MƏDƏNİYYƏT


Tovuz rayonundakı muzeylər eksponatlarla zənginləşdiriləcək

Bakı, 8 fevral, AZƏRTAC

Fevralın 8-də mədəniyyət naziri Əbülfəs Qarayev Tovuz rayonu ərazisində mədəniyyət müəssisələri üçün yeni binaların inşa olunması ilə bağlı görülən işlərlə tanış olub.

Mədəniyyət Nazirliyindən AZƏRTAC-a bildirilib ki, nazir Əbülfəs Qarayev, Tovuz Rayon İcra Hakimiyyətinin başçısı Məmməd Məmmədov, Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin rəisi Zakir Sultanov Tovuz Rayon Tarix-Diyarşünaslıq Muzeyinin yeni binasında tikinti işləri ilə tanış olublar.

Məlumat verilib ki, muzeydə 2017-ci ildə başlanan inşaat işləri yekunlaşıb. Ümumi sahəsi 820 kvadratmetr olan ikimərtəbəli muzey istifadəyə verildikdən sonra burada bölgənin tarixini, mədəni irsini, etnoqrafiyasını özündə əks etdirən ekspozisiyalar fəaliyyət göstərəcək.

Tovuz rayonunda Aşıq Hüseyn Bozalqanlı adına Azərbaycan Aşıq Sənəti Dövlət Muzeyi üçün də yeni bina tikilir. Tikinti işlərinə 2013-cü ildə başlanılıb. Müəyyən fasilədən sonra binanın inşası davam etdirilir. Muzeyin yeni binası iki mərtəbədən ibarət olacaq və müasir standartlara cavab verəcək. Muzey aşıq sənəti ilə bağlı eksponatlarla zənginləşdiriləcək.

Nazir hər iki mədəniyyət ocağının inşası, görülən işlərlə bağlı tövsiyələrini verib.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.