DÜNYA


Tokioya yağan güclü qar səbəbindən 500-dən çox şəxs xəsarət alıb

Tokio, 8 yanvar, AZƏRTAC

Yanvarın 6-da və 7-də yağan güclü qar nəticəsində Tokioda 500-dən çox xəsarət alan şəxs xəstəxanalara yerləşdirilib.

AZƏRTAC yerli hakimiyyət orqanlarına istinadla xəbər verir ki, Yaponiya paytaxtına son dörd ildə ən çox qar həmin günlərdə yağıb.

Tokio Yanğınsöndürmə Xidmətinin yaydığı məlumata görə, yanvarın 6-da və 7-də ciddi xəsarət almış 525 nəfər xəstəxanalara yerləşdirilib. Qar yağan müddətdə havanın kəskin soyuması yollarda buzun yaranmasına səbəb olub və nəticədə çoxsaylı yol-hərəkət qəzaları qeydə alınıb. Yaponiya paytaxtında baş vermiş 77 yol-hərəkət hadisəsi nəticəsində xəsarət alanlar var.

Tokioya girişə xidmət edən körpülərdə, xüsusən paytaxtın əsas qapısı hesab olunan “Göy qurşağı” körpüsündə 100-dək avtomobil bir neçə saat hərəkətsiz qalıb.

“All Nippon Airways” şirkəti Tokionun “Haneda” beynəlxalq aeroportunda doqquz reysi təxirə salıb. Bəzi dəmiryolu xətlərində də qatarların hərəkətində fasilələr yaranıb.

Tokio ilə qonşuluqda yerləşən Saytama prefekturasında 140 nəfərin müxtəlif xəsarətlər aldığı bildirilir.

Paytaxtın şimal-şərqində yerləşən İbaraki prefekturasında isə güclü qar nəticəsində 548 yol-nəqliyyat hadisəsinin baş verdiyi və 64 nəfərin müxtəlif xəsarətlər aldığı qeyd olunur.

Vüqar Ağayev

AZƏRTAC-ın xüsusi müxbiri

Tokio 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.