Bakı, 28 sentyabr, AZƏRTAC

Mənfur qonşumuz 30 ilə yaxındır BMT Təhlükəsizlik Şurasının qətnamələrinə məhəl qoymur və əfsuslar olsun ki, buna görə cəzalandırılmır. Biz dəfələrlə BMT-nin Təhlükəsizlik Şurasının qətnamələrinin bir neçə gün ərzində icra edildiyinin şahidi olmuşuq. Azərbaycana gəldikdə isə qətnamələr icra olunmur və bundan ruhlanan Ermənistan yeni torpaqlar işğal edəcəyini dilə gətirir, növbəti təxribatlar törədir. ATƏT-in Minsk qrupunun fəaliyyətsizliyi, həmsədrlərin regiona “turist” səfərləri ona gətirib çıxarıb ki, Ermənistanın baş naziri militarist bəyanatlar verir, status-kvonun dəyişməz qalması üçün əlindən gələni edir, substantiv danışıqların qarşısını alır. İşğalçı Ermənistan beynəlxalq hüququn normalarını pozaraq yeni təxribata əl atıb.

Bu fikirləri AZƏRTAC-a müsahibəsində Azərbaycan Turizm və Menecment Universitetinin Turizm və Qonaqpərvərlik fakültəsinin dekanı, dosent Bahadur Bilalov söyləyib. O bildirib ki, sentyabrın 27-də saat 06.00 radələrində Ermənistan silahlı qüvvələri tərəfindən Tərtərin Qapanlı, Ağdamın Çıraqlı və Orta Qərvənd, Füzulinin Alxanlı, Şükürbəyli və Cəbrayılın Cocuq Mərcanlı kəndləri iriçaplı silahlar, minaatanlar və müxtəlif artilleriya qurğularından intensiv atəşə tutulub. Ermənilərin növbəti təxribatı nəticəsində mülki əhali və hərbi qulluqçularımız həlak olub və yaralanıb. Ermənistanın genişmiqyaslı hərbi əməliyyatlara başlaması, mülki əhalinin yaşadığı kəndləri və infrastruktur obyektlərini hədəf kimi seçməsi beynəlxalq hüquqa ziddir və bunun qarşısı qətiyyətlə alınmalıdır.

Azərbaycan ordusu düşmənə ağır zərbələr vuraraq onu geri oturtmuş və cəbhəboyu əks-hücuma keçib. Otuz il işğalda qalmış kənd və qəsəbələrimiz Azərbaycanın qəhrəman əsgərləri tərəfindən düşmən tapdağından azad edilir. Dövlətimizin başçısı ermənilərin yeni təxribatı ilə əlaqədar Azərbaycan xalqına müraciətində deyib: “Biz haqq yolundayıq. Bizim işimiz haqq işidir. Biz zəfər çalacağıq! Qarabağ bizimdir, Qarabağ Azərbaycandır!”

“Azərbaycan Turizm və Menecment Universitetinin professor-müəllim heyəti və tələbələri Ali Baş Komandan, Prezident İlham Əliyevin Vətənimizin ərazi bütövlüyünün və vətəndaşların təhlükəsizliyinin qorunması, Ermənistanın ölkəmizə qarşı genişmiqyaslı terror təxribatlarının qarşısının alınması məqsədilə həyata keçirdiyi bütün siyasi və hərbi tədbirləri yekdilliklə dəstəkləyir və onun yanında olduğunu bildirir. Biz Azərbaycan torpaqlarının işğaldan azad olunması uğrunda başlanmış savaşda dövlətimizin, Silahlı Qüvvələrimizin və onun Ali Baş Komandanının yanındayıq”,- deyə Bahadur Bilalov qeyd edib.