REGİONLAR
Tovuzda bir neçə yolun yenidən qurulması yekunlaşır VİDEO
Bakı, 9 avqust, AZƏRTAC
Tovuzda bir neçə yolun yenidən qurulması yekunlaşır.
Azərbaycan Avtomobil Yolları Dövlət Agentliyindən (AAYDA) AZƏRTAC-a bildirilib ki, Əsrik Cırdaxan-Kirən-Baqqallı avtomobil yolunun, həmçinin Hacıhəsənli, Yanıqlı, Sofular, Saladinli kəndlərinə və düşərgəyə gedən giriş yollarının yenidən qurulması başa çatır.
Yolun 18 kilometr uzunluğa malik Əsrik-Cırdaxan-Kirən-Baqqallı hissəsi IV və V texniki dərəcəyə uyğun yenidən qurulur. Layihəyə uyğun olaraq torpaq yatağının normativ eninin alınması üçün genişləndirilib, genişləndirilən ərazilərə yolboyu yararlı material tökülərək qrunt yayılıb və kipləşdirilib, yeni yol yatağı inşa olunub. Bundan başqa, yolboyu avtoqreyderlə 26 min poqonmetr küvetlərin açılması və müxtəlif diametrdə 21 ədəd 228 poqonmetr uzunluğunda suötrücü dəmir-beton boruların quraşdırılması və izolyasiyası, boru başlıqlarının dəmir betonla tikintisi işləri də aparılıb.
Daha sonra texnoloji ardıcıllığa uyğun olaraq yol əsasının tikintisi işləri aparılıb. Yol əsasının alt layının tikintisi 20 santimetr hündürlükdə qum-çınqıl, üst layının tikintisi isə 16 santimetr hündürlükdə optimal qırmadaş qarışığı ilə aparılıb. Yol əsasının tikintisi 182 min kvadratmetr sahəni əhatə edib. Bu işlərin ardınca yolun asfaltlanması işlərinə start verilib. Əlaqələndirici bitum səpilməklə 100 min kvadratmetrdən çox sahəyə 12 santimetr qalınlıqda 2 laydan ibarət iri və xırdadənəli olmaqla asfalt-beton örtüyü döşənir.
Analoji işlər Hacıhəsənli, Yanıqlı, Sofular, Saladinli kəndlərinə və düşərgəyə gedən giriş yollarında da aparılıb. Burda yolların ümumi uzunluğu 15 kilometr təşkil edir. Yolun yararsız qruntunun qazılıb kənarlaşdırılması və yolun V texniki dərəcəyə uyğun yenidən qurulması üçün torpaq yatağı 2-4 metr genişləndirilib. Bunun üçün dağlıq ərazilərdə yolun normativ eninin alınması üçün yamacların və qaya tipli süxurların xüsusi texnika ilə kəsilməsi işləri də aparılıb. Ümumilikdə bu işlərin həcmi 53 min kubmetr təşkil edib.
Yol yatağının və yol əsasının sel suları nəticəsində yuyulmasının qarşısını almaq məqsədilə 18,5 min poqonmetr uzunluğunda küvetlərin açılması, 10 yerdə müxtəlif diametrli və 100 poqonmetr uzunluğunda dəmir-beton suötürcü boruların quraşdırılması işləri də aparılıb. Düşərgə və Hacıhəsənli kəndinə giriş yolunun asfalt-beton örtüklü, Yanıqlı, Sofular və Saladinli kəndlərinin giriş yollarının isə çınqıl örtüklü olması nəzərdə tutulub. Bunun üçün yollar boyu 110 min kvadratmetrdən çox sahədə 2 laydan ibarət və 28 santimetr hündürlüyündə yol əsasının tikintisi aparılıb.
Düşərgə və Hacıhəsənli kəndinin giriş yolunun 12 min kvadratmetrdən çox sahəyə 2 qat olmaqla yeni asfalt-beton örtüyü döşənir. Yanıqlı, Sofular və Saladinli kəndlərinə giriş yollarının 60 min kvadratmetrdən çox sahəsində isə yol geyiminin 12 santimetr qalınlıqda optimal qum-qırmadaş qarışığı ilə tikintisi işləri aparılır.
Tikinti işlərinin sonuncu mərhələsində layihə boyu 176 ədəd yol nişanı və məlumatverici lövhə, kilometr göstəricisi ,1715 ədəd siqnal dirəyi quraşdırılacaq. Yolun üfüqi nişanlama xətlərinin çəkilişi işləri aparılmaqla yaxın aylarda burda müasir yol infrastrukturu yaradılacaq.