REGİONLAR
Tovuz rayonunun Ceyrançöl ərazisində yerləşən aqroparkına indiyədək 22,7 milyon manat investisiya yatırılıb
Bakı, 1 avqust, AZƏRTAC
İqtisadi Zonaların İnkişafı Agentliyinin (İZİA) təşkilatçılığı ilə “Tovuz Aqro” MMC-nin Tovuz rayonunun Ceyrançöl ərazisində yerləşən aqroparkına mediatur təşkil edilib.
İZİA-dan AZƏRTAC-a bildirilib ki, media nümayəndələrinə “Tovuz Aqro” MMC-nin fəaliyyəti, görülmüş işlər barədə məlumat verilib. Bildirilib ki, aqropark 3 fəaliyyət istiqaməti - ətlik heyvandarlıq, əkinçilik və ət emalı sahələri üzrə ixtisaslaşıb. İndiyədək aqroparka 22,7 milyon manat investisiya yatırılıb. Ümumi ərazisi 550 hektar olan aqroparkda 75 nəfər daimi, 19 nəfər isə mövsümi işlə təmin edilib. 2021-ci ildə aqroparkda 800 ton arpa, 1000 ton buğda, 240 ton dən qarğıdalı, 973 ton ət, cari ilin 6 ayında isə 1200 ton buğda, 994 ton arpa, 465 ton yonca, 362 ton ət istehsal edilib. “Tovuz Aqro”da ümumi tutumu 3 min kubmetr həcmində müasir taxıl anbarı, istehsal gücü saatda 10 ton olan yem zavodu və ümumi tutumu 40 ton olan soyuducu kameralar fəaliyyət göstərir. Aqroparkın 1500 başlıq heyvandarlıq kompleksində 1200 baş cins iribuynuzlu heyvan saxlanılır. Aqroparka İqtisadiyyat Nazirliyinin Sahibkarlığın İnkişafı Fondu tərəfindən 7 milyon manat güzəştli kredit verilib. Bundan başqa, nazirlik tərəfindən verilmiş investisiya təşviqi sənədi sayəsində texnika, texnoloji avadanlıqlar və qurğuların idxalına görə 0,29 milyon manata qənaət edilib.