CƏMİYYƏT
Torpaqlarımızın azad olunması Prezident İlham Əliyevin son 17 ildə güclü dövlət, güclü ordu strategiyası həyata keçirməsinin nəticəsidir
Bakı, 10 noyabr, AZƏRTAC
Azərbaycan Ordusunun sentyabrın 27-də Qarabağda əks-hücum əməliyyatı ilə başladığı və noyabrın 10-da Ermənistanın təslim olması ilə nəticələnən bəyanatın rəsmi şəkildə elan edilməsindən sonra respublikamızın şəhər və rayonlarında vətəndaşlar küçələrə axışaraq bu tarixi günün sevincini birlikdə bölüşürlər. Azərbaycan xalqı bu bayramı gecə saatlarından başlayaraq böyük coşqu ilə qeyd edir. Əllərində Azərbaycanın bayraqlarını tutan, Qarabağ şüarları səsləndirən yüz minlərlə vətəndaşımız müxtəlif istiqamətlərdə qələbə yürüşünə qatılıb. Ölkəmizin bütün şəhər və rayonlarında zəfər yürüşü keçirilir. Vətəndaşlar Azərbaycan Ordusuna, habelə Azərbaycan Respublikasının Prezidenti, Müzəffər Ali Baş Komandan İlham Əliyevə minnətdarlıqlarını bildirir, növbəti dəfə həmrəyliklərini ifadə edirlər.
Bu sözləri AZƏRTAC-a Azərbaycan Jurnalistlər Şəbəkəsi İctimai Birliyinin sədri Ayaz Mirzəyev bildirib.
A.Mirzəyev deyib: “Əminik ki, bu qələbə barədə çoxlu kitablar yazılacaq, filmlər çəkiləcək. Amma indidən deyə bilərik ki, qələbəmizin səbəbi düzgün siyasət, milli birlik və bəlkə də yeni əsrdə tayı-bərabəri olmayan milli şücaət nümunəsi idi. Bu sevinci bizə canları, qanları bahasına bəxş edən əsgərimizə, şəhidlərimizə, ordumuza borcluyuq. Onların ailələri qarşısında baş əyirik!
Biz bu qələbəni, bütün təzyiqlərə baxmayaraq, ölkəmizin həqiqətlərini dünyaya ən doğru şəkildə çatdıran, xalqımıza ruh yüksəkliyi və tam qələbəni bəxş edən Ali Baş Komandana borcluyuq. Qazandığımız qələbə əldə edə biləcəyimiz ən gözəl nəticə idi. Buna hər bir Azərbaycan vətəndaşı əmindir.
İndi bizim üzərimizə düşən vəzifə bu ruh yüksəkliyi ilə ölkəmizin daha da möhkəmlənməsinə öz töhfəmizi verməkdir. Həm döyüş meydanında, həm diplomatiyada qələbəmiz yüksək vətənpərvərlik və savadın nəticəsi idi. Bu iki amili qorusaq və inkişaf etdirsək, Azərbaycan hər zaman qalib olacaq”.
A.Mirzəyev qeyd edib ki, Azərbaycan hərb tarixinə yenilik kimi düşən strategiya tətbiq edərək ən müasir silahlardan istifadə etməklə, minimal itkilər verərək qısa müddət ərzində düşmənin bütün hərbi texnikasını məhv etdi, canlı qüvvəsinə ciddi zərbə vurdu. Azərbaycan Ordusunun yüksək peşəkarlıqla apardığı işğaldan azadetmə əməliyyatı dünya üzrə müharibələrin aparılması doktrinasında ciddi dəyişikliklərə səbəb olacaq. Yüksək dağlıq şəraitdə həyata keçirilən Şuşanın azad edilməsi əməliyyatı sözsüz Azərbaycanın hərb tarixinin ən parlaq səhifəsidir.
İndi regionda Azərbaycanın maraqlarına cavab verən yeni siyasi reallıq yaranıb. Yekun nəticədə Azərbaycan vətəndaşlarının 30 ilə yaxın davam edən torpaq həsrətinə son qoyulub. Ali Baş Komandan nəyi necə və nə zaman etməyi özünün yaxşı bildiyini bir daha nümayiş etdirdi və bu qələbə azərbaycanlılar haqqında məğlub xalq sindromunu sındırdı, xalqın inamını özünə qaytardı. Bütün dünya gördü ki, Azərbaycan xalqı heç vaxt məğlubiyyətlə barışmayacaq və gec-tez öz amalına qovuşacaq. Prezident İlham Əliyevin son 17 ildə həyata keçirdiyi güclü dövlət, güclü ordu strategiyası torpaqlarımızın işğaldan azad olunmasının ən başlıca səbəbidir.