyləmişdir.
G.İsmayılzadə iştirakçıların çoxsaylı suallarını cavablandırmışdır.
Tədbirin sonunda çıxış edən Haruyasu Tateişi Azərbaycanın son illər əldə etdiyi uğurlardan məlumatlı olduqlarını bildirmiş, Yaponiya siyasətçilərinin, xüsusilə Azərbaycan-Yaponiya parlamentlərarası dostluq qrupunun üzvlərinin ölkəmizin nailiyyətlərinə sevindiklərini vurğulamışdır. O, Azərbaycan ilə Yaponiya arasında iqtisadi əməkdaşlığın əhəmiyyətindən danışmış, yaranmış şəraitdən faydalanmağın, bu dost ölkə ilə əlaqələri inkişaf etdirməyin önəmini vurğulamışdır.
Tədbirdə iştirakçılara yapon dilində nəşr edilmiş “İRS-İsan” jurnalının dördüncü buraxılışı paylanmışdır.
Vüqar Ağayev
AZƏRTAC-ın xüsusi müxbiri
Tokio